Mai te aha te huru o Iesu i teie nei

E MEA anaanatae te iteraa, e mai te aha na te huru o Iesu, e mea faufaa roa ˈtu râ ia faataa e mai te aha to ˈna huru i teie nei mahana e teihea hoi oia. Eaha te tuhaa o ta ˈna e rave ra i roto i te opuaraa a te Atua no te utuafare taata nei?

Eita te aamu o te ao nei e nehenehe e horoa mai i te mau pahonoraa. E nehenehe noa te reira e itehia i roto i te papai no ǒ mai i te Atua ra no te maitai o te feia e imi ra i te parau mau. E o te Bibilia Moˈa aore ra te mau Papai Moˈa te reira, te buka opere-rahi-roa ˈˈe-hia i roto i te aamu o te ao nei.

E ere te Bibilia i te tahi atu noa buka no ǒ mai i te taata. A faaohipahia ˈi te taata ei papai parau na ˈna, o te Atua râ te fatu mau: “[“Te mau Papai atoa, e mea faauruahia ïa e te Atua e e mea maitai ei haapiiraa, ei faahaparaa, ei faatitiaifaroraa i te mau mea, ei aˈoraa ma te parau-tia ra,” MN] ia au roa te taata no te Atua i te mau ohipa maitatai atoa ra.”—Timoteo 2, 3:16, 17.

Ua farii te aposetolo Paulo e eaha mau na te mau Papai, no te mea ua papai oia e: “A farii mai ai outou i te parau a te Atua i ta outou i ite ia matou nei, aore outou i farii ei parau na te taata, ei parau râ na te Atua.”—Tesalonia 1, 2:13.

O te Atua te Poiete puai hope o te ao taatoa e ta ˈna ra mau miria haapueraa fetia e mau miria fetia o te haapueraa taitahi. Auê ïa puai hau i te rahi e, a nehenehe ai oia e poiete i te taatoaraa o te reira! Papu e nehenehe te Puai hope o tei poiete i te ao taatoa maere roa, e riro ei fatu no te hoê buka aratai tiaturihia no te taata e imi ra i te parau mau.

Eaha ta te Bibilia e parau ra

Te faaite tahaa nei te Parau a te Atua i te mau hape o te mau haapiiraa tumu ore e te mau manaˈo hopea ore no nia ia Iesu. A tapao na vetahi mau tuhaa rii ta te Bibilia e horoa ra no nia ia ˈna:

• O Iesu anaˈe te poiete-matamua-hia e te Atua iho i nia i te raˈi e rave rahi roa matahiti i teie nei, hou te mau melahi e te ao materia taatoa. No reira oia i piihia ˈi te “Tamaiti fanau tahi” a te Atua. Mea na roto i ta ˈna Tamaiti, te ‘rave ohipa rahi’ a te Atua te hamaniraahia te mau mea atoa i poietehia, i to ˈna oraraa hou aˈe oia a riro mai ai ei taata.—Ioane 3:16; 6:38; 8:58; Maseli 8:30; Kolosa 1:16.

• Fatata e 2 000 matahiti i teie nei, ua tuu atura te Atua i te ora o Iesu i roto i te vairaa tamarii o te hoê paretenia ati Iuda, ia fanauhia mai oia ei taata. I teie nei hoi mahana, e tuuhia te tatea i roto i te vairaa tamarii, e nehenehe ïa te mau taata e rave i te tahi mea fatata hoê â huru.—Mataio 1:18; Ioane 1:14.

• Ua hau roa ˈtu â o Iesu i te hoê noa taata maitai. Ei taata paari ua faaite oia ma te tia roa i te ihotaata here, aroha, parau-tia o to ˈna Metua i nia i te raˈi, te Atua ra o Iehova.—Ioane 14:9, 10; Hebera 1:3; Ioane 1, 4:7-11, 20, 21.

• Ei tia o te Atua i nia i te fenua, ua haamâha Iesu i te mau hinaaro o te feia veve e tei haavîhia, ma te ore râ e hiˈo ê i te feia ona. Ma te turuhia e te varua moˈa puai a te Atua, ua faaora semeio o Iesu i te feia maˈi e ua faatia atoa i te feia pohe. I to ˈna raveraa i teie mau ohipa faahiahia mau, ua faaite o ˈna i nia i te hoê tuhaa haihai te ohipa o ta ˈna e rave i te fenua atoa i muri aˈe i to ˈna faatia-faahou-raahia mai te pohe mai no te ora ˈtu i nia i te raˈi e to ˈna riroraa mai ei Arii o te Basileia o te Atua.—Mataio 11:4-6; Luka 7:11-17; Ioane 11:5-45.

