E nafea ia ore e mamû noa?

TE FIFI

E nafea na hoa faaipoipo i euhe e i here i te tahi e te tahi e ore ai e paraparau tau hora aore ra mahana? E na ô paha ïa raua, ‘Mea au tera aita mâua e tatamaˈi ra.’ Aita râ te fifi i faaafarohia, eita atoa ïa raua e oaoa.

TE TUMU

No te tahoo. E mamû noa vetahi hoa faaipoipo no te tahoo. A feruri na i te tane e faanaho e rave i te hopea hebedoma ma te ore e tauaparau i ta ˈna vahine. Ite aˈera oia, riri atura ma te parau e aita iho â ta ˈna tane e tâuˈa ra ia ˈna. Pahono atura te tane e huru ê hanoa oia. Ma te riri, mamû aˈera te vahine. E au ra e te na ô ra oia, “Ua haamauiui mai oe ia ˈu, tiai mai ïa ta oe.”

No te faatia i to hinaaro. E mamû vetahi ia faatiahia to ratou hinaaro. A feruri na i na hoa faaipoipo e faaineine ra i te reva. Hinaaro atura te vahine e rave atoa i to ˈna na metua. Patoi atura te tane ma te na ô, “Ua faaipoipo oe ia ˈu eiaha i to oe na metua.” Faaea mû noa ˈtu ra te tane a faaoti roa ˈi ta ˈna vahine ia rave mai ta ˈna i parau atu.

Ia tupu te fifi a hinaaro atu ai te tahi e tamǎrû, e maitaihia na hoa faaipoipo ia mamû no te hoê taime poto. E faufaahia raua i taua mamûraa ra. Te na ô ra te Bibilia: “E taime to te mamû noa.” (Koheleta 3:7) Eiaha râ no te tahoo aore ra no te faatia i te hinaaro o te tahi. Ua na reira-anaˈe-hia, e rahi atu â te fifi e eita na hoa faaipoipo e faatura faahou te tahi i te tahi. E nafea ia ore te reira e tupu atoa no oe?

E NAFEA?

Na mua, a faˈi e e ore te fifi e faaafarohia ia mamû noa. Ma te na reira e nehenehe paha oe e tahoo aore ra e turai i to hoa ia rave mai ta oe e hinaaro. Tera anei râ to oe huru i nia i te taata ta oe i euhe e here? Te vai ra te ravea maitai aˈe no te faaafaro i te fifi.

A feruri. Te na ô ra te Bibilia e eita te here “e riri vave.” (Korinetia 1, 13:4, 5) Eiaha ïa e riri taue ia parau atu to hoa faaipoipo, “Eita iho â oe e faaroo ia ˈu” aore ra “Mea taere noa iho â oe.” A feruri râ eaha te auraa mau. A parau ai “Aita iho â oe e faaroo ia ˈu,” te na ô ra paha ïa oia “No ˈu, aita oe e tâuˈa ra i to ˈu manaˈo.”—Faaueraa Bibilia: Maseli 14:29.

A paraparau ma te mǎrû. E faarahi te aimârô i te fifi. E nehenehe râ e taui i te reira. E nafea? Te na ô ra te tahi buka (Fighting for Your Marriage): “A paraparau ma te mǎrû e ia riro te manaˈo o to hoa ei ravea no te faaore i te fifi a ore ai te reira e rahi atu â. E pinepine tera noa te tia ia rave.”—Faaueraa Bibilia: Maseli 26:20.

A feruri no “orua” eiaha no “oe” anaˈe. Te na ô ra te Bibilia: “Eiaha roa ei taata e imi i to ˈna anaˈe iho maitai, e imi râ te taata atoa i te maitai o vetahi ê atoa.” (Korinetia 1, 10:24) Ia riro to hoa faaipoipo ei tauturu eiaha râ ei enemi. Eita ïa e tupu te inoino e te tatamaˈiraa. Eita atoa ïa orua e mamû noa.—Faaueraa Bibilia: Koheleta 7:9.

Ia mamû noa na hoa faaipoipo, aita ïa e haapaohia ra ta te Bibilia aˈoraa: “E aroha râ te taata atoa i tana iho vahine, mai te aroha ia ˈna ihora, e te vahine ra ia auraro oia i tana tane.” (Ephesia 5:33) Ei taata faaipoipo, a faaoti amui eiaha e mamû noa ia tupu te fifi.