Te pape e to outou oraora-maitai-raa
“E ORE outou e nehenehe e tiaturi i te poihâ ei faaiteraa ia outou i te faito pape ta to outou tino e hinaaro ra,” ta te vea ra Health ïa e haapapu ra. Inaha, mea faufaa roa te inu-rahi-raa i te pape no to tatou tino e to tatou maitairaa i te pae o te mau manaˈo hohonu e tae noa ˈtu to tatou huru rapaeau. Te ere tamau noa ra to tatou tino i te pape na roto i te hou, te roimata, te omaha e na roto atoa i te hutiraa i te aho. E tia ia monohia teie pape i pau. Eaha te faito e hinaarohia ra? E rave rahi feia mana e faaitoito nei i te inu i na hapaina pape e vau—e piti ïa litera—i te mahana taitahi.
Eaha te faufaaraa? E taoˈa ora te pape no te taitai i te mau maitai o te maa na roto i to tatou tino e no te hopoi ê i te ino. Mea hinaarohia no te faafaito i te mahanahana o to tatou tino e no te tahinu i to tatou mau puoiraa ivi. “Tae noa ˈtu te ereraa haihai roa ˈˈe, e nehenehe e horoa mai i te rohirohi . . . aore ra te maˈi,” ta te vea ra Health ïa e parau nei. “Mea pinepine i te haamoehia e te ereraa i te pape te hoê tumu no te rohirohi.” Te horoa mai nei teie vea i teie manaˈo e: “Eiaha outou ia vare i te huru pape o te taofe e te ti, te mau pape monamona tataofehia, e te ava; oia mau e faatupu ratou i te ereraa i te pape.” E ohipa te taofe e te ava mai te raau omaha e e faaere raua i te pape o te tino.
Hau atu â: “E hinaarohia te pape ia vai mǎrû noa to outou iri.” Ei tautururaa ˈtu i te reira, e nehenehe atoa e parai te iri i te taoˈa faararirari. Eita râ oia e haamaitai i te haumi. E vaiiho noa râ oia i te hoê paruru o te tapea i te haumi e vai aˈena ra i roto i te iri. Mea faufaa roa ˈtu â te tapearaa i teie haumi ia paari tatou, i te mea e e erehia to tatou iri i te ravea no te tapea i te pape a paari noa ˈi tatou.
Mea peapea roa râ i te mea e, i roto i te rahiraa o te mau fenua, e tutavaraa uˈana te hinaarohia e navai ai te pape mâ e te viivii ore e roaa mai. Eita râ e mâuˈa te tutavaraa. Oia mau, a inu rahi i te pape, e a fanaˈo i teie ravea ohie ia maitai roa outou, i rapae e i roto mai!