Te Fenua—Te ô ta te Atua i horoa na tatou

“HAMANI ihora te Atua i te raˈi e te fenua i te matamua ra.” Ua parau atoa oia e mea “maitai roa” te fenua. (Genese 1:1, 31) Aita te mau haapueraa pehu i faaino i te reira; aita te mau faarueraa pehu i haaviivii i te reira. Ua vaiihohia mai te hoê ô haviti na te huitaata nei: “Te mau raˈi ra, na Iehova ïa mau raˈi; area te fenua nei, ua horoa mai oia i te reira na te tamarii a te taata nei.”—Salamo 115:16.

I roto i te Isaia 45:18, te faaite ra o ˈna i ta ˈna opuaraa no te fenua: “Te na ô maira hoi Iehova; o tei hamani i te mau raˈi ra; oia te Atua: o tei rave i te fenua e na ˈna i hamani; e na ˈna hoi i haamau: aitâ râ oia i hamani ia vaiiho-taata-ore-noa-hia, ua hamani râ oia ia taatahia: O vau o Iehova, e aitâ ˈtu.”

Te faaite iho â râ o ˈna e eaha te hopoia a te taata no nia i te fenua nei—“ei faaapu, e ei tiai.”—Genese 2:15.

Te horoa ra o Iehova i te hiˈoraa. Te rave maitai ra o ˈna i te fenua. Te hoê raveraa oia hoi na roto i te faaapîraa i te mau ohipa faufaa o te fenua, te mau ohipa o tei riro ei niu no te mau mea ora atoa i nia i te fenua nei. Te vai ra i roto i te hoê vea taa ê te Scientific American te mau tumu parau no nia i teie mau ohuraa e rave rau, mai te ohuraa ito o te fenua nei, te ohuraa ito o te biosphère, te ohuraa o te pape, te ohuraa oxygène, te ohuraa carbone, te ohuraa azote, e te mau ohuraa e te faaapîraa o te repo fenua.

Te fenua—Maere e te haviti

Teie te arueraa taatoa a te fenua, i papaihia e te taata tuatapapa i te pae ihiora ra o Lewis Thomas i roto i te vea aivanaa ra Discover, o tei nenei-rahi-hia:

“Te ohipa maere roa, te faanahoraa taa ê roa ˈˈe ta tatou i ite tae mai ai i teie nei i roto i te ao taatoa o te reva teitei, te piri rahi roa ˈˈe o te mau piri atoa no nia i te reva, o te faahuru ê ra i ta matou mau tutavaraa atoa ia taa i te reira, o te fenua ïa. No haamata noa ˈtura matou i te taa e mea maere mau â oia e te faahiahia roa, te haaputapû nei oia i te mafatu, te taoˈa nehenehe roa ˈˈe e painu noa ra na pihai iho i te mahana, tei puohuhia i to ˈna tapoˈi mǎhu ninamu o te reva, o te hamani e o te horoa mai i ta ˈna iho oxygène, o te faanaho i ta ˈna iho azote mai te mataˈi mai i roto i to ˈna iho repo, o te faatupu i ta ˈna iho huru mahana i nia i te mau uru raau haumi, o te patu i ta ˈna iho apu mai te mau tuhaa oraora: te mau mato puˈa, te mau aˈau, te mau tapao tahito o te mau mea ora matamua o tei tapoˈihia e te mau mea ora apî o te tuea paatoa ra ati aˈe te fenua nei.”

Teie ïa te tahi mau faanahoraa ta Iehova i haamau ia tamau noa te fenua i te ohipa mai te hoê ô haviti no te huitaata nei, te hoê fare i poietehia no te vai noa e a muri noa ˈtu no te mau taata e no te mau mirioni ohipa ora ê atu aita i faahitihia. Teie ta te Salamo 104:5 e parau ra: “Na oe i haamau i te tumu o te fenua, ia ore roa ia aueue.” Ua haapapu te tahi atu ite tei faauruahia i teie vai-tamau-raa o te fenua: “Te ore nei te tahi ui, e te itea maira te tahi; area te fenua nei te vai noa nei â ïa.”—Koheleta 1:4.

