‘Aita mâua e ora faahou nei no mâua noa iho’

Faatiahia E Jack Johansson

Ua faaue mai te hoê faehau no Malawi, i Afirika, ia ˈu ia tia i te hiti anavai i mua i te mau mori o te pereoo Land Rover. A amo ai te faehau i ta ˈna pupuhi i nia, ua horo maira o Lloyd Likhwide i te hiti anavai e tia maira i mua ia ˈu. Ua taparu atura oia e: “A pupuhi ia ˈu! A pupuhi ia ˈu! Eiaha râ teie taata ê, aita hoi oia i rave i te ohipa ino!” No te aha te hoê taata no Afirika i ineine ai i te pohe no ˈu, te hoê taata no Europa? E faataa ˈtu ïa vau nafea to ˈu riroraa mai ei mitionare i Afirika fatata e 40 matahiti aˈenei.

I TE matahiti 1942, e iva matahiti noa ïa to ˈu, ua pohe to ˈu metua vahine, ma te vaiiho mai ia Papa e na tamarii e pae. O vau te tamarii hopea. E maha avaˈe i muri iho, ua pohe o Papa, hoê o te mau Ite no Iehova matamua no Filelane, ua paremo hoi oia. Na to ˈu tuahine matahiapo ïa o Maja i haapao ia matou, e ua nehenehe matou e tapea mai i ta matou vahi faaapuraa. Ua haapao atoa o Maja i te mau ohipa i te pae varua, e hoê matahiti i muri aˈe i te poheraa o Papa, ua faataipe o ˈna e hoê o to ˈu mau taeae i to raua pûpûraa i te Atua ra o Iehova na roto i te bapetizoraa i roto i te pape. Hoê matahiti i muri iho, ua bapetizohia vau, i te 11raa o to ˈu matahiti.

Te hoê faaotiraa faufaa roa

I te hoperaa ta ˈu tau haapiiraa i te hoê fare haapiiraa tuatoru tapihoo i te matahiti 1951, ua rave au i te ohipa no te Taiete Ford Motor i Filelane. E ono avaˈe i muri iho, ua pûpû mai te hoê Ite no Iehova ratere feruriraa paari i te tahi mea maere. Ua ani mai oia ia ˈu ia hohora i te hoê oreroraa parau i te hoê tairururaa no nia i te mau haamaitairaa o te taviniraa pionie, aore ra ma te taime taatoa. Ua huru ê rii au, i te mea hoi e te rave ra vau i te ohipa ma te taime taatoa no teie nei ao e eita roa ˈtu ïa vau e nehenehe e paraparau ma te manaˈo papu. Ua pure atura vau ia Iehova no nia i taua ohipa ra. Ua taa ia ˈu e ‘eiaha’ te mau Kerisetiano ia “ora faahou no ratou noa iho, no ˈna râ o tei pohe no ratou,” no reira ïa vau i faaoti ai e taui i ta ˈu mau fa matamua no te tavini ei pionie.—Korinetia 2, 5:15, MN.

Ua tǎpǔ mai ta ˈu paoti ohipa e e tataipiti oia i ta ˈu moni ohipa ia ore au e faarue i te taiete. I muri iho, i to ˈna iteraa e ua rave au i ta ˈu faaotiraa, ua na ô maira oia e: “Ua rave oe i te faaotiraa maitai. Ua ohipa noa na vau i ǒ nei i roto i teie piha ohipa i te roaraa o to ˈu oraraa, e ehia rahiraa taata ta ˈu i tauturu mau na?” No reira, i te avaˈe Me 1952, ua riro mai au ei pionie. Tau hebedoma i muri iho, ua nehenehe au e hohora i ta ˈu oreroraa parau no nia i te taviniraa pionie ma te manaˈo papu maitai.

