Te hautiraa moni—Te faatîtîraa no te mau matahiti 90

E HUTI iho â te hoê taviri hohoˈa e ripene penihia to roto i te mata. Ua î te hohoˈa i nia e piti api i roto i te hoê vea no te Sabati—e nehenehe e ite-maitai-hia te hoê fare vairaa tauihaa rahi o tei faarirohia ei fare hautiraa bingo, tau tausani metera tuea te rahi, e mea tere oia no te hautiraa pere a te mau taata faatere e ua rau te matahiti e te peni o te iri. A hiˈo na i to ratou hohoˈa mata rohirohi e to ratou mata uteute, e mau tapao anaˈe teie no te rahiraa hora hautiraa? Te tiai noa ra ratou ma te taiâ i te taime e faaitehia ˈi te numera o te faataa mai, ma te tiaturi, e ua re ratou i te hoê po manuïa ore.

A huri na i te mau api o te vea. Te ite ra anei outou i te hohoˈa mata tapitapi o te mau taata e ua î roa to ratou rima i te mau pere, e te mǎtaˈuraa e ia matara mai te mau pere manuïa ore? I roto e rave rahi tupuraa, e mau tausani dala marite te noaa mai e o te mâuˈa ra i te hutiraahia mai te pere i muri iho. A feruri na hau aˈe i te mataitai noa i te mau hohoˈa. Te ite ra anei outou e ua rarirari te mau apu rima no to ratou taiâ? Te faaroo ra anei outou i te otuituiraa vitiviti o te mafatu, te pure mamû noa no te ani e ia huti mai i te hoê pere tano roa ˈˈe i muri iho e ia pau te tahi atu mau taata pere?

A haere na i roto i te mau piha hautiraa moni unauna i roto i te mau hotela moni e i nia i te mau pahi o te anavai. Aita anei outou e moe ra i roto i te hoê anairaa matini moni penihia e te mau û ieie? Aita anei to outou tariˈa e turituri ra i te maniania ia hutihia mai te mau tapearaa e ia ohu anaˈe te porotaa? Ma te ore roa ˈtu e haapeapea e manuïa anei aore ra e pau ratou, ua riro teie faaohuraa mai te hoê pehe i roto i te tariˈa o te mau taata hauti. “Te ohipa mahutahuta no ratou oia hoi te oaoa no te ohipa e tupu ia huti faahou ratou i te tapearaa o te matini moni,” o ta te taata faatere o te hoê vahi hautiraa moni ïa i parau.

A haere atu na na roto i te nahoa taata i te vahi e vai ra mau huira pere tei î roa i te taata. E nehenehe te ohuraa o te huira e to ˈna mau peni uteute e te ereere e faataoto ia outou. E apiti atoa mai te toparaa o te poro. Te tamau noa ra te huira i te ohu, e te faataa ra te vahi i reira oia e faaea ˈi i te taa-ê-raa i rotopu i te manuïaraa e te pauraa. E mea pinepine e mau tausani dala marite tei mâuˈa i nia i te hoê noa faaohuraa o te huira.

A tataiahuru tausani na i te mau hohoˈa e te mau ohipa e tupu ra, te feia pere e rave rahi mirioni, e te mau fare hautiraa e tausani ïa na te ao nei. Na nia mai te feia pere i te manureva, te pereoo auahi, te pereoo mataeinaa, te pahi, e te pereoo na te mau vahi atoa o te ao nei no te haamâha i to ratou hiaai e pere. Ua piihia oia “te maˈi huna, te faatîtîraa no te mau matahiti 90: Hautiraa pere mâha ore.” “Te tohu nei au e e itehia te hoê maraaraa rahi roa o te hautiraa pere faatiahia e te ture i roto i te aamu o te mau matahiti 1990 e ati noa ˈˈe te ao nei,” o ta te taata maimi ra o Durand Jacobs ïa i parau, te hoê mana faatere i te mau Hau Amui i nia i te hautiraa moni.