Ua haafaahiahia roa te feia i maoˈahia i roto i te reva teitei i te nehenehe o te fenua, te taoˈa menemene aravihi e ohu ra i nia i to ˈna tereraa ati aˈe te mahana e ua faaite ratou i te faufaaraa no te huitaata nei ia haafaufaa i to ˈna haviti e ia haapao i te reira. Teie te poroi ta te taata i maoˈahia na roto i te reva ra o Edgar Mitchell i haapuroro i te pu no Houston, i to ˈna ite-matamua-raa i te fenua na nia mai i te reva teitei: “Ua riro oia mai te hoê taiamani anapanapa ninamu e te uouo . . . haaatihia e te mau vehî uouo e taviriviri mǎrû noa ra . . . , mai te hoê poe iti i roto i te hoê moana hohonu ereere tei î i te miterio.” Teie te tatararaa a te taata ratere na roto i te reva ra o Frank Borman: “Te fanaˈo ra tatou i te hoê palaneta haviti. . . . Te uiraa maere roa oia hoi no te aha i roto i te ao nei aita tatou e haafaufaa ra i te mau mea e vai ra ia tatou nei.” Teie ta te hoê o te feia tei tere atu i nia i te avaˈe na nia i te pahi reva Apollo 8 i faataa: “I roto i te ao taatoa o te reva teitei, ia hiˈo tatou i te mau vahi atoa, te vahi noa e itehia ˈi maa peni, o te fenua ïa. E nehenehe tatou e ite i reira i te ninamu o te mau miti, te mau peni ravarava o te fenua, e te mau peni uouo o te mau ata. . . . Tera te ohipa haviti roa ˈˈe ia mataitai, i nia i te mau raˈi atoa. Aita te mau taata i raro nei e taa ra i te mau mea e vai ra ia ratou ra.”

Te faaite ra te mau tupuraa e e parau mau iho â—aita te mau taata e haafaufaa ra i te taoˈa faufaa e vai ra ia ratou. Maoti râ i te rave maitai i teie ô no ǒ mai i te Atua ra, te haaviivii nei e te haamou nei te huitaata nei i te reira. Ua ite atoa te feia i maoˈahia na te reva i te reira. Ua parau o Paul Weitz, e tomana no te tere matamua o te pahi pao Challenger, e mea “hairiiri” te ino i ravehia e te taata i nia i te reva teitei o te fenua nei ia hiˈohia mai te reva mai. “Ma te peapea, te riro oioi nei teie nei ao mai te hoê palaneta taero.” Teie ta ˈna i parau faahou: “Eaha ïa te poroi? Te haaviivii nei tatou i to tatou nohoraa.” E te tupu nei iho â teie haamouraa uˈana riaria i teie “anotau hopea.” Ua faahiti o Iehova i ta ˈna haavaraa i nia i te feia e faaino ra i te fenua, oia hoi, e ‘e haamou ai oia i te feia e faaino ra i te fenua nei.’—Apokalupo 11:18.

Te hoê totaiete miimii eita e tia ia fanaˈo i te ô a te Atua

Ua huna roa te hoê totaiete nounou taoˈa i te mau faufaa i te pae varua no te rave i te mau ohipa i te pae tino. Ua tuuhia i te hiti te mau aratairaa ohie ta Iehova i horoa na te huitaata nei ia ite oia i te oaoa e te mauruuru i roto i te oraraa na roto i te maraaraa o te haapao-miimii-noa-raa ia ˈna iho o te itehia ra i to tatou nei tau.

