Te papai mai nei te feia taio

Te mau taa-ê-raa o te faaamahamaha Te hinaaro nei mâua e haamauruuru no te mau tumu parau ra “E tia anei i te mau taa-ê-raa ia faaamahamaha ia tatou?” (8 no Tiurai 1996) Ua rave na mâua i te ohipa, ei pǔpǔ rave ohipa tauturu nunaa, i ǒ nei i Mexiko, hoê matahiti te maoro. I muri aˈe atoa e rave rahi avaˈe, aita iho â mâua e afaro ra, aita râ mâua i taa e no te aha. Na te mau tumu parau i tauturu ia mâua ia ite i te fifi, oia hoi te taui-taue-raa i te pae ihotumu. Ua faaohipa mâua i te parau ra “e nehenehe te auraa i te tahi atu mau ihotumu e haafaufaa i to tatou oraraa,” e te oaoa hau atu â nei mâua i roto i ta mâua ohipa.

C. H. e J. H., Mexiko

A rave noa ˈi au i te mau maimiraa no ta ˈu tumu parau faito haapiiraa tuatoru no nia i te ihihuitaata, ua faaea vau tau hebedoma i te hoê fenua no Afirika. I reira, ua matau vau e rave rahi Ite no Iehova e ua haere atu vau i ta ratou mau putuputuraa. Auê ïa ohipa faahiahia mau! Mai ta te tumu parau e parau ra, e faufaahia oe ia farerei i te mau taata no te mau nunaa ěê. Ua noaa mai ia ˈu te mau hoa apî e te au mau.

S. B., Italia

OVNI Mauruuru no te tumu parau ra “Ia au i te Bibilia: OVNI—E mau vea anei na te Atua?” (8 no Tiurai 1996) I to matou vahi, te tiaturi nei vetahi mau taata i te mau faatiaraa no nia i te mau taata no te reva mai. I to ratou manaˈoraa e aita te Bibilia e faahiti ra i teie tumu parau, ua feaa ratou no nia i te Bibilia. Ua tauturu te tumu parau ia matou ia ite e te tamata nei o Satani e te mau demoni i te faahema i te taata, e mea maamaa ia tiaturi i te mau faatiaraa aita e haapapuraa no nia i te mau taata no te reva mai.

A. W., Taïwan

Arearea Hoê ahuru ma piti matahiti to ˈu, e ua oaoa mau â vau i te tumu parau ra “Te uiui nei te mau taurearea . . . No te aha o te tahi mau taurearea anaˈe te arearea?” (8 no Tiurai 1996) E ui noa na vau i taua uiraa ra. I ta ˈu fare haapiiraa, e nehenehe oe e tapao ia oe no te tahi mau oroa, ǒriraa, e te tahi atu mau ohipa. Ua hinaaro noa vau e haere. Ua tauturu mai râ te tumu parau ia ˈu ia taa e e hopoia ta ˈu i mua ia Iehova no te mau ohipa ta ˈu e maiti i te rave. No reira, e amuimui ïa vau i to ˈu mau hoa kerisetiano.

A. S., Hau Amui no Marite

I te tahi mau taime, ua manaˈo atoa vau mai ia Asapha [taata papai i te Bibilia], mai ta outou i faahiti i roto i te tumu parau. Ua haapuai faahou â te tumu parau ia ˈu, o ta ˈu hoi i hinaaro no te faaruru i te fare haapiiraa.

A. S., Tapone

Parau mau, te manaˈo nei vetahi mau taurearea e te tuuhia ra ratou i te hiti aore ra te faaerehia nei ratou i te tahi mea, no te mea eita ratou e “faatiahia” ia haere i te mau oroa a teie nei ao. Teie râ, e ere o te mau tamarii atoa a te mau Ite no Iehova teie e manaˈo nei mai te reira! O vau iho nei, mea au ore roa na ˈu e rave rahi mea e ravehia i te mau oroa a teie nei ao, e te manaˈo atoa nei to ˈu mau hoa kerisetiano mai te reira. Aita matou—papu maitai, e rave rahi atu â—e manaˈo nei e te ere nei matou i te tahi mea!

C. H., Hau Amui no Marite

Hiˈoraa i roto i te opu No ite mai nei au e ua hapû vau. No te tahi huru rapaauraa i hape, e nehenehe ta ˈu aiû e hapepahia ia fanauhia mai oia. Ua tauturu mai ta outou tumu parau ra “Hiˈoraa i roto i te opu” (8 no Atete 1996) ia ˈu ia ore e opua i te haamarua i ta ˈu aiû. Ua noaa mai ta ˈu vea hoê hebedoma na mua ˈˈe vau e ite ai e ua hapû vau.

M. C., Hau Amui no Marite

Ua taui oia i te fa o to ˈna oraraa E tia ia ˈu ia faaite atu e ua itoito-roa-hia vau na roto i te tumu parau ra “Te tumu oia i taui ai i te fa o to ˈna oraraa.” (8 no Tiurai 1966) Hau atu i te 13 matahiti to ˈu taviniraa ei poro evanelia ma te taime taatoa, e e ere i te mea ohie noa ia haamau i te mau fa matamua i roto i teie ao e faateimaha noa ˈtura ia tatou. I te matahiti taitahi, e mea fifi roa ˈtu â ia faaea i roto i te taviniraa ma te taime taatoa. I te mea e ua vaiiho o Jeremy i te hoê toroa faahiahia ei tiai no te hoê aua natura no te riro mai ei tavini ma te taime taatoa, ua haapapu mai te reira ia ˈu e e mea hoona mau te tutavaraa no te tapea i te taviniraa ei fa matamua i roto i to ˈu iho nei oraraa.

N. C., Hau Amui no Marite