EAHA TE RAVE IA MARAA TE MONI HOO?

A horoa ma te aau tae

Mai te peu mea fifi ia hoo te mau mea hinaarohia, e nafea ia oe e nehenehe ai e horoa na vetahi ê? Tera râ, ia horoa oe ma te hoê aau tae e tauturu te reira ia oaoa noa oe noa ˈtu te fifi i te pae moni. E nehenehe oe e haaputu ta oe moni e e horoa atoa i te tahi mea na vetahi ê.

NO TE AHA MEA FAUFAA?

Noa ˈtu mea iti roa ta oe e nehenehe e horoa, e oaoa râ oe. Oia mau, ua faaite te mau maimiraa mea maitai no te ea pae tino e pae feruriraa ia horoa na vetahi ê. E iti mai hoi te hepohepo, te haapeapearaa, te neˈiraa toto e te mau mauiui. E nehenehe atoa te reira e haamaitai i te taoto.

“E rahi aˈe te oaoa ia horoa ˈtu ia horoahia mai.”—Ohipa 20:35.

Ia tauturu tatou ia vetahi ê, ma te horoa anei i te moni aore ra te tahi atu mea hinaarohia, e ohie aˈe paha no tatou ia farii i ta te tahi tauturu. Te parau ra Howard, e ora ra i Beretane: “Ia imi mâua ta ˈu vahine i te ravea no te horoa e no te tauturu i te tahi atu taata aita ïa mâua e taiâ ia farii i te tauturu.” Oia mau, ia horoa te taata ma te aau tae aita ratou e titau ia horoahia mai. E fanaˈo râ ratou te mau hoa papu i te taime a fifihia ˈi ratou.

“A tamau i te horoa, e horoa atoa mai ïa te taata.”—Luka 6:38.

EAHA TE NEHENEHE E RAVE?

A horoa i te mea e vai ra. Mai te mea ra e mea iti ta oe faufaa e nehenehe râ oe e horoa, mai te maa anei. Te ora ra Duncan e to ˈna utuafare i Ouganda, e noa ˈtu mea veve ratou mea au na ratou e horoa. Te parau ra Duncan: “I te mau Tapati, e titau manihini mâua ta ˈu vahine i te tahi taata no te tamaa i te fare. E mau taime oaoa roa tera.”

Parau mau, ia horoa oe na vetahi ê, a vai aifaito noa eiaha to oe utuafare ia ere-atoa-hia.—Ioba 17:5.

A tamata na: A horoa i te tahi maa ohie aore ra te tahi inu. Mai te peu te vai ra te tahi ohipa aita oe e hinaaro faahou, e nehenehe anei oe e horoa na te mau hoa aore ra taata tapiri? E oaoa ratou ia na reira oe.

A horoa te tahi atu mea. Aita e titauhia te moni no te horoa te tahi ô. Ei hiˈoraa, e nehenehe oe e horoa i to oe taime no te tauturu e no te faaite te tâuˈa ra oe ia vetahi ê. E ô atoa te mau parau faaitoito e mahanahana mau o te haapapu i to tatou here no ratou.

A tamata na: A horoa i te tauturu ma te tamâ aore ra ma te tataî i te fare aore ra ma te haere i te fare toa. A papai i te hoê tareta no te haamauruuru aore ra a hapono atu i te poroi no te faaitoito i te hoê hoa.

E rahi te oaoa e e maitaihia to oe oraraa ia horoa oe ma te aau tae.

“Eiaha e haamoˈe i te rave i te maitai e i te tufa i ta outou mau mea na vetahi ê.”—Hebera 13:16.

Te tauturu ra na hoa faaipoipo i te hoê vahine ruhiruhia. Te horoa ra o ˈna i te tahi inu veavea a paraˈu ai raua i te pehu.