I muri aˈe i to ˈu taviniraa ei pionie tau avaˈe noa, ua faautuahia vau e ono avaˈe fare tapearaa no to ˈu tiaraa amui ore Kerisetiano. I muri iho, ua tapea-faahou-hia vau e vau avaˈe e te tahi atu mau Ite apî i nia i te motu no Hästö-Busö, i te Ooa no Filelane. Ua mairi matou i teie motu i te iˈoa ra Gileada Iti, no te mea ua faanahonaho matou i te hoê porotarama haapiiraa Bibilia rahi na matou. Ta ˈu râ opuaraa, e haere ïa i Gileada mau, te Haapiiraa no Gileada a te Taiete Watchtower, i pihai iho ia South Lansing, i New York.

A tapea-noa-hia ˈi au i nia i te motu, ua faatae mai te amaa a te Taiete Watch Tower i te hoê rata na ˈu, o tei ani mai ia tavini au ei Ite no Iehova ratere. I to ˈu matararaa mai, ua tia ia ˈu ia tere na te mau amuiraa i te tuhaa fenua reo Tuete no Filelane. I taua taime ra, e 20 matahiti noa ïa to ˈu e ua manaˈo vau e eita e maraa ia ˈu, tera râ, ua tuu vau i to ˈu tiaturiraa i nia ia Iehova. (Philipi 4:13) Mea maitai roa te mau Ite i roto i te mau amuiraa ta ˈu i haapao, aita roa ˈtu ratou i hiˈo ino mai ia ˈu no te mea “e tamaiti iti” noa vau.—Ieremia 1:7.

I to ˈu tereraa ˈtu i te hoê amuiraa i te matahiti i muri iho, ua farerei au ia Linda, o tei haere mai e faafaaea i Filelane mai te mau Hau Amui mai. I muri aˈe i to ˈna hoˈiraa i te mau Hau Amui no Marite, ua haere oioi oia i mua i te pae varua. Aita i maoro, ua bapetizohia oia. Ua faaipoipo atura mâua i te avaˈe Tiunu 1957. I muri iho, ua titau-manihini-hia mâua i te 32raa o te pûpû Haapiiraa no Gileada, i te avaˈe Setepa 1958. I muri aˈe i te noaaraa ta mâua parau tuite i te avaˈe Febuare, ua tonohia mâua i Nyassaland, o Malawi i teie nei, i te pae apatoa hitia o te râ no Afirika.

Ta mâua taviniraa i Afirika

Mea au roa na mâua e haere i roto i te taviniraa i mua i te taata e to mâua mau taeae no Afirika, tei hau atu i te 14 000 i taua tau ra i Nyassaland. I te tahi mau taime, ua tere mâua na nia i te pereoo Land Rover, ma te tari i te mau mea faufaa atoa ta mâua e hinaaro. Ua faaea mâua i roto i te mau oire iti aita hoi te hoê taata uouo i haere aˈenei i reira, e ua farii-maitai-noa-hia mâua. Ia tapae atu mâua i te hoê oire iti, e haere pauroa mai te taata e hiˈo ia mâua. Ia oti matou i te aroha ma te faatura, e parahi ratou i raro ma te mamû a mataitai noa mai ai ia mâua.

E pinepine te feia no te oire iti i te hamani i te hoê fare nainai no mâua noa, i hamanihia i te tahi mau taime i te vari aore ra i te aeho e e navai noa no te taoto. Ua horo mai te mau hyène na pihai iho i te fare nainai i te po, a uuru noa ˈi i te mau uururaa riaria i pihai iho noa i to mâua upoo. Aita râ i maoro, ua faaruru te mau Ite no Nyassaland i te mau puai atâta roa ˈˈe i te mau animala taehae.

Te fifi o te here aiˈa

E ati aˈe ia Afirika, e mea puai te mau pǔpǔ tiamâ. I Nyassaland, ua titauhia i te taatoaraa ia amui atu i roto i te pǔpǔ politita hoê roa e vai ra i reira. Ua riro taue maira to matou tiaraa amui ore ei fifi rahi no te aiˈa. Na ˈu hoi e haapao ra i taua taime ra i te tuhaa faanahonahoraa, i te mea hoi e ua reva ta matou tiaau no te amaa, o Malcolm Vigo. Ua ani au e farerei ia Taote Hastings Kamuzu Banda, te faatere hau nui no Nyassaland. Ua faataa ˈtura vau e e piti matahiapo Kerisetiano ê atu, ia ˈna i to matou tiaraa amui ore, e ua faaoti maitai te putuputuraa. Noa ˈtu te reira, fatata hoê avaˈe i muri iho, i te avaˈe Febuare 1964, o Elaton Mwachande te taata matamua i faaruru i te hamani-ino-raa—ua patia-pohe-hia oia i te omore e te hoê nahoa taata i riri. Ua tia i te tahi atu mau Ite o to ˈna oire iti ia horo ê.