Te faataa tia roa ra te Timoteo 2, 3:1-5 i te anotau ino mau o ta tatou e ora nei: “E tupu te ati rahi i taua anotau hopea nei, ia ite mai oe. E riro te taata nei ei miimii, e nounou moni, e faaahaaha, e teoteo, e faaino, e faaroo ore i te metua, e mauruuru ore, e te viivii, e aroha ore, e tahemo parau au, e pari haavare noa, e haapao ore, e iria, e te au ore i te taata maitatai ra, e haavare, e mârô, e faateitei, e te hinaaro i te mau mea e navenave ai ra aore hinaaro i te Atua, e hohoˈa paieti hoi to ratou, o te puai râ o te reira ra, ua hunahia ïa ia ratou, e fariu ê oe i te reira.”

Te faaitoito nei te tapihooraa taoˈa ia hoo rahi, e o te faatianianiraa ïa to ˈna rima tauturu. E rave rahi faatianianiraa tano; e rave rahi atoa i te mea tano ore. Te tano ra teie huru hopea e te manaˈo o Eric Clark i roto i The Want Makers: “Aita te faatianianiraa e tauturu noa ra ia hoo atu i te mau taoˈa ino i te mau taata eita ta ratou e nehenehe e aufau, e pinepine râ ratou i te hoo atu i te faito moni rahi roa.” Teie ta Alan Durning no te World Watch e parau ra: “Aita te feia faatianiani e hoo atu ra i te mau taoˈa, tera râ te mau huru oraraa, te mau haerea, te mau moemoeâ, na roto i te haafaufaaraa i ta ratou mau taoˈa no te faatupu i te mau hiaai uˈana.” Te tapao a te faatianianiraa, o te haapeapearaa ïa ia tatou i te mau mea e vai ra ia tatou e ia hinaaro tatou i te mau mea e ere i te mea faufaa roa. Te faatupu ra te reira i te hoê hiaai mâha ore; te aratai nei te reira ia hoo rahi roa mai; te faaitoito nei te reira i te parareraa o te mau faarueraa pehu o te haaviivii ra i te fenua nei. Te ô riirii noa ra ta ˈna aratoraa haavarevare i roto atoa i te mafatu paruparu o te feia veve. E rave rahi taata faatianiani o te hoo rahi nei i te mau taoˈa o tei matauhia e e haapohe i te mau taata aore ra o te faatupu i te maˈi.

Te mea faufaa râ, o to tatou ïa tiaraa i mua i te Atua, mai ta te Koheleta 12:13 e parau ra: “E faaroo na tatou i te faaotiraa o taua mau parau nei: o te Atua te mǎtaˈu atu, e haapao hoi i ta ˈna parau; o ta te taata atoa ïa e ati noa ˈˈe.” E fanaˈo te feia e na reira i te ora i roto i te Paradaiso mâ a Iehova! Teie ta Iesu i tǎpǔ: “Eiaha e maere i te reira; te fatata mai nei hoi te hora e faaroo ai te feia atoa i roto i te apoo ra i tana reo, e e haere mai i rapae; e te feia i mau na i te parau maitai ra, e tia mai ïa e rave i te ora; e te feia hoi i mau na i te parau ino ra, e tia mai ïa e rave i te pohe.”—Ioane 5:28, 29.

Ia haafaufaahia te ô a te Atua

E auê ïa fenua nehenehe roa te itehia! Teie te faataaraa putapû mau no te reira ta Iehova i horoa mai na tatou: “E ite atura vau [Ioane] i te raˈi apî e te fenua apî; ua mou hoi tei mutaa iho raˈi, e tei mutaa ihora fenua; e aore aˈera e miti. E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”—Apokalupo 21:1, 4.

