Te poia i te pae varua i Rumania
UA FAAITE te hoê tabula a te vea ra Associated Press no Brasov, i Rumania, e tau 90 % o na taata e 23 mirioni no Rumania, e melo ratou no te Ekalesia Orthodoxe, o tei faatiahia ia ohipa i raro aˈe i te faatereraa Communiste. Teie râ, ua tapao te vea ra Daily Record, no Canon City, Colorado, i Marite, e rave rahi i teie nei e ite ra e mea hape te ekalesia. Teie te upoo parau i roto i te vea ra: “Te ite nei to Rumania e aita e tuatiraa to te Ekalesia Orthodoxe.”
Ua faahiti te vea ra i te avaˈe Atopa i mairi aˈenei e: “Ua parau o Alexandru Paleologu, taata papai e philosopho, no nia i te ereraa i te tiaturiraa i roto i te mau faatere o te ekalesia, e no nia i te anoiraa te mau peu e te auraa o te haapaoraa. Ei hiˈoraa, te tohu nei te taata i ta ˈna satauro e te haapae nei i te maa i te mau mahana i faataahia. Area te haamaruaraa tamarii ra, o ta te ekalesia e faariro nei hoi ei hara, ua parare ïa.”
Ua faaite te vea ra Daily Record e e rave rahi tei riro mai ei Ite no Iehova, ma te parau i te mana o te porotarama haapiiraa Bibilia a te mau Ite, i nia i te hoê utuafare: “Mea inu roa te tane a Florentina Petrisor na mua ˈˈe, e e taparahi na oia ia ˈna, o ta ˈna ïa e parau ra. Teie râ, mai te taime a riro mai ai raua ei Ite no Iehova, mea hau to raua oraraa utuafare.”
Te parauhia ra e “ua faarue” o Florentina, e vahine nira ahu oia e e 38 matahiti to ˈna, “i te ekalesia Orthodoxe, no te mea aita te orometua e horoa ra i te haapiiraa e e taata nounou taoˈa te perepitero no reira.” Ua faataa te vea e: “I te poheraa to ˈna metua tane hoovai, ua parau o Petrisor Vahine e ua titauhia te utuafare ia aufau e ia faatamaa i te perepitero no te fanaˈo i te hoê hunaraa maitai, hou oia e faatamaa ˈi i ta ˈna mau tamarii. ‘Ua manaˈo vau e e ere i te mea tano,’ o ta ˈna ïa i parau.”
No nia i te ohipa a te ekalesia e haapuhara i te mau manaˈo haavare no nia i te mau Ite, teie ta te vea ra Daily Record i parau: “I Rumania, ua turai atoa te Ekalesia Orthodoxe, o tei mana faahou, i te faatereraa ia taui i te vahi haaputuputuraa rahi a te mau Ite no Iehova i teie tau veavea, mai te oire pu no Bucarest i te mau oire no Brasov e no Cluj, i Transylvanie.”
Ua faahiti te A ara mai na! o te 22 no Febuare 1997 (Farani) i te ohipa ta te ekalesia i rave no te turai i te faatereraa ia faaore i te tairururaa nunaa i faataahia i Bucarest i te avaˈe Tiurai 1996. E nehenehe outou e taio i roto i taua vea ra e mea nafea te mau tairururaa mono i te faanaho-oioi-raahia i Cluj-Napoca e i Brasov, e mea nafea to te hoê rahiraa e 34 866 taata taeraa. Mea faahiahia te faahopearaa i faaiteitehia na te ao nei. “Te mea o ta te Ekalesia Orthodoxe no Rumania i manaˈo e e haapeapea ia matou,” o ta te hoê tia Ite ïa i tapao, “ua riro mau â ïa te reira ei ravea no te faahaere i te parau apî maitai i mua.”
[Hohoˈa i te api 30]
Te himene ra te mau tia i te tairururaa i Brasov