Te papai mai nei te feia taio

Mǎtaˈu i te Atua? E tia ia ˈu ia faaite i to ˈu oaoa no te tumu parau ra “Ia au i te Bibilia: Nafea ia mǎtaˈu i te hoê Atua here?” (8 no Tenuare 1998) I te tahi area taime, ua feruri noa na vau i teie uiraa. Ua taa ia ˈu e te mǎtaˈuraa i te Atua, o te hoê mǎtaˈu maitai ïa eiaha e haapeapea ia ˈna. Ua hinaaro râ vau e taa hau atu â no nia i teie tumu parau. No reira ïa vau i taio ai i taua tumu parau. Inaha, e tumu parau anaanatae roa no nia i te auraa e mǎtaˈu i te Atua!

M. J. T., Hau Amui no Marite

Mau urî taata rarahi Mea au roa te taioraa i te tumu parau ra “Ua haere mâua e mataitai i te mau urî taata rarahi o te mouˈa.” (8 no Febuare 1998) Aita roa ˈtu vau i manaˈo e e nehenehe te hoê taata e tapiri roa ˈtu i te mau urî taata rarahi ma te ore e rave-ino-hia mai. I roto i te mau hohoˈa, e pinepine ratou i te patahia mai te mau animala taehae. Mauruuru no teie tumu parau faahiahia roa.

R. P., Venezuela

Te ǔǔ Mauruuru roa no te tumu parau ra “Mea nafea vau ia haapaiuma i te ǔǔ.” (8 no Febuare 1998) Ua riro mau â te aamu o Sven Sievers ei faaitoitoraa no ˈu, i te mea hoi e te faaruru atoa ra vau i te hoê â fifi. I te roaraa o te mau matahiti, ua tauturu mai te Haapiiraa o te Taviniraa Teotaratia ia ˈu ia maitai mai â ta ˈu huru paraparau.

E. Z. S., Beresilia

Te faaterehia ra te Haapiiraa o te Taviniraa Teotaratia i te mau hebedoma atoa i te mau Piha no te Basileia a te mau Ite no Iehova.—Te feia nenei.

Ua maere au i te haerea maitai o Sven Sievers i mua i te mau taime e ǔǔ faahou ai oia. I roto i ta matou amuiraa, te vai ra te hoê taeae o te aro ra i te ǔǔ. E paraparau ïa vau ia ˈna i teie nei ma te faatura e te ara maite rahi.

K. K., Tapone

Ua ǔǔ atoa na vau i to ˈu nainairaa. Ua tano maitai outou i to outou parauraa e e tia i te hoê taata ia tutava i te taa i te hoê taata ǔǔ, eiaha râ e aroha ia ˈna. Mauruuru no teie tumu parau.

E. C., Italia

Patoiraa a te mau metua Ua tae mai iho nei te numera o te 8 no Febuare 1998, e ua taio iho nei au i te tumu parau ra “Te uiui nei te mau taurearea . . . E nafea vau ia patoi to ˈu mau metua i to ˈu faaipoiporaa?” Ua manaˈo vau e ua hape au i to ˈu patoiraa e ia faaipoipo ta ˈu tamahine. Te vai ra râ i roto i te tumu parau te mau mea atoa i haapeapea ia ˈu—oia hoi to ˈna apî, te huru o te hoa e faaipoipo, ia amui-au-ore-hia oia i te hoê taata aita i roto i te parau mau, ia roohia oia i te maˈi SIDA, e te mau taa-ê-raa i te pae hiroa tumu. Te taparu nei au e ia haaputapû teie tumu parau i te mafatu o ta ˈu tamahine.

N. B., Hau Amui no Marite

E tumu parau papai-maitai-hia teie! Ua vauvau outou i te hoê tumu parau fifi ma te au maitai. E rave rahi mau uiraa taa ê tei faahitihia, no te tauturu i te taata taio ia mahora to ˈna feruriraa i nia i teie mau tumu parau.

S. C., Hau Amui no Marite

Ua riro na vau ei poro evanelia ma te taime taatoa e vau matahiti i te maoro. E mau Kerisetiano atoa to ˈu mau metua, e ua tatamaˈi na matou no nia i ta ˈu faaotiraa e faaipoipo. Mauruuru roa ia outou no te horoaraa mai i teie haamaramaramaraa faufaa.

T. C. F., Tanzanie