Te maimiraa te hoê taurearea i te mau pahonoraa

UA PUAI roa mai te anaana o te mahana poipoi, ma te hiti haere mai na roto i te uru raau i nia i te hoê tamaiti o tei tuturi ma te pure tuutuu ore. Ua anoi noa te manaˈo o Iosepha, ahuru ma maha matahiti to ˈna, no te huenaneraa i te pae faaroo i to ˈna ra tau. Ua amahamaha te mau ekalesia tumu. Ua rahi roa te mau pǔpǔ faaroo amaha apî. Teihea pǔpǔ ta ˈna e apiti atu? Ma te pure tuturi, ua ani oia e: “Teihea te pǔpǔ tano i roto i teie mau pǔpǔ atoa; aore ra, e mea hape anei ratou paatoa? Mai te peu e e mea tano te hoê o ratou, teihea ïa, e nafea vau ia ite i te reira?”

Mea na reira ïa to Iosepha Semita faataaraa i to ˈna fifi matamua i te pae varua. Eita e maerehia to ˈna manaˈo anoi. Tei te hoê mataeinaa i te pae apatoerau hitia o te râ no Marite i te omuaraa o te senekele 19, te hoê vahi e mea uˈana te faaroo i reira.a E mea titau-rahi-hia te tiaturiraa. E rave rahi feia faaapu tei aro i te hoê oraraa fifi mai te repo paari ta ratou i faaapu. No to ratou hinaaroraa i te hoê ohipa maitai aˈe, ua anaanatae roa ratou i te mau aai no nia i te mau taoˈa faufaa no Inidia tei hunahia. No reira ua paheru ratou i te mau aivi, e te mau ofai tahutahu i faaohipahia e te mau peropheta, te mau parau tahutahu, e te mau raau iti tahutahu. Ia au i te mau aai no te fenua, ua haamouhia te hoê nunaa rahi inidia i roto i te hoê aroraa riaria i te tahi vahi i te Hau no New York.

Ua hiaai uˈana te mau orometua matauhia e feruri hohonu, ma te parau e no roto mai te mau Inidia no Marite i na opu e hoê ahuru Iseraela tei moe. I te matahiti 1823, ei hiˈoraa, ua papai o Ethan Smith i te buka ra View of the Hebrews; or the Tribes of Israel in America.

Te mau api auro e te hoê peropheta

Ua paari mai te taurearea ra o Iosepha Semita i roto i teie huru tupuraa hotu o te mau peu e te itoito faaroo. Ua putapû atoa to ˈna utuafare. Ua papai te metua vahine o Iosepha i ta ratou mau faaoraraa, mau semeio, e te mau orama. I to ˈna râ haereraa e te tahi mau tamarii i te hoê pureraa, ua patoi o Iosepha i te apee ia ratou. I muri iho, i roto i to ˈna aamu, ua papai oia i ta ˈna pure no te ani i te tauturu e te mau pahonoraa ta ˈna i fanaˈo.

Ua faahiti o Iosepha i te hoê orama ta ˈna i ite e ua opani te Atua ia ˈna ia apiti atu i roto i te mau huru pǔpǔ faaroo amaha atoa no te mea e mea hape ratou paatoa. No reira, i te hoê mahana i te tau auhune i te matahiti 1823, parau atura o Semita e 17 matahiti to ˈna i to ˈna utuafare e ua faaite mai te hoê melahi o Moroni to ˈna iˈoa ia ˈna i te hoê haapueraa api auro tahito. E maha matahiti i muri iho ua faahua parau oia e ua horoahia mai ia ˈna ra te mau api e te mana no ǒ roa mai i te Atua ra e huri i te reira, o tei titau ia faaohipahia te hoê ofai taa ê piihia “te hoê ofai hiˈohiˈo” e te hoê titia mata ario tahutahu—e piti taiamani manina e toru poro tei tamauhia i roto i te hiˈo. Te auraa e pohe oioi te feia e hiˈo i te mau api i taua taime ra, o ta Semita ïa i faaara.

Ua faahiti faahou o Semita, o tei ite i te taio aita râ i ite maitai i te papai, i te “huriraa” o te mau api i e rave rahi papai parau. Ma te parahi i muri mai i te hoê paruru ahu, ua faatia o ˈna i te hoê aamu tei manaˈohia e na te hoê taata hebera o Moromona te iˈoa i haaputu mai. Ua papaihia i nia i te mau api e te mau leta no “Aiphiti i faaapîhia”, o ta Semita ïa i faataa, e mau papai piri aˈe i to te Hebera. Ua faataahia o Moromona e ta ˈna tamaiti o Moroni mai te feia hopea tei ora mai, no te hoê nunaa tei piihia te mau ati Nephi, te mau huaai iri uouo hebera o tei parauhia na e ua haere ratou i Marite fatata i te matahiti 600 hou i to tatou nei tau no te maue ê i te haamouraahia o Ierusalema.

