Neneiraa buka bibilia no te arueraa i te Atua

E mea mataro-maitai-hia e te faaite nei te mau Ite o Iehova i te Basileia o te Atua na roto i te ravea o te mau parau neneihia. Mai te matahiti 1920 mai â, te faaohipa nei te Taiete Watch Tower i te mau taata rave ohipa, e e mau Ite iho â ratou, no te neneiraa i te mau vea e te mau buka ia nehenehe te reira e operehia. Na roto i te reira ravea i nehenehe ai e faahotu tamau noa i te mau huru buka atoa.

A 60 matahiti i teie nei, ua faarahi te Taiete e ua faaaano atu â i ta ˈna neneiraa i te mau buka no nia i te Bibilia, na mua ˈˈe i Brooklyn, e i muri iho i roto i te tahi mau fenua ê atu. Ua tupu teie ohipa i te rahi, na roto maoti i te mau rave ohipa tei horoa noa ia ratou iho e o tei haere noa hoi te numera i te rahi.

I te hopearaa o te mau matahiti 1970, ua vaiihohia te mau ravea neneiraa tahito o tei monohia mai e te ravea neneiraa apî ravehia i nia i te matini roro uira (ordinateur) e te ravea neneiraa offset. Te vahi peapea râ, te mau matini i roto i te matete hooraa taoˈa, ua hamanihia ïa e no te tahi noa tau reo. Area râ, te nenei ra ïa te Taiete i te reira na roto 160 reo e te ite faahou ra oia i te faufaaraa ia amui mai â i te tahi mau reo ê atu.

Ua anihia i te tahi mau rave ohipa o tei horoahia ˈtu te hopoia ia ratou ra no te maimi i te hoê ravea matini uira neneiraa na roto i te reo huru rau. Ua manuïa mau te mau tutavaraa. Ua tatara-rii-rii-hia te mau fifi i te pae no te matini, e ua hamanihia te hoê matini apo ite parau, no te farii mai i te mau pereota, te mau api e te ravea neneiraa tei piihia MEPS, tei hamanihia. Ua porotaramahia oia e ua fatata e 200 reo e aitâ taua numera ra i taotiahia i reira.

I teie mahana, te faaohipahia ra te mau patapataraa e te mau paruai i hamanihia e te mau Ite o Iehova iho i roto e 25 fenua, e ua fatata i roto i te tahi mau fenua ê atu. Te mau rave ohipa tei haere mai no roto mai i taua mau fenua ra tei faaaravihihia no te ohiparaa ˈtu i nia i taua mau matini ra, e no te atuaturaa i te reira. Te nenei nei te Taiete i teie nei i te mau vea i roto hau atu i te 100 reo e i roto e 36 fenua, e e 5 o taua mau fenua ra te nenei atoa nei i te mau buka e te mau Bibilia.

E mea titauhia no teie ohipa te mau rave ohipa: te mau taata papai, te huri reo, te hiˈopoa i te mau hape, te mau rave ohipa i nia i te matini, te mau taata e tapiripiri i te mau api e te mau taata e tuu i te reira i roto i te afata e e haapono atu ai. Te tahi pae ra na ratou ïa e haapao i te pae o te papairaa rata e te mau amuiraa. Vetahi pae ra na ratou ïa e haapao i te pae no te faahoturaa i te maa huru rau, te tunuraa i te maa, te tamâraa, e te puaraa i te ahu, e te vai atu â. Noa ˈtu eaha te huru o te fenua, e mau rave ohipa anaˈe paatoa ratou tei horoa i to ratou taime no te raveraa i taua ohipa ra. I te matahiti 1985, i roto i te ao atoa nei, ua rave e 8438 taata ma te horoa noa i to ratou taime i te ohipa i roto i te mau piha toroa, te mau fare neneiraa, i roto i te mau fare nohoraa e te mau fare faaapuraa a te Taiete.

O vai mâ hoi ratou? E mau tane ïa, e mau vahine, e mau taurearea, e mau taata paari, e mau Ite anaˈe ratou paatoa no Iehova. Te tahi pae o ratou te haa nei i roto i teie ohipa a 40, 50 e tae roa ˈtu 60 matahiti. Te rave nei ratou fatata e 44 hora i te hebedoma, e e hau atu mai te peu e hinaarohia, i roto i te tuhaa ohipa i horoahia ˈtu na ratou. Ua faahereherehia ïa te mau ahiahi e te mau hopea hebedoma no te pororaa i te parau apî maitai i tera e tera fare e i roto i te tahi atu mau ohipa a te amuiraa.

E faaearaa au noa to teie feia rave ohipa e e tamaa hoi ratou i roto i te mau piha tamaaraa a te Taiete, e piihia te mau Betela. E horoa-atoa-hia nei na ratou te hoê tino moni haihai no te tahi ïa mau haamâuˈaraa ia haere atu ratou i roto i te taviniraa e no ratou iho.

Mai te matahiti 1920 mai â, ua nenei teie mau rave ohipa hau atu i te iva milia Bibilia, mau buka, mau vea e mau vea iti i roto hau atu e 200 reo no te opereraa ˈtu i roto i te ao atoa nei. Te rave ra ratou i ta ratou tuhaa ia nehenehe i te parau apî maitai ia porohia ei evanelia i roto i te mau fenua e te mau opu, e te mau reo e te mau nunaa atoa. — Apokalupo 14:6, 7.

● Eaha te mau huru matini neneiraa e vai ra i te Taiete, e no te aha?

● Na vai e rave ra i te taatoaraa o taua mau ohipa ra, e mea nafea taua mau taata ra ia ora?

[Hohoˈa i te api 24]

Mau rave ohipa e haa ra i roto i te fare neneiraa, i roto i te mau piha o te fare nohoraa, i te piha toroa e i te fare faaapuraa no Brooklyn e no Wallkill (Etats-Unis), ua taaihia mai hoi taua mau ohipa ra i te neneiraa o te mau buka no nia i te Bibilia.

[Hohoˈa i te api 25]

Mau rave ohipa e haa ra i te mau ohipa taa ê atoa tei taai fatata mai aore ra tei te atea i te neneiraa i te mau Bibilia e te mau buka no nia i te Bibilia.

Paniora

Helemani

Finlande

Kanada

Danemaka

Tuete

Afirika Apatoa

Beresilia

Pays-Bas

Auteralia