Te haapii ra anei te Parau a te Atua no nia i te ora-faahou-raa i roto i te hoê tino ê atu?
TE TAATA e tuatapapa i te Bibilia e itea ˈtu ia ˈna i te haapapuraa no nia i te parau no te ora-faahou-raa i roto i te hoê tino ê atu, e riro mau â ïa oia i te ore e mauruuru. Aita e vahi i roto i te Bibilia e itehia ia outou e ua ora aˈenei te taata i te hoê oraraa na mua ˈtu. Hau atu, eita outou e ite i te mau parau mai te “ora-faahou-raa i roto i te hoê tino ê atu” aore ra “te tauiraa te nephe i te tino” aore ra “nephe pohe ore” i roto i te Bibilia.
Tera râ, te tamata nei te tahi mau taata e tiaturi ra i te parau no nia i te ora-faahou-raa i roto i te hoê tino ê atu, i te faataa i teie vahi e ore e turuhia ra e te Bibilia na roto i te parauraa e no te pinepine te parau no nia i te ora-faahou-raa i roto i te hoê tino ê atu i tahito ra, eita ˈtura te haamaramaramaraa e papu maitai. Parau mau, mea tahito roa te haapiiraa no nia i te parau no te ora-faahou-raa i roto i te hoê tino ê atu, noa ˈtu râ to ˈna tahito aore ra mea matauhia aore ra eita, te vai noa nei â teie uiraa, Te haapii maira anei te Bibilia i te reira?
I roto i te Timoteo 2, 3:16, 17, teie ta te aposetolo Paulo i papai: “Te mau parau moˈa atoa i papaihia ra e mea faaurua mai ïa e te Atua, e e mea maitai ei haapiiraa, ei aˈoraa, ei faaiteraa hapa, ei faaite mai i te parau-tia ra; ia au roa te taata no te Atua i te mau ohipa maitatai atoa ra.” Oia mau, e Parau faaruahia te Bibilia na te Atua, no te fetii taata nei. E mai ta Paulo i papai, e tauturu o ˈna i te mau taata aau maitai ia “au” roa ratou no te pahono i te mau huru uiraa atoa no nia i te oraraa, e tae noa ˈtu i te mau uiraa no nia i te oraraa i mutaa ihora, i teie nei, e a muri aˈe.
Te haapapu atoa ra o Paulo e: “A farii mai ai outou i te parau a te Atua i ta outou i ite ia matou nei, aore outou i farii ei parau na te taata, ei parau râ na te Atua.” (Tesalonia 1, 2:13) Inaha, i te mea hoi e i roto i te Bibilia e itehia i te mau manaˈo o te Atua, eiaha râ to te taata tia ore nei, eita ïa tatou e maere ia ite tatou e e pinepine te Bibilia i te taa ê i te mau manaˈo o te taata noa ˈtu â ïa e ua tui te roo o teie mau manaˈo i roto i te roaraa o te mau matahiti. Tera râ, e riro paha outou i te parau e, ‘aita anei te Bibilia, i roto i te tahi mau vahi, e faaau maira i te manaˈo no nia i te parau no te ora-faahou-raa i roto i te hoê tino ê atu?’
Te mau irava i faataa-hape-hia
Te parau ra te feia e tiaturi i te parau no nia i te ora-faahou-raa i roto i te hoê tino ê atu e te faahiti poto ra te Bibilia i te parau i roto i te Mataio 17:11-13, i reira to Iesu faatuatiraa ia Ioane Bapetizo i te peropheta tahito ra o Elia. Teie ta taua mau irava e parau ra: “E na mua mau â hoi Elia e faatia i te mau mea atoa ra. E parau atu râ vau ia outou, ua reva mai na Elia . . . Ite atura te mau pǐpǐ e o Ioane Bapetizo ta ˈna i parau mai ia ratou ra.”
Ia ˈna i faahiti i te reira, te hinaaro ra anei o Iesu e parau e o Ioane Bapetizo ra o te peropheta ïa o Elia i hoˈi faahou mai? Ua ite o Ioane iho e ere roa ˈtu. I te hoê taime, a anihia ˈtu oia e, “O Elia anei oe?” ua pahono maramarama maitai atura o Ioane e: “E ere au.” (Ioane 1:21) Ua faaite-atea-hia mai râ e e na mua mai o Ioane i te Mesia “ma te aau itoito e te mana.” (Luka 1:17; Malaki 4:5, 6) Te auraa mau, o “Elia” o Ioane Bapetizo ïa i te mea ua rave o ˈna i te hoê ohipa e nehenehe e faaauhia i te ohipa i ravehia e Elia.
