Te faataaraahia te parau no te ora-faahou-raa i roto i te hoê tino ê atu

TE HOÊ o te mau manaˈo faahapa i te haapiiraa tumu ore no nia i te parau no te ora-faahou-raa i roto i te hoê tino ê atu inaha, aita ïa te rahiraa o te taata i nia i te fenua nei e haamanaˈo ra e ua ora ê na ratou na mua ˈtu. Hau atu, aita atoa ratou e manaˈo ra e ua nehenehe ratou e ora na mua ˈtu.

Parau mau, i te tahi taime e huru ê na tatou ia ite atu tatou i te hoê taata a tahi ra tatou e farerei ai. E riro e ua ite aˈena tatou i te hoê paha fare, te hoê oire, aore ra te tahi huru tupuraa, noa ˈtu â ïa e a tahi nei tatou e haere atu ai i taua vahi ra. E nehenehe râ hoi teie mau mea e faataahia ma te ore e faaohipa i te haapiiraa tumu ore no nia i te ora-faahou-raa i roto i te hoê tino ê atu.

Ei hiˈoraa, e nehenehe te tahi mau vahi noa ˈtu to ratou atea te tahi i te tahi, e hohoˈa maitai te tahi i te tahi, e inaha ia haere atu tatou e mataitai i te hoê vahi apî, e riro tatou i te manaˈo e ua haere ê mai na tatou i reira na mua ˈtu, e aita nei hoi. E rave rahi mau fare, mau piha ohipa, mau fare toa, mau oire e mau huru tupuraa i roto i te tahi mau tuhaa o te ao nei tei ravehia to ratou mau hohoˈa e faatiahia ˈtu ai i te tahi atu mau vahi. E ere te mau mea ta tatou paha i ite na mua ˈtu i te haapapuraa e ua haere atu tatou i taua mau vahi ra i roto i te hoê oraraa na mua ˈtu. E hohoˈa noa râ ratou no te mau vahi ta tatou i matau.

Hoê â huru no te taata. E hohoˈa maitai te tahi mau taata i te tahi atu i te pae no te hohoˈa mata, mai te huru atura ïa e hohoˈa mau teie no ratou. E riro paha e mau huru raveraa ta te hoê taata e faahaamanaˈo mai na ia tatou i te tahi atu taata e ora noa nei â paha aore ra o tei pohe. Tera râ hoi, i roto i teie nei oraraa to tatou matauraa i taua mau taata ra, e ere i roto i te hoê oraraa na mua ˈtu. Oia atoa, e ere ïa no te mea e hoê â hohoˈa aore ra hoê â huru to taua mau taata ra e to tatou, ua matau ïa tatou i taua mau taata ra i roto i te hoê oraraa na mua ˈtu. Eita e ore ua hape aˈenei tatou paatoa i te taata. Tera râ, ua ora taua mau taata ra hoê â tau e to outou eiaha râ i roto i te tahi atu oraraa na mua ˈtu. Aita roa ˈtu to te reira e tuatiraa e te parau no te ora-faahou-raa i roto i te hoê tino ê atu.

Te mana o te faataoto

E nehenehe atoa e tatara i te auraa o te mau ohipa i ravehia maoti te mana o te faataoto, ma te ore e faaohipa i te haapiiraa no nia i te parau no te ora-faahou-raa i roto i te hoê tino ê atu. Ua riro to tatou nei feruriraa hohonu ei haapueraa parau apî hau aˈe i te taa i te auraa o te mau mea i ta tatou iho e nehenehe e manaˈo. E tae mai te mau parau apî i roto i taua haapueraa parau ra na roto mai i te mau buka, te mau vea, te afata teata, te radio, e na roto atoa mai i te mau ohipa paha i tupu e i te mau ohipa i itehia.

E rave rahi o taua mau parau ra o te haapuehia i te hiti i roto i te tahi vahi moe o to tatou nei feruriraa hohonu no te mea eita tatou e faaohipa roa ˈtu aore ra e faaohipa oioi i taua mau parau ra. Mai te vairaa buka ra hoi to tatou feruriraa hohonu mea iti roa ta ˈna e titau ra e o tei tuuhia i te hiti i nia i te hoê vairaa i faaatea-ê-hia.