Ua faatae atura matou i te hoê poroi ia Taote Banda ra, no te ani ia ˈna ia faaohipa i to ˈna mana no te tapea i taua haavîraa uˈana ra. Aita i maoro, ua taniuniuhia mai au mai te piha ohipa mai a te faatere hau nui, o te titau maira ia ˈu. Ua haere atura vau e te tahi atu mitionare, o Harold Guy, e te hoê Ite no reira, o Alexander Mafambana, e farerei ia Taote Banda. To reira atoa e piti faatere hau.

I to matou iho â parahiraa, ua tahirihiri atura o Taote Banda, ma te ore e paraparau, i te poroi i muri e i mua na nia i to ˈna upoo. I te pae hopea, ua parau atura oia e: “E Johansson Tane, eaha ta oe i hinaaro i to oe haponoraa mai i te hoê poroi mai teie?” Ua faataa faahou atura matou ia ˈna i to matou tiaraa amui ore i te pae politita, e ua na ô atoa vau e: “No reira i teie nei, no te taparahi-pohe-raahia o Elaton Mwachande, o oe anaˈe ïa te nehenehe e tauturu mai ia matou.” E au ra e ua au o Taote Banda i tera parau e ua topa rii to ˈna hau.

Tera râ, ua parau te hoê o na faatere hau i reira e aita te mau Ite i roto i te hoê oire atea e turu ra i te mana faatere no taua vahi ra. Ua faahiti atoa te piti o te faatere hau i te tahi atu oire atea, ma te faahapa e ua paraparau te mau Ite i reira no nia ia Taote Banda ma te faatura ore. Aita râ raua i nehenehe e faaite mai i te iˈoa o te feia i na reira. Ua faataa ˈtura matou e ua haapii-noa-hia te mau Ite no Iehova ia faatura i te mau mana faatere. Tera noa râ, aita ta matou mau tutavaraa no te faatitiaifaro i te mau manaˈo hape o Taote Banda e to ta ˈna mau faatere hau, i manuïa.

Ua fifihia to mâua ora

I te matahiti 1964, ua tiamâ mai te fenua Nyassaland e ua riro maira i muri iho te Repubilita no Malawi. Ua tamau noa ta matou ohipa pororaa mai tei matauhia, i roto râ i te faateimaharaa rahi roa. I taua taime ra, ua taniuniu mai te mau Ite no te pae apatoa o te fenua, no te faaara mai e ua tupu te hoê orureraa hau politita i reira. Ua taa ia matou e e tia i te hoê taata ia haere oioi e hiˈo i te huru tupuraa o te mau Ite e ia horoa i te tauturu i te pae morare. Ua haere aˈena vau o vau anaˈe na roto atu i te uruaihere, e ua farii hoi o Linda i te reira ma te itoito. I taua râ taime ra, ua taparu oia ia ˈu ia rave atoa i te hoê Ite apî no reira, ia Lloyd Likhwide. Ua farii atura vau i te pae hopea, ma te manaˈo e, ‘Mai te peu e e topa rii to ˈna hau ra, e na reira ïa vau.’

Ua parauhia mâua e e tia ia mâua ia rave i te pahi no te haere i te tahi pae mai o te anavai hou te opaniraa e hahaere i te hora 6 i te ahiahi. Ua tutava mâua i te tapapa i te pahi i taua taime ra, ua taerehia râ mâua no te mau purumu iino. No muri iho noa to mâua faarooraa e ua faauehia e pupuhi i te taata atoa i to mâua nei pae anavai i muri aˈe i te hora ono. A tere noa ˈi mâua i raro atu i te anavai ra, ua ite atura mâua e ua tae aˈena te pahi i te tahi pae mai. Ua tuô atura o Taeae Likhwide ia haere mai e tii ia mâua. Ua tere maira te pahi, ua tuô maira râ te hoê faehau i nia i te pahi e: “E tia ia ˈu ia pupuhi i te taata uouo!”

