Te papai mai nei te feia taio

Peu faaanaanataeraa Mauruuru no te tumu parau ra “Mai te aha te huru o te mau peu faaanaanataeraa i teie nei tau?” (8 no Me 1997) Hoê ahuru ma piti matahiti to ˈu, e i roto i ta ˈu mau tau faaearaa haapiiraa, e mataitai rahi na vau i te tele. Ua tauturu mai te tumu parau ia ˈu ia ite e te vai ra te tahi atu â mau ohipa anaanatae o ta ˈu e nehenehe e rave.

J. L., Beretane

Pororaa i te mau mataeinaa no Afirika Te hinaaro nei au e haamauruuru ia outou no te tumu parau ra “O ta te hoê moa e auau i raro aˈe i te ûa . . .” (8 no Me 1997) Te haafaahiahia nei au i te itoito e te faaoromai o to tatou mau taeae i Nigeria. Noa ˈtu e e tia ia ratou ia faaruru i te mau ophi, te mau moo pape, e te mau toˈe ote toto, ua faaitoitohia ratou e to ratou here no te taata. Ia haere au i te pororaa i te taime i mua nei e ia veavea vau aore ra ia rohirohi au, e haamanaˈo vau i to tatou mau taeae here i Nigeria.

S. S., Hau Amui no Marite

No te aha e haavî ai i te riri? Mauruuru no te tumu parau ra “No te aha e tia ˈi ia haavî i to outou riri?” (8 no Tiunu 1997) Ua paari au i roto i te hoê utuafare rahi, e i to ˈu nainairaa ua ite au e rave rahi taputôraa i to ˈu fare. Ua taa to ˈu nau metua, e mai reira mai e tupu na to ˈu riri i te tahi mau taime. Ua pure tamau vau ia Iehova, ma te ani ia ˈna ia tauturu mai ia ˈu ia matara teie fifi. Auê au i te maere e i to ˈu taioraa i teie tumu parau e au ra e ua papaihia mai no ˈu! Te feruri nei au i nia i te mau irava tei faahitihia—ei hiˈoraa, te Ephesia 4:26, e na ô ra e: “Eiaha ia mairi te mahana i to outou ririraa.” Ua faaohipa mâua ta ˈu tane i te reira. Auaa o Iehova e teie tumu parau, ua nehenehe au e haamatara i to ˈu fifi.

A. R. S., Hau Amui no Marite

“I roto i te tariˈa o te hoê tamarii aruaru” Ua haaputapû roa teie tumu parau (8 no Tiunu 1997) ia ˈu. I roto i te aua taviniraa, e pinepine au i te farerei i te mau tamarii. Aita vau e tâuˈa ore ra aore ra e haafaufaa ore ra ia ratou, e paraparau noa vau ia ratou no nia i te Paradaiso. Mauruuru roa i to outou neneiraa i teie aamu, no te mea ua faaitoito te reira ia ˈu ia tamau noa. O vai i ite e no vai te “tariˈa o te hoê tamarii aruaru” a muri aˈe?

M. O. U., Nigeria

Ua haaputapû mau â teie tumu parau ia ˈu! I to ˈu taioraa i te tuhaa ra “To ˈu haapiiraa i te parau mau a te Bibilia” e i to Louise hitimahutaraa a ite ai oia i roto i te Salamo 37:9 e e parahi te taata i te fenua nei—e i roto i ta ˈna iho Bibilia te King James Version!—ua taˈi au. Mauruuru no teie mau aamu, e mai te peu e e tia ia outou a tamau noa i te nenei i te reira i roto i te A ara mai na!

P. C., Beretane

Te papai mai nei te feia taio Te poihere nei au i te mau vea atoa ta matou e fanaˈo nei. Ua au taa ê au i te mau manaˈo o te feia taio i roto i te A ara mai na! o te 8 no Tiunu 1997, no nia i te tiavaruraa. Ua tiavaruhia na vau e ua faahoˈihia mai i te matahiti i muri iho. E rave rahi roa taata e manaˈo ra e e ohipa etaeta teie. E ere roa ˈtu râ. To ˈu aˈoraahia, e ere i te mea ohie ia farii, e ere roa ˈtu râ i te mea etaeta. Ua ite au e te tamata noa ra te mau matahiapo i te tauturu ia ˈu. No to ˈu patoiraa i ta ratou tauturu i tiavaruhia ˈi au. I to ˈu tiavaruraahia, ua taa ˈtura ia ˈu e mea moemoe te oraraa mai te peu e aita o Iehova. Ua ite au i te hoê ereraa rahi i roto i to ˈu oraraa o te ore e nehenehe e haamâhahia e tae noa ˈtu i to ˈu tauiraa i to ˈu huru oraraa e to ˈu hoˈiraa mai ia Iehova ra. Ua faahaehaa to ˈu tiavaruraahia ia ˈu e ua faaite mai e ua hinaaro vau ia Iehova e i ta ˈna faanahonahoraa.

A. C, Kanada

A ara mai na! A faaore mai i ta ˈu hapa, no te mea ua moehia ia ˈu ia faaapî i ta ˈu tamatahitiraa i te vea maitai roa o te A ara mai na! E vea hoi teie o te haamaramarama, o te haapii, e o tei niuhia i nia i te mau tupuraa mau, na roto i te mau tumu parau anaanatae e te oraora. Te hinaaro nei au i te mau numera atoa e aita ta ˈu. Aita vau e hinaaro ra e ia erehia vau i te hoê noa ˈˈe. Mauruuru no ta outou tauturu faaoromai no te aro i te ite ore.

N. S., Sri Lanka