I roto i te Ioane 9:1, 2, teie ta tatou e taio: “E te haere noa ra oia [Iesu] ra, e ite atura oia i te hoê taata matapo mai te fanauraa mai â. Ua ui maira ta ˈna mau pǐpǐ ia ˈna, na ô maira, E rabi, na vai te hara; na ˈna iho anei, e na na metua anei, i fanau matapo mai ai oia?” Te parau ra vetahi e tiaturi ra i te haapiiraa no nia i te ora-faahou-raa i roto i te hoê tino ê atu e i te mea hoi e e matapo taua taata ra mai to ˈna mai â fanauraahia mai, ua tupu ïa ta ˈna mau hara i roto i te hoê oraraa na mua ˈtu.
Tera râ noa ˈtu eaha te huru i ui atu ai te mau pǐpǐ i te uiraa, e riro te pahonoraa ta Iesu i horoa ei pahonoraa faufaa roa. Teie ta ˈna i parau: “E ere i to te hara a teie nei taata e te hara a na metua ra.” (Ioane 9:3) Te patoi ra te reira i te parau no te ora-faahou-raa i roto i te hoê tino ê atu, oia hoi te mau huru paruparu o te mau hara ïa i ravehia i roto i te oraraa na mua ˈtu te tumu. Ua haapapu-atoa-hia te manaˈo ra eita te tino e nehenehe e hara hou aˈe e fanauhia mai ai, na Paulo ia ˈna i papai no nia ia Esau raua o Iakoba e “Aita hoi te tamarii i fanau, aore hoi i rave i te maitai e te ino.”—Roma 9:11.
Tia-faahou-raa, eiaha te ora-faahou-raa i roto i te hoê tino ê atu
Noa ˈtu e aita te Bibilia e turu ra i te parau no te haapiiraa no nia i te ora-faahou-raa i roto i te hoê tino ê atu, aita e faufaa i te taata ia ore e mauruuru. Te pûpû maira te poroi a te Bibilia i te hoê manaˈo mahanahana aˈe i te manaˈo no te fanau-faahou-raahia i roto i te hoê ao tei î i te ino, te peapea, te oto, e te pohe. E ere noa te manaˈo ta te Bibilia e pûpû ra i te mea mahanahana, o te parau mau atoa râ, o te Parau a te Atua iho.
Mai teie te huru to Paulo faataaraa mai i teie haapiiraa faaitoito mau: “Te tiaturi nei au i te Atua . . . e e tia-faahou-raa to tei pohe, te feia parau-tia e te feia parau-tia ore.” Te parau ra “tia-faahou-raa,” aore ra te tahi atu huru to ˈna, e itehia ïa e 50 taime i roto i te mau Papai heleni kerisetiano, e te faahiti ra o Paulo no taua parau ra mai te hoê haapiiraa matamua o te faaroo kerisetiano.—Ohipa 24:15; Hebera 6:1, 2.
Te tia-faahou-raa mai te pohe mai, te auraa ra te vai mau ra te pohe. Aita roa ˈtu e vahi i roto i te Bibilia, e itea outou ia faahitihia i te parau no te hoê nephe pohe ore. Mai te peu e e nephe pohe ore to te taata tei taa ê i te tino i te poheraa e o tei haere atu i roto i te raˈi no te ora e a muri noa ˈtu aore ra i roto i te po auahi aore o tei ora faahou i roto i te hoê tino ê atu, aita ïa e faufaa te hoê tia-faahou-raa. I te tahi aˈe pae, te faaite ra te tahi hanere irava e e pohe te nephe taata e e mou oia. Te haapapu maitai ra te Bibilia no nia i te pohe mai te oreraa e ora, oia hoi te oreraa e vai mai e patoi ra i te parau no te vairaa mai.
Te pohe, aore ra te oreraa e vai mai, o te utua ïa no te hara a Adamu raua o Eva i te Atua. E utua te reira, e ere râ i te eˈa no te tomo atu i roto i te hoê oraraa pohe ore i te tahi atu vahi. Ua haapapu maitai mai te Atua e e hoˈi â raua i te vahi no reira mai raua—te repo fenua: “No reira mai hoi oe; e repo hoi oe, e e hoˈi faahou atu â oe i te repo.” (Genese 3:19) Aita to raua e nephe pohe ore hou aˈe raua i poietehia ˈi e te Atua e a tuuhia mai ai i nia i te fenua nei, i roto i te ǒ i Edene, e aita atoa hoi i muri aˈe raua i pohe ai.