Tera râ, i raro aˈe i te mana o te faataoto, e tauihia te hiroa o te taata e nehenehe atu ai te mau manaˈo moe e fa faahou mai. E parau na vetahi mau taata i teie manaˈo moe e mau manaˈo no te hoê oraraa na mua ˈtu, inaha e mau manaˈo hoi teie no teie oraraa no tatou nei tei moehia ia tatou i te tahi noa taime.

Te vai ra râ hoi te tahi mau huru tupuraa fifi roa ia faataa maitai. Te hoê hiˈoraa, ia haamata ïa te hoê taata i te paraparau na roto i te tahi atu “reo” i raro aˈe i te mana o te faataoto. I te tahi taime, e taa-maitai-hia te reo, te rahiraa râ o te taime eita roa ˈtu ïa. E riro taua mau taata e tiaturi ra i te parau no te ora-faahou-raa i roto i te hoê tino ê atu i te parau e e reo teie ta taua taata nei i paraparau na i roto i te hoê oraraa na mua ˈtu.

Inaha, ua papu-maitai-hia e e tupu te paraparauraa na roto i taua mau reo nei, mai te peu e tei raro aˈe te taata i te mana o te tahi ohipa huru ê aore ra faaroo. Ua papu maitai i teie mau taata i farerei i teie mau huru tupuraa e aita roa ˈtu to te reira e tuatiraa e te hoê oraraa na mua ˈtu, tei raro aˈe râ ratou i te mana o te mau puai itea-ore-hia e te mata taata nei i roto i teie nei oraraa.

E taa ê na te mau manaˈo no nia i te parau no teie puai. I roto i te hoê faaiteraa amui na te Fountain Trust e te Apooraa Evanelia a te Ekalesia no Beretane, te na ôhia ra no nia i te parau no te paraparauraa na roto i te mau reo ěê e: “E haapao maitai atoa tatou i te mea e e nehenehe te hoê ohipa mai teie te huru e tupu mai i raro aˈe i te mana o te ohipa hiˈohiˈo a te demoni.” No reira, te parauraa e e haapapuraa teie huru ohipa e ua ora ê na tatou i roto i te hoê oraraa na mua ˈtu, e riro ïa mai te huru ra ïa e te faaohipa ra tatou i te hoê faaotiraa manaˈo hape.

Te mau huru tupuraa piri roa i te pohe

Eaha ˈtura ïa, no nia te mau huru tupuraa i farereihia e te mau taata i fatata roa i te pohe? Ua faarirohia te reira na te tahi pae, ei haapapuraa e e nephe to te hoê taata e ora i muri aˈe i te poheraa o te tino. E nehenehe râ teie mau ohipa i tupu e faataa-matai-hia ˈˈe na roto i te mau ravea natura e rave rau.

I roto i te vea farani no nia i te ite aravihi oia hoi Science & Vie, e parauhia te mau taahiraa taa ê o te mau huru tupuraa e itehia e te hoê taata e fatata roa ˈtura i te pohe “ei huru hohoˈa orama e itehia i roto i te ao nei” e tei matau-maitai-hia hoi. Aita te mau huru tupuraa mai teie te huru i taotiahia i nia i te feia e fatata ˈtura i te pohe. E nehenehe atoa te reira e tupu no te “rohirohi, te fiva, te hopii, te rave-hua-raa i te mau raau taero.”

E ohipa faahiahia mau tei itehia e te hoê taote tâpû o Wilder Penfield te iˈoa, tei tâpû i te tahi mau taata i roohia i te maˈi hopii e tei faataotohia. Ua ite aˈera hoi oia e ia faaitoitohia te mau tuhaa taa ê o te roro na roto i te pâmuraa ˈtu i te uira i roto, e nehenehe oia e rave e ia manaˈo te taata maˈi e tei rapaeau mai o ˈna i to ˈna iho tino, e tere ra na roto i te hoê ana i raro i te mouˈa, e farerei haere ra i to ˈna mau fetii i pohe.

