“Mai te mau fetia o te raˈi”
“E faarahi mau â vau i to huaai mai te mau fetia o te raˈi e mai te one tahatai.” (Genese 22:17) Tera ta te Atua i fafau i te patereareha Aberahama. Tera râ, ia au i te hoê neneiraa o te vea Bible Review, e au ra e te vai ra hoê fifi e tera irava.
Ia au i te aivanaa, mea tano te Bibilia a faaau ai i te numera o te mau fetia i te raˈi i te numera o te one tahatai. Tera râ, e au ra e aita te taata i na mua ˈˈe i ite e miria fetia i te raˈi. Te faataa ra te vea Bible Review: “Aita anaˈe e mauhaa hiˈo fetia, aita te taata e nehenehe e ite e miria fetia i te raˈi. Te parau ra te mau aivanaa hiˈo fetia e aita anaˈe e mauhaa, e nehenehe te mata e ite 2 000 noa aore ra 4 000 noa fetia, noa ˈtu mea ateatea maitai te raˈi.” Te na ô ra te buka The World Book Encyclopedia e “e 6 000 fetia o te pura maitai a nehenehe atu ai te taata e ite i te reira ma te ore e faaohipa i te ravea hiˈo fetia.”
Nafea ïa te Bibilia e nehenehe ai e horoa i tera faaauraa tano roa? Teie hoê faataaraa, oia hoi ua papaihia te Bibilia “i raro aˈe i te aratairaa a te varua o te Atua.” (Timoteo 2, 3:16) Ua patoi râ te vea Bible Review i tera faataaraa a parau atu ai e peneiaˈe e aivanaa hiˈo fetia o Aberahama. I muri aˈe i tera faahitiraa, ua tuuhia tera uiraa: “E mauhaa hiˈo fetia anei to te mau taata i na mua ˈˈe o tei faaite i te mau fetia ta to ratou mata i ore i ite?” No te turu i tera manaˈo, ua faahiti te vea e te vai ra te mau haapapuraa no nia i te faaohiparaa a Nineve e te tahi atu mau oire o te tau tahito i te kerehe mai te hoê mauhaa hiˈo fetia.
Tera râ, aita e haapapuraa e ua faaohipa iho â te taata i na mua ˈˈe i tera huru ravea no te hiˈo i te fetia. E mai te peu noa ˈtu ua itehia tera mau huru mauhaa hiˈo fetia, eaha te haapapu mai e ua noaahia te reira ia Aberahama aore ra i te taata papai i te Genese? No reira, mea papu roa te parau fafau a te Atua ia Aberahama. Hoê hiˈoraa noa tera i rotopu i te mau haapapuraa atoa e mea tano roa te Bibilia i te pae o te aivanaa. Ua tapao atoa te peropheta Ieremia i te hoê â manaˈo no nia i te mau fetia. E au ra e aita e mauhaa hiˈo fetia to ˈna a parau ai: “Mai te nuu o te raˈi eita e nehenehe e taiohia e te one o te miti eita e nehenehe e faitohia.”—Ieremia 33:22.
[Faaiteraa i te fatu o te hohoˈa]
Hohoˈa a te NASA