A ara maitai ia maiti outou i te faaanaanataeraa
Eaha te faahopearaa o te faaanaanataeraa i nia i te mau tamarii? Ua papu maitai ia Alvin Poussaint, te hoê orometua haapii e taote atoa o tei ohipa e te mau tamarii fatata e 30 matahiti i te maoro e, ia mataitai te mau tamarii apî i te mau hohoˈa î i te peu taatiraa e te haavîraa uˈana, e manaˈo ratou e mea tano iho â taua mau haerea ra. Ua haapapu atoa oia i te tahi atu â ohipa atâta: “Ua ite au i te mau tamarii i te riaria-haere-noa-raa—aore ra i te riri-uˈana-haere-noa-raa i to ratou hoˈiraa ˈtu i te fare i muri aˈe i te mataitairaa i teie huru hohoˈa. Ua ite au i te tahi i te otoheraa i muri, oia hoi e piri noa i te metua aore ra e oteote i te rima aore ra e omaha i nia i te roˈi.” Ia au i teie taote, ua tapao te tahi feia ite i te tahi atu â mau ohipa o te nehenehe e faatupu i teie mau haerea—mau hamani-ino-raa i te pae tino aore ra i te pae taatiraa aore ra te oraraa i roto i te hoê tuhaa fenua e tamaˈi to reira, ei faahitiraa i te tahi noa. “Aita hoê aˈe i roto ia tatou e hinaaro mau e tuu i te hoê tamarii i roto i taua mau huru tupuraa ra,” ta ˈna ïa e faataa ra, “eita râ tatou e rave eiaha ratou ia mataitai i te mau hohoˈa no nia i te mau mea e riaria roa tatou ia ite ratou i roto i te oraraa mau.”
E tumu maitai roa to te mau Kerisetiano ia ara maitai e ia papu maitai ia ratou e aita te faaanaanataeraa ta ratou e maiti ra e ofati ra i te mau faaueraa tumu a te Bibilia. Ei hiˈoraa, te parau ra te Salamo 11:5, e: “Te tamata maira Iehova i te feia parau-tia, [“e te feia ino atoa, e te feia atoa e au i te haavîraa uˈana,” MN], ua riri roa tana aau ia ˈna.” Ua papai te aposetolo kerisetiano Paulo e: “E tena na, uumi iho i to outou mau melo i te mau mea o teie nei ao, mai te faaturi, te parau faufau ra, te paia ra, te hinaaro tia ore ra, e te nounou taoˈa . . . E haapae atoa outou i taua mau parau atoa nei, i te riri, te tairoiro, te feii, te faaino, e te parau tiaâ i to outou vaha.”—Kolosa 3:5, 8.
No reira, e tia i te mau metua ia ara maitai eiaha te faaanaanataeraa ta ratou e maiti ra no ta ratou mau tamarii—aore ra no ratou iho—ia paturu i “ta te tino e rave nei.” (Galatia 5:19-21) E tia ia ratou ia maiti maitai, ma te ara i te huru maitai e tae noa ˈtu i te rahiraa o te mau faaanaanataeraa.—Ephesia 5:15-17.