Ei hiˈoraa, i te mau Hau Amui, i te matahiti 1993 mea rahi aˈe te mau taata no Marite o te haere i te mau piha hautiraa moni maoti râ i te mau aua hautiraa popo baseball a te mau pǔpǔ rarahi—92 mirioni feia mataitai. E au ra e te patu-noa-hia ra te mau fare hautiraa moni apî aita e hopearaa. E mea ieie roa te mau fatu hotela i te pae Hitia o te râ ma. “Fatata roa e aita e navai te mau piha no te farii mai e tau 50 000 feia pere i te mahana hoê.”

I te matahiti 1994, i roto e rave rahi hau i te pae apatoa, e aita i maoro aˈenei ua riro te hautiraa moni ei hapa, te tiaihia ra i teie nei i te mau uputa e te mau pupuhi e ua faarirohia te reira mai te hoê faaora. “I teie mahana, ua tia ia pii-faahou-hia te Feia e tiaturi nei i te Bibilia mai te Feia tiaturi rahi i te pere ra black jack, i roto i te mau piha hautiraa moni i nia i te mau pahi aore ra i nia i te fenua e ati noa ˈˈe te mau hau no Mississippi e no Louisiane e te opuahia ra e hamani rahi atu â i Floride, Texas, Alabama e i Arkansas,” o ta te U.S.News & World Report ïa i tapao. Ua taui roa te tahi mau aratai faaroo i teie nei i to ratou manaˈo no nia i te hautiraa moni e ere ïa i te hoê hara. Ei hiˈoraa, i te taime a avari ai te mau taata toroa a te hau i Nouvelle-Orléans, i Louisiane, i ta ratou vahi hautiraa moni matamua i nia i te pahi i te Anavai Mississippi i te matahiti 1994, ua faaoti te hoê ekalesiatiko i te hoê pure, ma te haamauruuru i te Atua no “te neheneheraa e pere: te hoê huru maitai” o ta ˈna ïa i parau, “i haamaitai ai o ˈna i te oire.”

I te matahiti 2000, te manaˈohia ra e ora 95 i nia i te hanere o te taatoaraa o te mau taata no Marite i te hoê atearaa e 3 aore ra e 4 hora na nia i te pereoo mai to ratou fare i te vahi hautiraa moni. Ua fanaˈo atoa te mau inidia no Marite i te hoê tuhaa rahi o te tapihooraa o te hautiraa moni. No reira te faatereraa i te Hau Amui no Marite i faautua ˈi i to ratou faaohiparaa e 225 piha hautiraa moni e te mau piha hautiraa bingo e tane moni tei pariehia na te mau fenua atoa, o ta te U.S.News & World Report ïa i tapao.

Ia anoi-anaˈe-hia te mau piha pereraa, te mau parieraa moni no te mau ohipa tuaro, te faatitiauaraa puaahorofenua e te uri, te bingo i roto i te fare pureraa, e te tahi atu â mau ohipa mai te reira te huru, te taa-maitai-hia ra e ua parie te mau taata no Marite e 394 miria dala marite o tei faatiahia e te ture i te matahiti 1993, oia hoi e 17,1 i nia i te hanere maraaraa i nia i te matahiti i mairi aˈenei. Te hepohepo nei te feia e patoi nei i te hautiraa moni. “Te tuhaa rahi roa ˈˈe e vai nei ia tatou no te tauturu i te mau taata o te mau fare pureraa e te mau hiero e te faatereraa ïa,” o ta te taata faatere rahi o te hoê Apooraa no te Hautiraa moni mâha ore i parau. “I teie nei râ, ua faaô atoa te taatoaraa o teie mau faanahonahoraa faaroo e te faatereraa i roto i te ohipa tapihooraa o te hautiraa moni.” Ua pii te hoê vea no Marite i te mau Hau Amui mai te hoê “Nunaa Pere” e ua parau oia e ua riro te hautiraa moni ei “haamâuˈaraa taime mau no te fenua Marite rahi.”

Ua haamata te fenua Beretane i ta ˈna ohipa pereraa mai te matahiti 1826 mai, e te parauhia ra e tane titeti tei hoohia. Te ite-atoa-hia ra te hoê maraaraa riaria o te hautiraa bingo, o ta The New York Times Magazine i tapao. “Ua î roa o Moscou i te mau piha hautiraa moni tei taatahia. E ua ineine roa te feia pere no Lebanona i te pohe no te putuputu atu i roto i te mau fare pereraa i Beyrouth Tooa o te râ o tei haru-atoa-hia e te mau nuu faehau e te mau pǔpǔ faaroo etaeta,” o ta te Times ïa i tapao. “E faahoˈi-roa-hia te feia pere tei tano rahi i to ratou fare na te mau tiai o te piha hautiraa moni e ta ratou mau pupuhi.”

