Ia here anaˈe te mau taata atoa te tahi i te tahi

I ROTO i ta ˈna Aˈoraa i nia i te Mouˈa, ua faaite o Iesu Mesia i te taime e here ai te mau taata atoa te tahi i te tahi. Ma te faaomua i ta ˈna mau parau, ua faahiti o Iesu i te Salamo 37, e na ô ra e: “E ao to tei mǎrû: e noaa hoi ia ratou te fenua.” Te faataa atoa ra taua salamo a te Bibilia ra nafea teie ohipa faahiahia e tupu ai, ma te parau e: “E tâpû-ê-hia te feia ohipa ino; te feia râ e tiai ia Iehova ra, no ratou ïa te fenua.”—Mataio 5:5; Salamo 37:9; American Standard Version.

Auê ïa tauiraa faahiahia mau e—e faaorehia te feia iino atoa i te fenua nei e o te feia anaˈe e here ra te tahi i te tahi te toe mai! Nafea ïa te reira e tupu ai? Ua faahaere â o Iesu i ta ˈna aˈoraa tuiroo i mua no te faaite nafea, i to ˈna haapiiraa ia tatou ia pure e: “Ia tae mai to oe ra basileia. Ia tupu to oe hinaaro, mai i nia i te raˈi, i te fenua nei atoa.” (Mataio 6:10, AS) A tapao na ihea te hinaaro o te Atua e tupu ai. E ere noa ïa i nia i te raˈi. “Te pure nei tatou, ia tupu to oe hinaaro i te fenua nei, mai i nia i te raˈi atoa,” o ta te hoê ïa tumu parau i roto i te vea ra The Christian Century i haamatara.

No reira, eaha ïa te Basileia o te Atua ta Iesu i haapii ia tatou ia pure? Papu maitai e e faatereraa mau te reira, o te faatere mai te raˈi mai. No reira oia i parauhia ˈi “te basileia o [“te raˈi,” MN].” (Mataio 10:7) O Iesu Mesia, te Tamaiti a te Atua, te Faatere maitihia o teie Basileia, aore ra faatereraa.

Na mua roa ˈˈe a fanau mai ai o Maria ia Iesu, ua tohu te peropheta a Iehova, o Isaia i taua ohipa semeio ra e i tei tupu atoa i muri iho: “Ua fanauhia mai te hoê tǎmǎ na tatou, ua horoahia mai te hoê tamaiti na tatou; ei nia i to ˈna ra tapono te faatereraa e vai ai: e mairihia to ˈna iˈoa, ia Hau ê, e Aˈo, te Atua Puai, te Metua Mure ore, te Arii no te Hau. E te tupuraa o ta ˈna faatereraa i te rahi e to ˈna hau, aita ïa e hopea.” (Isaia 9:6, 7, AS) I muri aˈe i te poheraa e te tia-faahou-raa o Iesu, ua parahi oia i pihai iho i to ˈna Metua i nia i te raˈi, a tiai noa ˈi i te faaueraa ia haamata i te faatere ei Arii.—Salamo 110:1, 2; Hebera 10:12, 13; Apokalupo 11:15.

Eaha ïa te roohia i te pae hopea i nia i teie ao tei î i te riri? A tapao na i te pahonoraa a te Bibilia i taua uiraa ra. Ua tohu te peropheta a te Atua, o Daniela e: “Ia tae i te anotau o taua mau arii ra, e faatupu ai te Atua o te raˈi ra i te hoê basileia, o te ore roa ïa e mou, e ore roa hoi e riro ia vetahi ê; e hope roa hoi taua mau basileia ra i te parari e e pau, e vai tera e a muri noa ˈtu.”—Daniela 2:44.

Papu maitai, te faaite atea ra te parau tohu a te Bibilia i te hoê tauiraa rahi i roto i te mau ohipa a te taata nei. E faaorehia teie faanahoraa taatoa o te mau mea, tae noa ˈtu te feia o teie nei ao e patoi uˈana ra i te auraro i te faatereraa a te Atua, i te fenua nei! A feruri na i tei mono i te reira.

Te oraraa i roto i te hoê ao apî parau-tia

Ia ore anaˈe te ao tahito, te vai ra o te ora mai. Te faataa ra te Bibilia e: “Te mou nei hoi teie nei ao, e ta to te ao atoa e hinaaro nei; o tei haapao râ i to te Atua ra hinaaro, e tia ïa i te oraraa e a muri noa ˈtu.” (Ioane 1, 2:17) Oia, e ora ˈtu te feia e rave ra i te hinaaro o te Atua i roto i te hoê ao apî, mai ia Noa e to ˈna utuafare i ora ˈtu i te hopea o te ao o to ratou ra tau. Ua papai te aposetolo Petero e: “Te tatari nei . . . tatou i te raˈi apî e te fenua apî ta [te Atua] i parau maira, i te vai-mau-raa o te parau-tia ra.”—Petero 2, 3:5-7, 11-13.

No nia i te taime e ohipa ˈi te faatereraa hoê roa, oia hoi te Basileia o te Atua, te tǎpǔ ra te Bibilia e: “E parahi te feia parau-tia i nia i te fenua, e parahi tamau â ratou i reira.” (Salamo 37:29) E fanaˈo te feia parau-tia i te ora i nia i te hoê fenua i tamâhia. Auê ïa taime hanahana e! Mai te peu e aita outou i na reira ˈtura, a hiˈopoa na ïa i te mau haamaitairaa i faataahia i roto i te Bibilia, o tei faahohoˈahia i te mau api na mua ˈtu.