I te omuaraa, ua manaˈo vau e e haavare haamǎtaˈuraa noa tera, te piriraa mai râ te pahi, ua faaue maira te faehau ia ˈu ia tia i mua i te mau mori o te pereoo. I reira ïa to to ˈu hoa Afirika hororaa mai i ropu ia mâua, a taparu ai i te faehau ia pupuhi ia ˈna eiaha râ ia ˈu. E au ra e ua maere roa te faehau i to ˈna ineineraa i te pohe no ˈu, e ua tuu atura oia i ta ˈna pupuhi i raro. Ua manaˈo atura vau i te mau parau a Iesu e: “Ia horoa te taata i to ˈna iho ora no to ˈna ra mau taua, aita roa e taata aroha ê atu i tei reira.” (Ioane 15:13) Auê hoi au i te oaoa i to ˈu faarooraa i te aˈoraa a Linda e rave i taua taeae here ra!

I te mahana i muri iho, ua paruru te tahi feia apî i te purumu o te haere atu i Blantyre, ua ani mai ratou i te tareta melo pǔpǔ a Taeae Likhwide. Hoê anaˈe ohipa e rave—te na rotoraa ˈtu ïa i te nahoa taata e ma te haavitiviti! Ua turai aˈera vau i te tauiraa, tere puai atura te pereoo, hitimahuta ihora ratou e ora mai nei mâua. Ahiri tera mau taata i tapea ia Taeae Likhwide, e haapohehia paha ïa oia. I to mâua tapaeraa ˈtu i te amaa, te ruru roa ra mâua, ua mauruuru atoa râ ia Iehova no To ˈna parururaa mai ia mâua.

Tapeahia no to ratou faaroo

Ua opanihia ta matou ohipa i mua i te ture i Malawi i te avaˈe Atopa 1967. I taua tau ra, tau 18 000 Ite i reira. E piti hebedoma i muri iho, ua faaroo atura matou e ua tapeahia e 3 000 Ite i te oire pu no Lilongwe. Ua faaoti atura matou e tere atu i reira i te po, e 300 kilometera i te atea, no te turu-noa-raa ˈtu ia ratou i te pae morare. Ua faaî aˈera matou i te pereoo Land Rover i te mau papai a te Watchtower e, auaa hoi o Iehova, ua tere atu matou na nia i te mau purumu e rave rahi tei opanihia ma te ore e hiˈopoahia. I te roaraa o te purumu, i tera e tera amuiraa, ua vaiiho matou i te mau afata maa pae varua i te taime au.

I te poipoi, ua tere atu matou i te fare tapearaa. Auê hoi e! Ua ûa noa i te po taatoa, e ua vaiihohia to matou mau taeae e tuahine Kerisetiano i rapaeau i roto i te hoê aua. Ua rari roa ratou, e ua tamata vetahi i te haamǎrô i to ratou mau paraitete i nia i te aua. Ua nehenehe matou e paraparau i vetahi na roto atu i te aua.

Ua haavahia ratou i te hora ahuru ma piti, e e rave rahi mau taata faahua Ite tei uiuihia i mua i te tiribuna. Ua tamata matou i te hiˈo atu i to ratou mata, e mata peapea ore râ to ratou. Ua horuhoru roa matou i te mea hoi e ua taiva te feia atoa i uiuihia i to ratou faaroo! Ua faaroo râ matou e aita te mau Ite no reira i matau i te feia atoa i parau e ere ratou faahou i te mau Ite no Iehova. E au ra e e tutavaraa te reira no te haaparuparu i te mau Ite mau.

I taua taime atoa ra, ua faauehia e tiahi ia matou. Ua haruhia ta matou amaa i Blantyre, e ua horoahia e 24 hora i te mau mitionare ra no te faarue mai i te fenua. Auê te maere i to te hoê mutoi iritiraa i te opani no matou i to matou hoˈiraa i te fare! I te avatea i muri iho, ua haere maira te hoê mutoi e, ma te tatarahapa rii, ua tapea e ua faahoro atura ia matou i te tauraa manureva.

