Mau orchidée e haamǎtaˈuhia ra?

E au te mau orchidée i te mau vahi atoa. E nehenehe ratou e tupu i roto i te repo, i nia i te mau tumu raau, e tae noa ˈtu i nia i te mau ofai. Te faaara nei râ te Union Internationale pour la Conservation de la Nature et de ses Ressources (UICN) e eita paha te mau huru e rave rahi o teie tiare nehenehe mau e tamau noa i te tupu i roto i te natura mai te peu e e tamau noa to ratou vahi tupuraa i te tuinohia. “Ia taui to ratou vahi faaearaa, e ore te mau manumanu e titauhia no te faatitoraa aore ra e haere ratou i te tahi atu vahi,” ta Wendi Strahm no te UICN ïa e parau ra. Te na ô faahou ra oia e: “Ia tupu te reira, eita te orchidée e tupu faahou mai.”

Te manaˈohia ra e e 20 % o na orchidée e pae mirioni e hoohia ra na te ao nei i te matahiti hoê, no roto mai ïa i te natura. Te tapao nei te UICN e te haafifi nei te reira i te atuaturaa i teie tiare nehenehe mau. No reira te UICN e faaitoito ai i te feia e hinaaro ra i te orchidée ia hoo mai i tei tupu i roto i te mau fare hooraa tiare, eiaha râ ia tatara mai i te reira i roto i to ratou vahi tupuraa natura.

Te vai ra hau atu i te 20 000 huru orchidée matauhia e te taata. Te vai ra te tahi o teie mau tiare 0,6 tenetimetera noa i te teitei; area te tahi atu â, e mau pohue ïa o te tupu e tae roa i te 30 metera i te teitei. E tupu maitai te rahiraa o te mau orchidée i te mau vahi ûa roa e te mahanahana no te pae rua ma. E tiaturi râ ratou i te huru faito au noa o te natura no te tupu noa.

Ma te peapea, te tamau noa ra te ite ore e te haapao ore o te taata i te tuino i te natura, a haafifi ai i te hoê numera tiare e maraa noa ˈtura, tae noa ˈtu i te orchidée. Fatata roa râ te reira i te faaea. I roto i te ao apî ta te Atua i tǎpǔ, e ora te taata ma te au maitai e te natura. I reira te mau parau a te papai salamo e tupu ai: “Ia ouˈauˈa te mau ô e to roto atoa ra; e ia himene hua mai te mau raau o te vahi ururaau ra.”—Salamo 96:12.

[Faaiteraa i te fatu o te hohoˈa i te api 31]

Jardinería Juan Bourguignon

[Faaiteraa i te fatu o te hohoˈa i te api 31]

Jardinería Juan Bourguignon