EAHA TE RAVE IA MARAA TE MONI HOO?

A mauruuru noa

Te feia o tei faatupu i te hoê feruriraa au noa, e mauruuru noa ïa ratou. Ia taui noa ˈtu te tupuraa, e faatano ïa i to ratou huru oraraa ma te ore e haamâuˈa hau atu â te moni e vai ra.

NO TE AHA MEA FAUFAA?

Ua tapao te taote i te pae feruriraa o Jessica Koehler e feruriraa maitai aˈe to te taata o tei mauruuru noa i te mau mea e vai ra. Eita ratou e nounou i to vetahi oraraa. Mea oaoa aˈe ratou e e iti atoa mai to ratou hepohepo. Noa ˈtu aita e rahi ta ratou faufaa, e oaoa noa ratou no te mea ua ite ratou te mea faufaa roa ˈˈe o te horoaraa ïa i to taime no te utuafare e te mau hoa.

“Te vai ra ta tatou maa e te ahu, e mauruuru tatou i te reira.”—Timoteo 1, 6:8.

EAHA TE NEHENEHE E RAVE?

Eiaha e faaau. Ia faaau oe i to oe oraraa haihai i to te tahi atu mea faahiahia aˈe paha, e nehenehe te reira e faatupu mai i te mauruuru ore e te miimii. Peneiaˈe, e manaˈo tatou e mea moni roa te hoê taata no te rahi o ta ˈna taoˈa. Tera râ, no te fanaˈo i te reira ua tarahu paha oia. Te parau ra Nicole, e ora ra i Sénégal: “Te oaoa nei au noa ˈtu mea iti ta ˈu taoˈa. E mauruuru noa vau i te mau mea e vai ra e e oaoa atoa vau noa ˈtu mea rahi aˈe ta vetahi.”

A tamata na: A haapae i te mau faaanaanataeraa aore ra reni faahoaraa o tei haafaufaa ra i te moni aore ra te huru oraraa faahiahia o vetahi ê.

“Noa ˈtu e mea rahi te taoˈa a te hoê taata, eita oia e ora i te reira.”—Luka 12:15.

Ia mauruuru noa. E faatupu te taata feruriraa au noa i te mauruuru no te mau mea e vai ra ma te ore e titau hau atu. Te na ô ra Roberton, no Haïti: “E rave au i te taime no te feruri i te hamani maitai ta vetahi i faaite ia ˈu e to ˈu utuafare e e haamauruuru atu vau. E haapii atoa vau i ta ˈu tamaiti e vaˈu matahiti ia haamauruuru i te taata no te mau mea e horoahia na ˈna.”

A tamata na: I te mau mahana atoa, a papai i roto i te hoê buka te mau mea i mauruuru ai oe mai te fanaˈoraa i te ea maitai, te hoê utuafare tahoê, te hoa mau aore ra te hoê toparaa mahana nehenehe mau.

“Te taata e aau oaoa to ˈna, e tamaaraa noa ïa ta ˈna.”—Maseli 15:15.

I te tahi taime, e ere i te mea ohie ia mauruuru noa i te mau mea e vai ra. Mea faufaa râ te mau tutavaraa ta tatou e rave. Ia maiti tatou i te faatupu i te hoê feruriraa au noa e oaoa ïa tatou. Eita hoi te moni e nehenehe e hoo mai i te reira.