Te hoê “mea taa ê roa”

I muri aˈe i to ˈna taioraa i te buka ra Te taata rahi roa ˈˈe i ora aˈenei, te hoê buka o te tutava nei i te faaite i te mau tupuraa atoa o te oraraa o Iesu i nia i te fenua nei, faataahia i roto i na Evanelia e maha, ua parau te hoê vahine e 70 matahiti no Moscou, i Rusia e: “Aita vau i taio aˈenei i te mau pueraa buka mai teie huru. Te hinaaro nei au e ite hau atu â no nia i te Atua e no nia ia Iesu Mesia e e haapii atoa i te Bibilia.”

Te tae pinepine mai nei te mau rata mai teie huru no nia i te mau buka Bibilia i te amaa a te mau Ite no Iehova i Rusia. Ua faataehia mai i te hoê â huru rata na te hoê vahine no Chelyabinsk, te hoê oire rahi ua hau atu i te hoê mirioni taata, e fatata 1 500 kilometera i te pae apatoa hitia o te râ no Moscou.

Ua parau oia no nia i Te taata rahi roa ˈˈe i ora aˈenei e: “E mea taa ê roa teie buka. E faatupu hoi te reira i roto i te taata i te hoê tiaturiraa no te hoê tau oaoa no a muri aˈe e e tauturu ia ratou ia ite no nia i te aamu tahito. Na mua ˈˈe vau a taio ai i teie buka, aita vau i manaˈo noa ˈˈe i te Atua e aita vau i anaanatae noa ˈˈe i te haapaoraa, i teie nei râ e hinaaro vau ia bapetizohia vau. E hinaaro vau e haapii hau atu â i ta outou mau pueraa buka. E hinaaro vau e paraparau no nia i te mau mea o ta ˈu i taio i to ˈu mau hoa, te feia ta ˈu i matau, te mau fetii.”

E nehenehe atoa outou e fanaˈo i te mau pueraa buka o te nehenehe tauturu ia outou ia haapii hau atu â no nia ia Iesu e no nia i te tiaturiraa niuhia i nia i te Bibilia no te ora i roto i te ao apî. Mai te peu e te hinaaro ra outou i te buka ra Te taata rahi roa ˈˈe i ora aˈenei aore ra ia haere mai te hoê taata i to outou fare no te aratai i te hoê haapiiraa Bibilia tamoni ore e o outou, a papai atu i te aama a te Taatiraa “Te mau Ite no Iehova,” B.P. 7715, 98719 Taravao, TAHITI, aore ra i te hoê o te mau vahi nohoraa i te api 5.