Hau atu i te hoê enemi haavî

E NEHENEHE te mauiui tamau e faaino roa i te oraraa o te mau taata. Te eiâ nei oia i to ratou hau, te oaoa, e te oraraa maitai, ma te faaino-roa-raa i te oraraa i haapohe ai vetahi ia ratou iho. Ua parau te taote ra o Albert Schweitzer e: “E mea riaria roa ˈtu â te mana o te mauiui i nia i te huitaata nei i to te pohe iho.”

Te mauiui rahi mau nei te tahi tau hanere mirioni taata. Ua parau te hoê taote tâpû no Farani e: ‘Mai te peu e e faatarerehia tatou aita e hopearaa i nia i te hoê apoo e e faaroo tatou i te arepurepuraa o te fenua, e au ra e te faaroo ra tatou i te uâraa natura o te huitaata e mauiui ra.’

I teie nei mahana, te puai mau nei â te mea ta te aposetolo kerisetiano ra o Paulo i papai hau atu e 1900 matahiti i teie nei: “Te uuru tahi nei te mau mea atoa i hamanihia nei ma te mauiui fanau ra e tae roa aˈenei i teie nei mahana.”—Roma 8:22.

Te fifi rahi o te oraora-maitai-raa

Te mauiui rahi nei hoê i nia i te 8 o te mau taata marite i te maˈi o te mau puoiraa ivi, te hoê huru matau-roa-hia o te rumati. E rave rahi atu â o te ite nei i te mauiui tua rahi. E tia ia vetahi ia faaoromai i te mauiui o te maˈi mariri ai taata e o te maˈi mafatu.

Tau mirioni o te mauiui ra i te fiva puai, te mauiui niho, te tui, te mau maˈi o, e rave rahi atu â mau maˈi e te mau pepe. Eita e maerehia i te mea e i te matahiti i mairi aˈenei, ua haamâuˈa te feia no Marite 2 100 000 000 tara marite no te mau raau tamǎrû anaˈe i te mauiui, aore ra ua piihia taua mauiui ra “Te maˈi pee huna o te fenua Marite.”

Ua parau o John J. Bonica, no nia paha i te mana rahi roa ˈˈe o te mauiui e: “Ia au i te tuhaa moni e ia au i te ati o te taata, ua hau aˈe te mauiui tamau e fatata i te taatoaraa o te tahi atu mau fifi o te oraora-maitai-raa ia amuihia.”

Te hoê oraraa aita e mauiui?

I mua i teie huru tupuraa paari mau, e au ra e e mea tia ore ia faahitihia te manaˈo o te hoê oraraa aita e mauiui. E au râ e e ere i te mea papu maitai te parau ta te Bibilia e faahiti ra oia hoi: “E na te Atua e horoi i to ratou roimata atoa; . . . e te oto, e te mihi, e te mauiui, e ore atoa ïa.”—Apokalupo 21:4.

Teie râ, e mea papu maitai te manaˈo o te hoê oraraa aita e mauiui. A feruri na i te hoê taime. Eaha mau na te auraa o taua irava ra? Te vai nei te mau taata i teie nei mahana e aita e mauiui ra. Ua fanauhia ratou e aita e mauiui. E tia anei ia faahinaaro i te reira? Ua parau te taata tuatapapa i te huru hamaniraa o te tino ra o Allan Basbaum e: “E ati mau ahiri e aita roa ˈtu e mauiui.”

Mai te peu e aita outou e ite ra i te mauiui, eita paha outou e ite e te tupu maira te hoê puu e tae roa ˈtu i te taime e riro ai ei maˈi aai mauiui ino roa. Ia au i te hoê parau apî, “i te tahi mau taime, e hauˈa te mau metua o te hoê tamahine iti aita oia e mauiui ra i te iri paapaa e e ite raua ia ˈna ia tapea i te umu.” No reira, ua hau atu â te mauiui i te hoê enemi haavî. E nehenehe atoa te reira e riro ei haamaitairaa.

Eaha ïa no te parau tǎpǔ a te Bibilia: “E te mauiui, e ore atoa ïa”? E ere anei teie te hoê parau tǎpǔ ta tatou e hinaaro mau ra ia tupu?

Te hoê oraraa aita e roimata?

A tapao e te parau atoa ra taua irava ra e: “E na te Atua e horoi i to ratou roimata atoa.” (Apokalupo 21:4) E auraa to te reira, no te mea e mea faufaa te roimata. Te paruru nei te reira ia tatou, mai ta te mauiui e rave ra.

E faararirari noa te reira i te mata e e faaohie i te uiuiraa o te mata e te arumata. E tamâ atoa oia i te mau taoˈa ěê e ô i roto i to tatou mata. Hau atu, te vai ra i roto i te roimata te hoê taoˈa paruru piihia te lysozyme [pape faatahe i te mau taoˈa faatupu maˈi], o te tamâ i te mata e e arai i te maˈi. E tuhaa faahiahia te taheraa te roimata o to tatou tino tei poiete-nehenehe-hia, mai te mauiui ra.—Salamo 139:14.

E mea piri atoa hoi te taairaa i rotopu i te roimata e te peapea, te oto, e te inoino. “Te rari nei tau roi i te mau rui atoa nei,” o ta te arii Davida i te mau tau bibilia i parau ma te oto. “Tau roimata te faarari i to ˈu nei roi.” (Salamo 6:6) Ua “oto ihora Iesu” i te poheraa o te hoê hoa. (Ioane 11:35) I te omuaraa, aita te Atua i opua e ia taˈi te mau taata no te peapea. O te hara a te taata matamua ra o Adamu te tumu o te huru tia ore, e te pohe o te utuafare taata nei. (Roma 5:12) No reira, o te roimata no roto mai i to tatou huru taata tia ore e te pohe o te ore roa.

I te mea hoi e te faahiti ra te Bibilia i te tahi huru roimata o te faaorehia, nafea ïa te parau tǎpǔ no nia i te oreraa i te mauiui ia tupu? Eita iho â ïa te mau taata, i te tahi noa ˈˈe taime, e mauiui faahou no te peapea e te mihi?