I roto i te mau mea tahito ra e ore atoa te mau faarueraa pehu, te mau pehu taero, e te feia atoa e faarue nei i ta ratou mau pehu i nia ia vetahi ê. I muri iho te feia anaˈe o te ora i nia i te fenua o te feia ïa e here nei i to ratou mau taata tapiri mai ia ratou iho, o te arue nei ia Iehova no ta ˈna ô o te fenua nei, e o te oaoa nei i te rave maitai i te reira e te atuaturaa i te reira i roto i te mau huru tupuraa paradaiso.—Mataio 22:37, 38; Petero 2, 3:13.

[Tumu parau tarenihia i te api 22]

Te faufaa-ore-raa o te nounou taoˈa

Ua faahiti o Iesu i te hoê parau mau putapû i to ˈna faaararaa: “E ara ia outou i te nounou taoˈa, rahi noa iho hoi ta te taata nei taoˈa, e ere hoi tei taua taoˈa na ˈna ra to ˈna ora.” (Luka 12:15) E ere ta tatou mau ohipa i te mea faufaa roa; o to tatou râ huru iho te mea faufaa. E mea ohie roa ia apiti atu i roto i te anaanataeraa o te oraraa—te imiraa i te moni, te haaputuraa i te mau taoˈa, te hiaai maamaa e fanaˈo i te mau faaanaanataeraa o te tino—e ia manaˈo e te ora nei tatou i te hoê oraraa î maitai, aita e erehia i te tahi mea, ia erehia anaˈe tatou i te tahi mea ta te hoê oraraa maitai roa ˈˈe.

I te taime noa e ore mǎrû noa ˈi te oraraa e taa ˈi ia tatou e ua pau tatou. Te taa ra ia tatou i te parau mau o ta te Bibilia e parau ra: E mea poto roa te oraraa—te hoê rupehu e moe ra, te hoê au auahi o te avaava, te hoê hutiraa aho, te hoê ata e tere ra, te aihere matie e mǎrô ra, te hoê tiare e maemae ra. Te haere ra te reira ihea? Eaha ta tatou i rave na? No te aha tatou e vai ai i ǒ nei? Te reira mau anei? Te faufaa-ore-raa o te mau ohipa faufaa ore, te hoê tutavaraa i muri aˈe i te mataˈi?—Ioba 14:2; Salamo 102:3, 11; 103:15, 16; 144:4; Isaia 40:7; Iakobo 4:14.

Te mataitai noa ra te hoê taata i roto i te hoê fare maˈi, pohepohe, na roto i te haamaramarama, i te hoê aivi hitihia i te mahana haumǎrû, te anoiraa te aihere i te zizania, te tahi mau tiare pohepohe rii, te hoê manu rii e heru ra i te repo no te tahi mau huero—maa hohoˈa rii noa no te haaputapû. No te taata râ i pohehia i te maˈi, e mea nehenehe ïa. Na te hoê hiaai uˈana peapea e turai ra ia ˈna ia manaˈo i te tahi noa mau ohipa oaoa tei erehia e ana, te tahi mau ohipa rii e mea faufaa roa no ˈna. Fatata te reira mau mea atoa i te moe!

Teie ta te mau Papai Heleni a te Bibilia e faataa maramarama ra: “Aita roa hoi a tatou e taoˈa i hopoi mai i teie nei ao; e ua itea-papu-hia hoi e aita roa e taoˈa e tia ia hopoi atoa ia haere ê tatou ra. E teie nei, e maa ta tatou, e te ahu, ia mauruuru tatou i te reira.” (Timoteo 1, 6:7, 8) Teie ta te mau Papai Hebera e parau ra no nia i te tupuraa mau: “Mai ia ˈna hoi i fanau tahaa noa mai mai te opu mai o te metua vahine ra; e na reira hoi oia ia hoˈi ra, mai ia ˈna hoi i haere maira; aita hoi a ˈna e faufaa i noaa i ta ˈna ohipa i rave ra, e tia ˈi ia ˈna ia hopoi atoa ˈtu.”—Koheleta 5:15.

[Faaiteraa i te fatu o te hohoˈa i te api 19]

Hohoˈa a te NASA