Ua faarue matou ia Malawi i te 8 no Novema 1967, ma te ite e te faaruru ra to matou mau taeae Kerisetiano i reira i te tamataraa uˈana. Ua mauiui to matou mafatu no ratou. E rave rahi o tei pohe; tau hanere tei faaruru i te mau haamauiuiraa uˈana; e tau tausani tei erehia i ta ratou ohipa, to ratou fare, e ta ratou mau taoˈa. Noa ˈtu râ, ua tapea fatata te taatoaraa i to ratou taiva ore.

Te mau tuhaa fenua apî

Noa ˈtu te mau ati, aita roa ˈtu mâua i manaˈo e faarue i te ohipa mitionare. Ua farii râ mâua i te hoê tuhaa fenua apî—o Kenya, te hoê fenua ua rau te hohoˈa o te fenua e te taata. Ua anaanatae roa o Linda i te mau Masai. I taua tau ra, aita e Ite no Iehova Masai. Ua farerei râ o Linda ia Dorcas, te hoê vahine Masai, e ua haamata i te haapii i te Bibilia e o ˈna.

Ua ite o Dorcas e ia au mai te Atua ia ˈna, e tia ïa ia ˈna ia haamana i to ˈna faaipoiporaa. Aita te metua tane o ta ˈna na tamarii e piti i farii, ua tutava noa ïa o Dorcas i te haapao o ˈna anaˈe i ta ˈna mau tamarii. Ua riri roa te tane i te mau Ite, ua peapea râ oia i to ˈna faataa-ê-raahia i to ˈna utuafare. I te pae hopea, no to Dorcas onoono-noa-raa, ua haapii atoa ˈtura oia i te Bibilia e te mau Ite no Iehova. Ua faatitiaifaro atura oia i to ˈna oraraa, ua riro maira ei Ite, e ua faaipoipo atura raua o Dorcas. Ua riro maira o Dorcas ei pionie, e ta ˈna tane e ta raua tamaiti matahiapo, e mau matahiapo ïa a te amuiraa i teie nei.

I te matahiti 1973, ua opani-taue-hia te ohipa a te mau Ite no Iehova i Kenya, e ua tia ia mâua ia reva. Tau avaˈe noa i muri iho te faaoreraahia te opaniraa. I taua râ taime ra, ua faaitehia mai te toru o ta mâua tuhaa fenua—o Congo (Brazzaville). Ua tae mâua i reira i te avaˈe Eperera 1974. Fatata e toru matahiti i muri iho, ua faahapa-hape-hia matou te mau mitionare ei feia tamoemoe, e ua opanihia ˈtura ta matou ohipa. Taa ê atu i te reira, ua tupu te aroraa i Brazzaville i muri aˈe i to te peretiteni o te fenua taparahi-pohe-raahia. Ua tonohia te tahi atu mau mitionare atoa i te mau fenua taa ê, ua anihia mai râ mâua ia faaea maoro mai. E mau hebedoma i te maoro, ua haere mâua e taoto ma te ite ore e e ara mai anei mâua i te poipoi aˈe. Ua taoto maitai na râ mâua, ma te tiaturi i te paruru a Iehova. Ua riro paha taua mau avaˈe ra, o mâua anaˈe i te amaa, ei taime tamataraa e te haapaariraa puai roa ˈˈe i te faaroo ta mâua i ite aˈenei i roto i ta mâua taviniraa mitionare.

I te avaˈe Eperera 1977, ua tia ia mâua ia faarue ia Brazzaville. Ua maere mau â mâua i muri iho—ua tonohia mâua i Irania no te haamau i te hoê amaa apî. Ta mâua tautooraa matamua, o te tutavaraa ïa i te haapii i te reo Farsi, no Peresia. No te mea hoi e te haapii ra mâua i te hoê reo apî, ua horoa noa ïa mâua i te mau pahonoraa ohie roa ˈˈe i te mau putuputuraa a te amuiraa, mai ta te mau tamarii rii atoa ra! I te matahiti 1978, ua tupu aˈera te hoê orureraa hau i Irania. Ua faaea noa matou i te roaraa o te aroraa uˈana roa ˈˈe, tera râ, i te avaˈe Tiurai 1980, ua tiahi-pauroa-hia matou te mau mitionare.