“Aita te feia no Kanada e taa maitai ra e nunaa taata pere ratou,” o ta te hoê taata hiˈopoa i te hautiraa moni ïa no te mataeinaa i Kanada i parau. I roto i te tahi mau tuhaa, e mea teitei aˈe paha te faito o te hautiraa moni i Kanada i te mau Hau Amui no Marite,” o ta ˈna ïa i parau faahou. “Ua haamâuˈa te mau taata no Kanada hau atu i te 10 miria dala marite i roto i te mau parieraa tei faatiahia e te ture e te mau tuuraa moni i te matahiti i mairi aˈenei—fatata e 30 taime hau aˈe i ta ratou e haamâuˈa nei no te haere e mataitai i te mau hohoˈa teata,” o ta te vea ra The Globe and Mail ïa i tapao. “E mea maraa rahi roa ˈˈe te tapihaa bingo i Kanada i tei tupu aore ra o te tupu ra i te mau Hau Amui no Marite. E mea hoo-rahi-hia aˈe te mau titeti taviriraa i Kanada. E mea mau atoa no te faatitiauaraa puaahorofenua,” o ta te vea ïa i parau.

“Aita e taata i ite e ehia rahiraa taata o te faatîtîhia ra e te hautiraa moni i Afirika Apatoa,” o tei papaihia i roto i te hoê vea no Afirika Apatoa, “tera râ e ‘mau tausani’ rahiraa.” Tera râ, ua ite maitai te faatereraa Paniora i taua fifi ra e te maraaraa o te feia pere. Te faaite ra te mau numera hopea e e rave rahi o na 38 mirioni taata i reira tei haamâuˈa i roto i te pereraa moni e 25 miria dala marite i te matahiti hoê, o tei tuu i te fenua Paniora i nia i te hoê faito teitei roa ˈˈe na te ao nei. “E feia pere mâha ore te mau taata i Paniora,” o ta te hoê taata ïa i parau o tei haamau i te hoê taatiraa no te tauturu i te feia pere. “Mai te reira noa iho â ratou. . . . Te hauti nei ratou i roto i te mau faatitiauaraa puaahorofenua, i roto i te mau tueraa popo, te titeti taviriraa e, parau mau, te pereraa huira, te poker, te bingo e tera mau matini moni riaria.” I teie noa mau matahiti i mairi aˈenei, ua faarirohia te hautiraa moni mâha ore i te fenua Paniora mai te hoê faatîtîraa i te pae feruriraa.

Te manaˈohia ra ia au i te tahi haapapuraa e ua faatîtî-atoa-hia te fenua Italia e te hautiraa moni maamaa. E mau miria moni tei tuuhia i roto i te mau taviriraa e te mau ohipa tuaro i roto atoa râ i te mau hautiraa bingo faaitehia i roto i te mau vea e te mau pereraa i nia i te airaa maa. “Ua ô roa mai te hautiraa moni i roto i te mau tuhaa atoa o te oraraa i te mau mahana atoa,” o ta te hoê tabula ïa i parau o tei maimihia e te hoê pǔpǔ taata aufauhia e te faatereraa. I teie mahana “ua tae roa te hautiraa moni i te hoê faito teitei maere mau,” o ta The New York Times ïa i papai, “e te ru nei te mau huru taata atoa, mai te feia toroa a te Hau faatere e tae noa ˈtu i te mau perepitero a te paroita, i te titau rahi roa ˈˈe i te moni i roto i te ohipa pereraa.”

E parau mau iho â! I roto e rave rahi tupuraa te mana nei te hautiraa moni i nia i te mau tuhaa atoa o te oraraa o te mau taata, mai ta te mau tumu parau i muri nei e faaite mai.

[Parau iti faaôhia i te api 16]

Te hoê hara na mua ˈˈe—te hoê “faaora” ïa i teie nei

[Parau iti faaôhia i te api 17]

Te haere noa ra te maˈi pee o te hautiraa moni i te rahi