Aita anei outou e tamahanahanahia ra ia ite e te tǎpǔ maira to tatou Poiete i taua mau ohipa faahiahia ra no te maitai o te feia e haamori ra ia ˈna? Oia mau, te reira hoi te opuaraa a te Atua i to ˈna poieteraa i na feia faaipoipo matamua e to ˈna tuuraa ia raua i roto i te hoê paradaiso i nia i te fenua! A tapao na i ta te Atua i parau atu ia raua: “Ia fanau orua, e ia rahi roa, e faaî i te fenua nei, e e haavi iho; e ia mana orua i nia iho i te iˈa o te tai, e i nia iho i te mau manu o te reva, e i nia iho i te mau mea atoa e nee haere i nia iho i te fenua nei.”—Genese 1:27, 28.

E tia ia Adamu e ia Eva ia fanau i te tamarii, e a paari mai ai ratou, e tia ia ratou ia apiti atoa i roto i te ohipa au ra e atuatu i te Paradaiso i te fenua nei. A feruri na i te oaoa ia faanuu atu â i te mau otia o te ô i Edene a rahi mai ai te fetii taata nei! Papu maitai e te opuaraa a te Atua, ia riro mai ïa te fenua taatoa nei ei paradaiso. E tupu anei taua opuaraa ra? E nehenehe tatou e tiaturi e e tupu, no te mea na te Atua iho i parau! Te tǎpǔ ra oia e: “O ta ˈu i parau ra, . . . na ˈu ïa e rave.”—Isaia 46:11; 55:11.

E hinaaro anei outou e ora e a muri noa ˈtu i roto i te hoê Paradaiso i te fenua nei, tei faataahia i roto i te mau irava i faahohoˈahia i te mau api na mua ˈtu? Parau mau, eita e faatiahia i te taatoaraa ia ora i reira e a muri noa ˈtu. Te vai ra te mau titauraa. Eaha ïa?

Te faaîraa i te mau titauraa no te ora e a muri noa ˈtu

Na mua roa, e tia i te feia e ora i roto i te ao apî a te Atua, ia haapii i te here te tahi i te tahi, mai ta te Atua i haapii mai ia tatou. Te na ô ra te Bibilia e: “Ua haapiihia hoi outou iho e te Atua i te [“here,” MN] ia outou iho.” (Tesalonia 1, 4:9) Nafea te Atua ia haapii ia tatou i te reira?

Na roto iho â ïa i ta ˈna Parau papaihia, te Bibilia. No reira, no te ora e a muri noa ˈtu, e tia ïa ia tatou ia farii i te mau haapiiraa a te Atua i roto i te Bibilia. Teie ta te hoê taata no te pae Hitia o te râ, o te haapii ra i te Bibilia, i parau: “Te tiai nei au i te taime, mai ta te Bibilia e tǎpǔ maira, i reira te mau taata atoa e haapii ai i te here te tahi i te tahi.”

I to ˈna pureraa i to ˈna Metua, ua faataa o Iesu i te hoê titauraa faufaa roa. Teie ta ˈna i parau: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioane 17:3) E tauturu te buka rairai e 32 api Eaha ta te Atua e titau ra ia tatou? ia outou ia noaa mai taua ite ra. E noaa mai ta outou buka rairai na roto ïa i te faaîraa i te tuhaa faataahia i te api 32 e i te haponoraa ˈtu i te amaa a te Taatiraa “Te mau Ite no Iehova,” B.P. 7715, 98719 Taravao, Tahiti, aore ra i te hoê o te mau vahi nohoraa i te api 5.

[Tumu parau tarenihia/Hohoˈa i te api 18-20]

Ta te Atua e tǎpǔ ra

Te here autaeae na te ao nei

“E ore te Atua e haapao i te huru o te taata. O tei mǎtaˈu ra ia ˈna, e o tei rave i te parau-tia i te mau fenua atoa ra, o te itehia mai ïa e ana.”—Ohipa 10:34, 35.

Aita e ohipa ino aore ra e tamaˈi faahou

“E tâpû-ê-hia ra te paieti ore i te fenua nei, e te feia i rave i te hara ra, e taihitumuhia ïa.”—Maseli 2:22.

“Ua faaore [te Atua] i te tamaˈi e tae roa aˈenei i te hopea fenua!”—Salamo 46:9.

E pue te maa maitatai e amu

“E riro hoi e maa sitona tei te fenua i nia i te tupuai o te mau mouˈa ra.”—Salamo 72:16.

Te hau i rotopu i te taata e te mau animala

“Ei reira te luko e parahi atoa ˈi raua o te arenio; e te nemera e te pinia mamoe, e apiti atoa ïa i te taotoraa; . . . e na te hoê tamaiti iti e aratai.”—Isaia 11:6.

E faaorehia te maˈi, te ruhiruhiaraa, e te pohe

“Na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”—Apokalupo 21:4.

Te hoê tia-faahou-raa i nia i te fenua o te feia here i pohe

“Te fatata mai nei hoi te hora e faaroo ai te feia atoa i roto i te apoo [“haamanaˈoraa,” MN] ra i [to Iesu] reo, e e haere mai i rapae.”—Ioane 5:28, 29.