Ua faahoˈihia mâua i te ropuraa no Afirika, i Zaïre, te Repubilita Demotaratia no Congo i teie nei, o te paeraa ïa o ta mâua tuhaa fenua. Ua tavini mâua i Zaïre 15 matahiti, ma te opani-atoa-hia i te hoê area taime. I to mâua taeraa ˈtu, tau 22 000 Ite e ohipa ra i taua fenua ra—i teie nei, 100 000 tiahapa ïa ratou!

Hoˈi-faahou-raa i ǒ mâua!

I te 12 no Atete 1993, ua faaorehia te opaniraa i te mau Ite no Iehova i Malawi. E piti matahiti i muri iho, ua tono-faahou-hia mâua Linda i te vahi mâua i haamata ˈi—i Malawi, te fenua nehenehe e te auhoa i matauhia mai Te pu mahanahana no Afirika. Mai te avaˈe Tenuare 1996 mai â, ua oaoa mâua i te ohiparaa i rotopu i te mau taata oaoa e te hau no Malawi. Ua mauruuru mâua i te tavini-faahou-raa e to mâua mau taeae haapao maitai no Malawi, e rave rahi hoi o ratou tei faaoromai e toru ahuru matahiti hamani-ino-raa. Ua riro to mâua mau taeae Afirika ei pu no te faaitoitoraa, e ua here mâua ia ratou. Eita e ore e ua faaohipa ratou i te mau parau a Paulo e: “E na roto tatou i te [“mau ati e rave rahi,” MN] e ô atu ai i te basileia o te Atua ra.” (Ohipa 14:22) Ua tiamâ na Ite fatata e 41 000 i Malawi i teie nei no te poro i mua i te taata e no te faatupu i te mau tairururaa rahi.

Ua oaoa roa mâua i ta mâua mau tuhaa fenua atoa. Ua haapii mâua o Linda e e nehenehe te mau huru tupuraa atoa, noa ˈtu e e mea fifi, e faariro ia mâua ei mau taata maitatai aˈe, ia tapea noa iho â râ mâua i ‘te oaoa no ǒ ia Iehova ra.’ (Nehemia 8:10) Ua fifi-rii-hia na vau no te faaauraa ˈtu i to mâua faarueraa i ta mâua mau tuhaa fenua. Ua tauturu mai râ te faaau ohie o Linda—e to ˈna iho â râ faaroo puai ia Iehova—ia ˈu, o tei turai hoi ia ˈu ia haafaufaa i te haamaitairaa e fanaˈo i te hoê ‘vahine maitai.’—Maseli 18:22.

E oraraa oaoa e te anaanatae mau ta mâua i fanaˈo! Ua tamau noa mâua i te haamauruuru ia Iehova no to ˈna rima paruru. (Roma 8:31) Ua hau atu i te maha ahuru matahiti i teie nei mai to ˈu hohoraraa i te oreroraa parau no nia i te mau haamaitairaa o te taviniraa ma te taime taatoa. Ua oaoa mâua i te ‘tamataraa ia Iehova e i te iteraa i to ˈna maitai.’ (Salamo 34:8; Malaki 3:10) Te tiaturi papu nei mâua e te ‘oreraa e ora faahou no tatou noa iho,’ o te huru oraraa maitai roa ˈˈe ïa.

[Hohoˈa fenua/Hohoˈa i te api 26]

Te mau fenua i reira to mâua taviniraa

Irania

Repubilita no Congo

Repubilita Demotaratia no Congo

Kenya

Malawi

[Hohoˈa i te api 23]

To mâua tereraa ˈtu i Malawi, na te Cap atu, i Afirika Apatoa

[Hohoˈa i te api 25]

I to matou tapearaahia i Malawi e te tiahiraahia

[Hohoˈa i te api 27]

Dorcas, hoê Masai, e ta ˈna tane