• O taua Basileia o te Atua ra i nia i te raˈi o ta Iesu i haapii atu i ta ˈna ra mau pǐpǐ ia pure e ia tuu na mua i roto i to ratou oraraa. “E hope roa hoi taua mau basileia ra [e vai ra i teie mahana] i te parari e e pau, e vai tera e a muri noa ˈtu.” I reira ïa, o te Basileia te faatereraa hoê roa o te fenua. O te tiaturiraa hoê roa ïa no te huitaata e hepohepo ra.—Daniela 2:44; Mataio 6:9, 10.

• O te Atua te Metua o Iesu, e ua tapea o Iesu i to ˈna haapao maitai i te Atua. No reira, i to Iesu taparahiraahia, e taata tia roa oia. Ua horoa oia ma te hinaaro tae i to ˈna ora tia roa i te Atua ra ei tusia hoo ia noaa faahou mai tei erehia ia Adamu i to ˈna orureraa i te Atua. I te na reiraraa, ua iriti Iesu i te eˈa o te ora mure ore no te feia atoa e faatupu i te faaroo i roto ia ˈna.—Ioane 3:16; Roma 3:23, 24; Ioane 1, 2:2.

• Ei Arii faatoroahia e te Atua i nia i te raˈi, e faatupu Iesu i te opuaraa a te Atua no te faaore i te ino i nia i te fenua nei e no te haamaitai i te huitaata auraro e tae roa ˈtu i te tia-roa-raa o te feruriraa e o te tino. I reira te huitaata e ora ˈi ma te hau e te oaoa i roto i te hoê paradaiso i nia i te fenua, e e mau fare maitatai e e mea rahi te maa no te taatoaraa. Ua moe ê roa te maˈi, te oto e te pohe. E faatia-atoa-hia te feia pohe e e nehenehe ratou e ora e a muri noa ˈtu i nia i te fenua.—Genese 1:26-28; 2:8; Salamo 37:10, 11, 29; Maseli 2:21, 22; Isaia 25:6; 65:21-23; Luka 23:43; Ohipa 24:15; Apokalupo 21:3, 4.

No reira, te faaite maramarama maira te Bibilia e o Iesu te taata matamua i roto i te opuaraa a te Atua no te haamau i te hoê ao apî parau-tia i ǒ nei i nia i te fenua. No te tiaraa faufaa roa o ta ˈna e rave ra, e nehenehe mau ai o Iesu e parau e: “O vau te eˈa, e te parau mau, e te ora, aore roa e taata e tae i te Metua ra, maori râ ei ia ˈu.”—Ioane 14:6; Petero 2, 3:13.

Te hoê faatere î i te aroha

Te hinaaro nei te feia haehaa ia Iesu ei faatere no ratou i roto i te ao apî, e auê oia e i te mea taa ê e te au rahi ei faatere! Ua riro te mau ohipa faaoraraa maere o ta ˈna i rave a parahi ai i te fenua ei ravea no te faaite i te reira. (Mataio 15:30, 31) A tapao atoa râ, to ˈna huru ei faatere a muri aˈe.

A hiˈopoa na mua i te pueraa ohipa a te mau faatere o teie nei ao. Te faaite ra te aamu e i te roaraa o te tau, pinepine ratou i te mea taehae e te aroha ore, i te faaôraa i to ratou taata i roto e rave rahi tamaˈi, peu taehae, titorotororaa uˈana e taparahiraa taata. I teie 20raa o te senekele anaˈe, hau aˈe i te 100 mirioni taata tei taparahihia i roto i te mau tamaˈi.

