TE HOÊ AO AREPUREPU

1 | A paruru i to oe ea

NO TE AHA MEA FAUFAA?

Ia tupu te hoê fifi mau aore ra te hoê ati natura, e nehenehe te reira e haafifi i te ea o te taata.

Ia faaruru te taata i te tahi tupuraa ino mau, e hepohepo ratou. Ia vai maoro râ tera hepohepo, mea pinepine te taata i te maˈihia.
Ia tupu te ati, e ere i te mea ohie no te mau fare maˈi ia aupuru maitai i te mau taata no te mea mea rahi te feia maˈi o te haere i ǒ i te hoê â taime e aita paha te raau hinaarohia e navai ra.
Ia tupu te ati, e ere i te mea ohie no te mau taata ia aufau i ta ratou e hinaaro mau ra, mai te maa e te raau.

Eaha te titauhia ia ite?

Ia faaruruhia te hoê maˈi ino mau aore ra te hepohepo, e ere i te mea ohie ia feruri maitai. I muri iho, e ravehia paha te mau faaotiraa tano ore no te ea. Ei faahopearaa, e rahi atu â paha te maˈi.
Ia fifihia oe i te pae o te ea e ia ore oe e tâuˈa i te reira, e ino atu â paha to oe ea e e nehenehe atoa oe e pohe.
Ia maitai atu â oe i te pae o te ea, e ineine atu â ïa oe no te rave i te mau faaotiraa maitai i mua i te ati.
Noa ˈtu mea veve aore ra mea moni oe, e ravea to oe no te paruru i to oe ea.

Eaha te nehenehe e rave i teie nei?

Ia titauhia, e ite atea te taata feruriraa paari i te mau tupuraa atâta e e rave o ˈna i te mau faanahoraa no te paruru ia ˈna. Hoê â huru i te pae o te ea. Ia vai mâ noa oe e to oe fare, pinepine oe i te ape i te maˈi aore ra i te faaiti i te huru ino o to oe maˈi. Mea au aˈe ïa ia rave i te mau faanahoraa na mua ˈˈe, ia ore ia maˈihia.

Te parau ra o Andreasa: “Ma te vai mâ e ma te tamâ i te fare, e faaiti mâua ta ˈu vahine i te mau haamâuˈaraa no te taote aore ra no te mau rapaauraa.”

a Ua tauihia te tahi mau iˈoa i roto i teie vea.

EAHA TE RAVE? Manaˈo tauturu

I te tau arepurepu, a paruru i to oe ea ma te pee i to muri nei mau manaˈo tauturu

IA VAI MÂ NOA OE E TO OE FARE

Ia vai mâ noa oe e to oe fare

Te parau ra te Bibilia: “E ite te taata feruriraa haroˈaroˈa i te tupuraa atâta e e tapuni oia.” (Maseli 22:3) A feruri atea eaha te nehenehe e haafifi i to oe ea e a ape i te reira.

A horoi tamau i to oe na rima ma te faaohipa i te puˈa e te pape, hou iho â râ a tapea ai i te maa aore ra i muri aˈe i te haereraa i te vahi haumitiraa.
A tamâ tamau i to oe fare, i te mau vahi e te mau taoˈa ta oe e faaohipa pinepine ra.
Ia nehenehe, eiaha e vai piri i te mau taata e maˈi pee to ratou.

A AMU I TE MAA MAITAI NO TE EA

A amu i te maa maitai no te ea

Te parau ra te Bibilia: “Aita hoi e taata i hae aˈenei i to ˈna iho tino, e faatamaa râ e e aupuru oia i te reira.” (Ephesia 5:29) E aupuru tatou i to tatou tino ma te haapao maitai i ta tatou e amu e e inu ra.

A inu rahi i te pape.
A amu e rave rau maa hotu e maa tupu.
A faaiti i te maa hinu, te miti popaa e te tihota.
Eiaha e puhipuhi i te avaava e e rave i te raau taero. Eiaha e inu rahi i te ava e e rave hanoa i te mau raau.

Te na ô ra o Carlos: “Ia ore mâua ia maˈihia, e amu noa mâua i te mau maa maitai no te ea. Aita anaˈe, e rahi mai te mau haamâuˈaraa no te aufau i te raau e no te haere e hiˈo i te taote. Mea au aˈe na mâua ia faaohipa i te moni no te aufau i te maa maitai no te ea.”

A FAAETAETA I TE TINO E A TAOTO MAITAI

A faaetaeta i te tino

Te parau ra te Bibilia: “Mea au aˈe hoê apu rima î i te faafaaearaa i e piti apu rima î i te ohipa rohirohi e te aˈuaˈuraa mataˈi.” (Koheleta 4:6) E titauhia ia tatou ia rave i te ohipa, mea faufaa atoa râ ia taoto maitai.

A faaetaeta i to oe tino. Na mua roa, e tamata paha oe i te taahi tamau. E nehenehe te faaetaetaraa i te tino e haamaitai i to oe ea, noa ˈtu ua paari oe, mea paruparu to oe tino aore ra e maˈi tamau to oe.
A taoto maitai

A taoto maitai. Aita anaˈe, e rahi atu â to oe hepohepo e mea fifi atu â no oe ia faaohipa maitai i to oe feruriraa. A mairi ai te tau, e nehenehe atoa te reira e faatupu i te mau fifi rahi i te pae o te ea.
A faataa i te taime tano no te haere e taoto e a pee i te reira. A haere e taoto e a ara i te hoê â hora i te mau mahana atoa.
Hou a taoto ai, eiaha e mataitai i te afata teata e e faaohipa i te mau matini roro uira afaifai.
Eiaha e tamaa rahi, e inu i te taofe aore ra i te ava hou a taoto ai.

Te na ô ra o Justin: “Ua taa ia ˈu e faahopearaa to to ˈu taotoraa i nia i to ˈu ea. Ia ore au e taoto maitai, e mauiui to ˈu upoo i te tahi mau taime e to ˈu tino atoa. Ia taoto maitai râ vau, mea maitai roa vau e ua ineine au i te rave i ta ˈu ohipa. Mea ieie maitai au e aita vau e roo hanoa i te maˈi.”