Te papai mai nei te feia taio

Te mau vea Rusia Mauruuru rahi roa no te tumu parau “Te haapopou ra te mau vea Rusia i te mau Ite no Iehova.” (8 no Mati 1998) Ua hinaaro noa vau ia ite outou e e ere a tahi ra vau a taˈi ai ia taio vau i ta outou mau tumu parau faahiahia mau. Mea oaoa mau ia ite e ia tae i te hoê mahana, e riro te fenua taatoa ei vahi nehenehe mau mai te amaa apî a te mau Ite no Iehova i Solnechnoye.

I. C. S. A., Beresilia

Te tauiraa te hoê metua tane e ere i te Kerisetiano Ua faahaamanaˈo te tumu parau “Ua putapû to ˈna mafatu” (8 no Mati 1998) i to ˈu iho utuafare. E ere to ˈu tane i te hoê Kerisetiano. Ua horoa mai te tumu parau i te tiaturiraa e ia tae i te hoê mahana, e putapû to ˈna mafatu.

S. M., Hau Amui no Marite

Te patoi nei te hoê utuafare i te mau nazi Aita vau i taio aˈenei i te hoê faatiaraa mai ta Horst Henschel, i roto i te tumu parau “Ua faaitoitohia vau e te taiva-ore-raa o to ˈu utuafare i te Atua.” (8 no Mati 1998) Mea pinepine vau i te faaearaa i te taio i te mau paratarapha eiaha vau ia taˈi. E taata itoito iho â te metua tane o Horst noa ˈtu te haavîraa, e e riro noa to ˈna hiˈoraa ei mea faufaa na ˈu.

A. K., Hau Amui no Marite

Mea putapû mau te aamu o Horst Henschel. Ua faaitoito to ˈna here e to ˈna itoito no Iehova ia ˈu. Eita e moe ia ˈu te mau parau o tei tauturu ia ˈna a mau ai oia i te fare tapearaa: “Eiaha na râ e mataˈu tei taparahi i te tino.”

J. V. S., Beresilia

Hoê ahuru matahiti to ˈu, e te hinaaro ra vau e parau ia outou e mea mahanahana mau ia ite nafea te mau Ite no Iehova e ora ˈi i tera ra tau—nafea ratou e nehenehe ai e haapohehia ia ore ratou e parau “Heil Hitler!” Aita râ te mau Ite i aueue e aita ratou i parau i te reira.

R. B., Hau Amui no Marite

Teoteoraa i te pae nunaa Ua oaoa roa vau i te taio atu i te tumu parau “Te uiui nei te mau taurearea . . . Eaha ïa no nia i te teoteoraa i te pae Nunaa?” (8 no Mati 1998) Mea rahi te taime to ˈu aniraahia “E tia oe no teihea fenua?” Inaha eita ta ˈu e nehenehe e parau no hea roa mai to ˈu utuafare, e pahono noa vau ma te hoata, “E afa!” Ua parau te hoê tiaau ratere, “Ia anihia oe eaha oe, a parau noa ˈtu, ‘e Ite no Iehova vau.’” E faahiahia roa vau i te mea tei roto vau i te hoê faanahonahoraa o te hiˈo i te mau nunaa atoa ei mea aifaito.

D. H., Hau Amui no Marite

Hoê ahuru ma maha matahiti to ˈu e te hinaaro nei au e haamauruuru ia outou no teie tumu parau. Ua taui to ˈu teoteo i te pae nunaa na roto i te riri i te nunaa ê. Ua faataa teie tumu parau ia ˈu e ua aifaito tatou pauroa i mua ia Iehova.

I. P., Italia

I to ˈu apîraa, ua teoteo te rahiraa o to ˈu mau hoa haapiiraa no to ratou nunaa e to ratou iri, ma te parau e e toto Paniora to ratou, area o vau no roto ïa vau i te hoê pǔpǔ iti. Ua haamata vau i te haafaufaa ore e te faatura ore ia ˈu iho. I te tahi taime, ua parau vau ia ˈu iho e, ‘Aita vau e au i to ˈu iri!’ Ua tauturu te aˈoraa i roto i teie tumu parau ia ˈu ia faatura faahou ia ˈu iho e ia oaoa i te mea ta Iehova i horoa mai na ˈu.

A. G., Philipino

E huru hiˈoraa hape roa to ˈu i to ˈu manaˈoraa e mea faahiahia aˈe te feia i fanauhia i roto i te mau fenua ona aˈe. Ua tauturu ta outou tumu parau ia ˈu ia ite e hoê anaˈe nunaa—te nunaa taata.

L. G., Beresilia