Mea taa ê roa te huru e te pueraa ohipa a te mau faatere o te ao nei i te huru e te pueraa ohipa a Iesu i roto i to ˈna mau auraa e te feia veve, te feia e haavîhia ra, te feia rii: “E ia hiˈo aˈera oia i te rahi o te taata, aroha ˈtura oia ia ratou, no te mea, ua purara ratou e ua faarue-taue-hia, mai te mamoe tiai ore ra.” I parau ai oia ia ratou e: “E haere mai outou ia ˈu nei, e te feia atoa i haˈa rahi, e tei teiaha i te hopoia, e na ˈu outou e faaora. A rave mai i tau zugo i nia ia outou, e ia haapiihia outou e au, te mǎrû nei hoi au e te haehaa o te aau: e e noaa hoi te ora i to outou [nephe]. Te mǎrû nei hoi ta ˈu zugo e te mâmâ nei ta ˈu hopoia.”—Mataio 9:36; 11:28-30; MN.

Ua aroha mau â o Iesu i te taata! Mea na reira oia i pee ai i te huru o to ˈna Metua i nia i te raˈi. O Iesu te huru iho o te here, e ua haapii oia i ta ˈna mau pǐpǐ i te here mau, te here o tei niuhia i nia i te mau faaueraa tumu, no te tahi e te tahi. Eita ïa ratou e vaiiho i te opu, te nunaa, te tiaraa totiale, te haapaoraa tahito aore ra te tahi noa ˈˈe mea ia haafifi i to ratou autahoêraa na te ao taatoa. (Ioane 13:34, 35; Ohipa 10:34, 35) Oia mau, ua here Iesu i te taata e ua tae roa oia i te horoa i to ˈna ora no ratou. (Ephesia 5:25) Oia te huru faatere e hinaarohia ra e o tei noaahia mai e te ao nei.

Iesu e Arii “maitai rahi” i teie nei

E tauturu mai te Parau tohu a te Atua ia taa tatou e, i teie nei e Arii puai o Iesu i nia i te raˈi. Ua tohu te taata papai salamo no nia ia ˈna e: “E maitai rahi to oe i to te tamarii atoa a te taata nei: . . . e ma to mana ra, a horo ai ma te maitai, ei faatupu i te parau mau, e te mǎrû, e te parau-tia; . . . I hinaaro oe i te parau-tia, e te riaria ra oe i te ino; i faatahinu ai te Atua, to Atua ra, ia oe, i te monoˈi ra i te oaoa e hau ê atura i to mau hoa ra.”—Salamo 45:2, 4, 7.

Ei Arii faatavaihia e te Atua i nia i te raˈi, ua faauehia Iesu ia ohipa no te faaite i to ˈna here i te parau-tia e to ˈna au ore i te ino. Te faataahia ra hoi o ˈna i roto i te Bibilia mai te hoê o te ore e pohe e o te upootia mai, te “Arii o te mau Arii,” e fatata ra i te haamou i te mau enemi atoa a te Atua. Hau atu, na ˈna e faariro i te fenua ei paradaiso e e haamaitai i te huitaata ia fanaˈo i te ora i te huru tia roa.—Apokalupo 19:11-16.

E ere ïa te tiaraa apî o Iesu i te ‘Mesia e mauiui ra’ tamatahia, tairihia e taparahihia e te mau enemi. Maoti râ, teie to ˈna tiaraa apî ei “Atua puai,” te faatere o te fenua. (Isaia 9:6) E ere te reira i te parau apî popou no te rahiraa o te mau faatere taata nei, no te mea fatata to ratou mau basileia i te mou, mai tei faaite-atea-hia e Daniela 2:44. Ma te rave ia Iesu ei faatupuraa i ta ˈna utua, na te Atua “e tairi i te hui arii ia tae i te mahana e riri ai oia ra; e haava oia i ǒ te mau [nunaa] ra.”—Salamo 110:5, 6; MN.

Ua tohu o Isaia e i te na reiraraa, te Mesia e ‘faahitimahuta i te mau nunaa e rave rahi; e mamû hoi te vaha o te hui arii i mua ia ˈna.’ No te aha? No te mea “e ite hoi ratou i tei ore i faaitehia ˈtu ia ratou ra [e to ratou mau hoa faaroo]; e tei ore i itea e ratou ra, o ta ratou ïa e imi.”—Isaia 52:15.

