O vai te tavini haapao maitai e te paari?

Tau mahana hou to ˈna poheraa, ua aparau Iesu i ta ˈna na pǐpǐ o Petero, Iakobo, Ioane e Anederea. A tohu ai oia i te tapao o te tau o to ˈna hoˈiraa mai ei Arii i te mau mahana hopea, ua tuu oia i teie uiraa faufaa: “O vai hoi te tavini haapao maitai e te paari ta to ˈna fatu i faatoroa i nia i te mau tavini o to ˈna utuafare, no te horoa ˈtu i ta ratou maa i te taime tano?” (Mataio 24:3, 45; Mareko 13:3, 4) Te haapapu ra te “fatu” Iesu e e faatoroa oia i te feia o te horoa i te maa varua na ta ˈna mau pǐpǐ i te anotau hopea. O vai ma ïa?

E pǔpǔ iti ratou ei pǐpǐ faatavaihia na Iesu. O te Tino aratai a te mau Ite no Iehova “te tavini.” Te opere nei ratou i te maa varua i te taime au na to ratou mau taeae e tuahine e haamori ra ia Iehova. E hinaaro mau â matou i teie tavini haapao maitai no te horoa noa na matou i “te maa e navai i te taime tano.”—Luka 12:42.

E haapao ratou i te utuafare o te Atua. (Timoteo 1, 3:15) Ua horoa Iesu i te tavini i te hopoia rahi e haapao i te ohipa a te tuhaa o te faanahonahoraa a Iehova i te fenua, te mau faufaa materia anei, te ohipa pororaa e te haapiiraa mai na roto i ta matou mau amuiraa. No te horoa mai i ta matou e hinaaro mau i te taime tano, te opere nei “te tavini haapao maitai e te paari” i te maa varua maoti te mau mea i piahia ta matou e faaohipa nei i roto i te taviniraa, ta matou mau putuputuraa e tairururaa.

E tavini haapao maitai i te pue parau mau Bibilia e te hopoia e poro i te parau apî oaoa. E tavini paari atoa o te haapao maite i te mau faufaa a te Mesia i te fenua. (Ohipa 10:42) Te haamaitai nei Iehova i ta ratou ohipa. Mea rahi hoi te riro nei ei Ite no ˈna e mea rahi te maa varua e operehia nei.—Isaia 60:22; 65:13.

• O vai ta Iesu i faatoroa no te opere i te maa varua na ta ˈna mau pǐpǐ?

• No te aha e parauhia ˈi e e tavini haapao maitai e te paari?