Te tia-faahou-raa mai te pohe mai, e nehenehe ïa e faaauhia i te araraa mai te taoto, aore ra i te hoê taime tamǎrûraa tino. E hiˈoraa, ua parau atura o Iesu ia Lazaro o ta ˈna e haere ra e faatia mai te pohe mai e: “Ua taoto . . . o Lazaro, te haere nei râ vau e faaara ia ˈna.” (Ioane 11:11) No nia i te peropheta o Daniela, teie ta tatou e taio: “E haere râ oe e tae noa ˈtu i te hopea: e faaearaa hoi to oe, e mau hoi oe i to oe kelero ia tae i te hopea o te mau mahana ra.”—Daniela 12:13.
Te ora mure ore i nia i te fenua nei
Eaha ïa te hopea o te feia e faatiahia mai te pohe mai? Te faahiti ra te Bibilia i te parau no e piti huru tia-faahou-raa—hoê i nia i te raˈi e hoê i nia i te fenua nei. E riro te tia-faahou-raa i nia i te fenua nei ei tuhaa no te pae rahi o te feia i ora e i pohe aˈenei. Mea iti roa te feia e faatiahia no te ora ˈtu i nia i te raˈi i roto i te Basileia o te Atua. (Apokalupo 14:1-3; 20:4) Afea ïa te tia-faahou-raa i nia i te fenua nei e haamata ˈi? E haamata ïa i muri aˈe teie nei amuiraa iino e haamouhia ˈi e te Atua e “te hoê fenua apî” te hoê totaiete taata apî parau-tia, e riro mai ai ei parau mau.—Petero 2, 3:13; Maseli 2:21, 22; Daniela 2:44.
I roto i te “fenua apî,” aita e maˈi faahou aore ra e mauiui faahou. Eita atoa te pohe e ite-faahou-hia e monohia mai râ te reira na te ora mure ore. “E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.” (Apokalupo 21:4) Teie atoa ta te papai salamo i faaite atea mai: “E parahi te feia parau-tia i nia i te fenua, e parahi tamau â ratou i reira.” (Salamo 37:29) Teie atoa ta Iesu i parau: “E ao to tei mǎrû; e riro hoi ia ratou te fenua.”—Mataio 5:5.
A faaau i teie mau parau tǎpǔ rarahi mau a te Atua i te haapiiraa no nia i te ora-faahou-raa i roto i te hoê tino ê atu. Ia au i taua manaˈo ra, mai te huru ra ïa e te hoˈi faahou atura outou i roto i tera tau i muri aˈe i tera tau no te ora ˈtu â i roto i teie nei â amuiraa tahito iino o te mau mea. Te auraa ra, e tamau â outou i te haaatihia e te ino, te mauiui, e te maˈi, e e pohe atu i roto i te hoê faanahoraa aita e hopearaa. Aita roa ˈtu ïa to te reira e tiaturiraa!
No reira, mai teie te huru ta te Bibilia pahonoraa i te mau uiraa, Ua ora aˈenei anei outou i mutaa ihora? E e ora faahou anei outou? Aita, aita outou i ora aˈenei i roto i te tahi atu oraraa i teie nei oraraa nei. Tera râ, e nehenehe outou e haamaoro atu â i to outou oraraa, e ora e a muri noa ˈtu. I teie mahana, i teie “mau mahana hopea” o teie faanahoraa, e nehenehe outou e tiaturi e ora ˈtu mai roto atu i te hopea o teie nei ao e e tomo atu i roto i te ao apî a te Atua ma te ore roa ˈtu e pohe. (Timoteo 2, 3:1-5; Apokalupo 7:9-15) Aore ra mai te peu e pohe outou hou aˈe te ao apî a te Atua e tae mai ai, e nehenehe e noaa ia outou i te tiaturiraa e faatia-faahou-hia mai outou mai te pohe mai no te ora e a muri noa ˈtu i roto i te hoê paradaiso i nia i te fenua nei.—Luka 23:43.
Ia faatupu outou i te faaroo i roto ia Iesu, noa ˈtu eaha te ohipa e nehenehe e tupu mai, e tano atoa ïa te mau parau a Iesu ia Mareta a pohe ai to tuaana o Lazaro no outou: “Tei ia ˈu te tia-faahou-raa e te ora, o te faaroo mai ia ˈu ra, pohe noâ oia e ora â ïa. E te taata ora atoa nei e faaroo ia ˈu ra, e ore roa ˈtu ïa e pohe.”—Ioane 11:25, 26.
[Parau iti faaôhia i te api 8]
Aita to Adamu e nephe pohe ore, ua hoˈi râ oia i raro i te repo ia ˈna i pohe
[Hohoˈa i te api 9]
Te haapii ra te Parau a te Atua i te tia-faahou-raa, eiaha te parau no te ora-faahou-raa ˈtu i roto i te hoê tino ê atu