Te rohi nei e rave rahi taata i te mau mahana atoa ia noaa noa mai te mea faufaa no te ora. Ma te peapea, ia tupu te arepurepu na te ao nei, mea fifi atu â no ratou. No te aha?
Ia tupu te fifi i te tahi fenua, e maraa mai te moni hoo no te maa anei e te fare, a moni roa atu ai te oraraa.
Ia tupu te arepurepu, e rave rahi o te ere i ta ratou ohipa aore ra o te faahepohia ia rohi atu â no te hoê tino moni aufauraa iti aˈe.
E rave rahi tei fifihia aore ra tei ere roa ˈtu i ta ratou tapihooraa, to ratou fare aore ra ta ratou mau faufaa, a topa atu ai i roto i te veve.
Eaha te titauhia ia ite?
A faaohipa i ta oe moni ma te feruriraa paari, e ineine atu â ïa oe no te faaruru i te tau fifi mau.
A haamanaˈo: E nehenehe ta oe mau taoˈa e moˈe. E nehenehe atoa te faufaa o te moni e iti mai, a iti atoa mai ai te moni aufauraa ohipa e te moni ta oe i haaputu.
Aita te moni e nehenehe e aufau i te mau mea atoa, mai te oaoa e te auhoêraa i roto i te utuafare.
Eaha te nehenehe e rave i teie nei?
Te na ô ra te Bibilia: “Te vai ra ta tatou maa e te ahu, e mauruuru tatou i te reira.”—Timoteo 1, 6:8.
A faaite ai i te feruriraa mauruuru, e oaoa tatou i te mea e vai nei. Mea faufaa ia na reira, i te taime iho â râ e iti mai ai ta tatou moni.
No te mauruuru i te mea e vai nei, e titauhia paha ia oe ia faatanotano i ta oe mau haamâuˈaraa. Mai te peu e hoo noa mai oe i te mau taoˈa eita e pee ia oe, e fifi atu â ïa oe i te pae moni.