Te faatia ra te aamu e ua fa mai o Iesu i teie nunaa i Marite i muri aˈe i to ˈna poheraa e to ˈna tia-faahou-raa e ua maiti oia i na aposetolo ati Nephi e 12. E feia orure hau e e feia tamaˈi te mau ati Lamana, e huaai hebera atoa teie, no reira no te faautua ia ratou, ua faaereere te Atua i to ratou iri. Te faatia ra iho â râ te aamu a Moromona i te mau aroraa tamau i rotopu i teie nau nunaa. Ua haere roa te mau ati Nephi i te inoraa e i te pae hopea ua faaorehia ratou e te mau ati Lamana, oia hoi te mau tupuna o te mau Inidia no Marite.

Ia au ia Semita, ua horoa te tamaiti a Moromona, te varua Moroni i teie mahana, ia ˈna ra i te mau api auro e te faaueraa ia haamau faahou i te ekalesia a te Mesia. Aita i maoro ua noaa ta Semita mau pǐpǐ. Ua aufau te hoê taata faaroo ona i te mau haamâuˈaraa o te neneiraa i te buka a Semita tei piihia Te Buka a Moromona. Ua neneihia oia i te tau uaaraa tiare i te matahiti 1830. E piti hebedoma i muri iho, faaite atura o Iosepha Semita i to ˈna tiaraa tumu: “Hiˈohiˈo, te hoê Taata huri, te hoê Peropheta, te hoê Aposetolo a Iesu Mesia.” I te 6 no eperera 1830, ua fa mai te Ekalesia Momoni, aore ra Te Ekalesia a Iesu Mesia i te feia moˈa i te mau mahana hopea nei.b

E huru faahiahia roa to Semita o tei manuïa i te faataui e rave rahi taata. Ua faatupu atoa râ ta ˈna haapaoraa huru ê i te mau enemi. Ua horohia te ekalesia apî; ua maue ê to ˈna mau melo mai New York mai i Ohio e i muri iho i Missouri no te imi i ta ratou Ierusalema apî. Ei peropheta, ua faahiti o Semita i te faaiteraa i muri iho i te tahi faaiteraa, ma te parau i te hinaaro o te Atua no nia i te tumu parau o te moni ô e te hoê rata no ǒ mai i te Atua ra e faaea e rave rahi vahine. Ua faatupu rahi teie faaiteraa hopea iho â râ i te hamani-ino-raa. No te faaruru i te manaˈo ino e te au-ore-raa i te mau vahi atoa, ua rave te mau Momoni i te mau pupuhi no te paruru ia ratou iho.

Aita roa ˈtu te opuaraa ino e te arepurepuraa o tei tapao i te mau matahiti matamua o Iosepha Semita i ore. Ua patoi uˈana te mau oire otia, tei taatahia e te mau pǐpǐ a Semita. Aita ratou i hinaaro i te tahi atu buka moˈa aore ra te hoê taata faahua peropheta. I muri iho, i te matahiti 1839, no to ratou riaria i te huiraatira o te fenua, ua haamau te mau Momoni i te hoê vahi aihuaraau ruperupe, e ta ˈna iho mau matini oro, te fare neneiraa, te fare haapiiraa tuatoru, e te mau nuu faehau, i Nauvoo, no Illinois. I te tupuraa te mau feiiraa, ua haruhia e ua tapeahia o Semita i roto i te fare auri i Carthage, no Illinois. I reira, i te 27 no tiunu 1844, ua tomo mai te hoê nahoa rahi i roto i te fare tapearaa e ua pupuhi e ua haapohe ia ˈna.

Te ora noa ra te Ekalesia i muri aˈe i ta ˈna peropheta

Aita te aamu i hope i te poheraa o Iosepha Semita. Ua rave oioi o Brigham Young, te peretiteni o te Apooraa o na aposetolo e ahuru ma piti, i te faatereraa e ua aratai oia e rave rahi feia faaroo na roto i te hoê tere atâta i te peho i te Great Salt Lake i Utah, tei reira hoi te pu rahi Momoni i teie mahana.c

Te tamau noa ra te ekalesia i haamauhia e Iosepha Semita i te arato i te feia tei taui i ta ratou faaroo, e ia au i te mau haapapuraa a te SDJ, tau iva mirioni melo na te ao nei. Ua parare oia atea ˈtu â i to ˈna vahi tumu i te Hau no New York na te mau fenua Italia, Philipino, Uruguay, e Zaïre. Noa ˈtu e ua tamau noa te au-ore-raa, ua ruperupehia te Ekalesia Momoni faahiahia. O te haamau-faahou-raa anei teie o te kerisetianoraa mau o ta te mau taata faaroo i tiai noa na?

[Nota i raro i te api]

[Faaiteraa i te fatu o te hohoˈa i te api 23]

Hohoˈa: Parau faatia a Te Ekalesia a Iesu Mesia i te feia moˈa i te mau mahana hopea nei/Dictionary of American Portraits/Dover