‘Te ootiraa i te puahiohio’

Ua tohu o Isaia i te haapao-ore-raa te mau aratai haapaoraa i to ratou toroa. Ei hiˈoraa, aita ratou e haapii ra i te parau mau o te Bibilia, te haapii nei râ ratou i to ratou mau taata i te mau haapiiraa e ere to roto i te mau papai no nia i te haamauiuiraa mure ore i roto i te po auahi ura, te toru tahi no nia e toru atua i roto i te hoê, e te pohe-ore-raa o te nephe—no ǒ mai pauroa i te mau etene. E ua turu te upoo faatere haapaoraa i te mau tamaˈi atoa a to ratou mau nunaa, e noa ˈtu e taparahi-pohe-hia te taata e hoê â faaroo e to ratou. E ofatiraa papu teie i te mau faaueraa a te Atua.—Ioane 1, 2:3, 4; 3:10-12; 4:8, 20, 21.

Te pǔpǔ atoa ra te upoo faatere haapaoraa na to ratou feia te mau hohoˈa faaroo, te mau ahu auperepitero, te mau fare pure moni rahi e te mau peni faanehenehehia e te mau mea etene, oia atoa te hei anaana o te atua mahana, mau mea nehenehe ia mataitai e mea faufaa ore râ i te mata o te Atua. Noa ˈtu ïa te faaueraa a te Atua i ta ˈna mau tavini: “A haere, a haere, haere outou i rapae; eiaha e rave noa ˈtu i te mea viivii ra; . . . outou, e tei hopoi i te mau farii a Iehova ra!”—Isaia 52:11; Korinetia 2, 6:14-18.

E ooti te feia o te faahua e mau tia ratou no te Atua e o te ofati nei râ i ta ˈna mau faaueraa e o te haapii ra ia vetahi ê ia rave i te hoê â mea, i ta ratou e ueue. E haavahia ratou ei enemi e e aufau ratou i te hoo ia haamou-anaˈe-hia teie faanahoraa o te mau mea. Mai ta te peropheta ra o Hosea i parau, “ua ueue ratou i te mataˈi e ua ooti i te puahiˈohiˈo.”—Hosea 8:7, hiˈo atoa Apokalupo 17:1-3, 15, 16.

E haapii te feia mafatu tae i te parau mau

Eita te faahohoˈaraa tano ore a te upoo faatere haapaoraa no nia i te Atua e no nia ia Iesu e tapea i te feia mafatu tae ia ite i te parau mau no nia ia Iesu. I te senekele matamua, aita i na reirahia, no te mea ua papai o Paul Barnett i roto i The Two Faces of Jesus, “e ere te Mesia e taata e ouˈa e ta ˈna fare amarara mai te raˈi mai i roto i te aamu, ma te ore e faaite-haere-hia.” Oia mau, mai tahito, ua ‘faaite haere’ ma te tano te mau parau tohu a te Bibilia i te Mesia, ma te horoa na ta ˈna mau pǐpǐ haavare ore te haapapuraa no to ˈna haereraa mai. I teie mahana, ua hau atu â te mau haapapuraa o te faaite haere ra i te mea e ua haamanahia o Iesu e te Atua no te arii ei “Arii o te mau Arii” hanahana i nia i te raˈi.—Mataio 24:3-13; Timoteo 2, 3:1-5, 13.

Parau mau, “e parau-haere-hia te evanelia o te basileia nei [o te Atua e o te Mesia te faatere] e ati noa ˈˈe teie nei ao, ia ite te mau fenua atoa: o te hopea ihora ïa i reira ra.” (Mataio 24:14) Te ravehia ra te reira e te mau Ite no Iehova, e ua hau atu ratou i te pae mirioni na te ao nei. No reira, te feia o te hinaaro e ite i te Iesu mau, e nehenehe mau â ratou. (Ioane 10:14; Ioane 1, 5:20) E mea faufaa te iteraa e oia atoa te auraroraa ia ˈna no te ora mai mai roto mai i “te ati rahi” e fatata ra i te tairi i te fenua nei.—Apokalupo 7:9-14; Ioane 17:3; Tesalonia 2, 1:6-10.

E oaoa ïa te mau Ite no Iehova ia tauturu atu ia oe no te hiˈopoa i te hohoˈa au-roa-hia a te Bibilia no nia i te Tamaiti a te Atua.

[Hohoˈa i te api 9]

E haamou te Mesia haamanahia e te Basileia i te ino

[Hohoˈa i te api 10]

I raro aˈe i te faatereraa aroha a te Mesia, e riro teie fenua ei paradaiso