Te hoê vahi faahiahia roa i roto i taua tuhaa nei, oia ïa aita te mau tamarii i fatata roa i te pohe, i farerei i to ratou mau fetii, i to ratou râ mau hoa haapiiraa aore ra i ta ratou mau orometua—e ora nei â. Te haapapu ra te reira e te vai ra i roto i taua mau huru tupuraa nei, te hoê tuatiraa i te pae no te haapiiraa. Te mea i farereihia, ua tuati ïa i nia i teie nei oraraa, eiaha râ i nia i te hoê mea i muri aˈe i te poheraa.

Teie ta te taote Richard Blacher i papai i roto i te vea ra The Journal of the American Medical Association: “Te poheraa, aore ra te mauiuiraa i te hoê tupuraa atâta o te tino, o te hoê ïa tupuraa; te pohe o te huru.” Ei hiˈoraa, te faahiti ra te taote Blacher i te parau no te hoê taata a tahi ra a tere ai na te reva mai te fenua Marite atu i Europa. “Aita te manureva i [haere i] Europa,” o ta ˈna ïa i papai. Eita te horopatete e na Europa ˈtu i te tere, e faaohu na to ˈna manureva e e hoˈi faahou mai tau minuti i muri aˈe i te faarevaraa, e nehenehe e faahiti rahi i te taata i te parau no nia ia Europa i te hoê taata e na roto mai i te huru moeraa te hiroa e nehenehe e parau no nia i te pohe.

Aitâ te feia i fatata roa i te pohe, mai te peu e tia ia parauhia, i pohe aˈenei. Ua ite mai ratou i te hoê huru tupuraa a vai ora noa ˈi ratou. E te ora noa râ hoi te hoê taata te tahi tau tetoni na mua ˈˈe i to ˈna poheraa. Ua fatata roa ratou i te pohe, aita râ i pohe atura.

Oia atoa eita te feia tei faaea to ratou mafatu i te tupai hoê taime e tei itoito faahou mai, e nehenehe mau e haamanaˈo i te tahi ohipa i tupu i taua mau taime i moe ai to ratou hiroa ra, ia ore ratou e nehenehe e parauhia e ua “pohe” ratou. Te mea ta ratou e haamanaˈo, mai te peu e e haamanaˈo ratou, o te ohipa ïa i tupu i te taime e fatata maira i taua faaearaa poto ra, eiaha i te taime iho i tupu ai.

E pinepine te mau huru tupuraa i farereihia e te feia e fatata ˈtura i te pohe i te faataahia ei mau ohipa maitai, noa ˈtu â ïa e ua itehia te tahi mau huru tupuraa iino. Mai teie te huru ta te taata no farani o Catherine e hiˈopoa i te pae no te feruriraa, faataaraa mai i te reira: “Aita e faufaa no te feia i ore i farerei i teie mau huru tupuraa [te fatataraa i te pohe] e tano maitai i tei faahepohia na te IANDS [Taatiraa o te mau tuatapaparaa o te feia e fatata ˈtura i te pohe o te ao nei], ia faatia mai i to ratou aamu.”

Ua moe te hiroa

Te mea papu maitai, aita ˈtu ïa oraraa ta tatou i ite maoti râ o te oraraa anaˈe o ta tatou e ora nei, e aita atoa hoi tatou i ite i te hoê oraraa na mua ˈtu e aita atoa i te hoê oraraa i muri aˈe i te poheraa. No reira, aita ˈtu mea ta tatou e haamanaˈo ra maoti râ te oraraa o ta tatou i ora mai na.

Te parau nei te feia e tiaturi i te parau no te ora-faahou-raa i roto i te hoê tino ê atu e te fanau-faahou-raa o te ravea apî ïa no te haamaitai faahou i to tatou oraraa. Ahiri tatou i ora aˈenei na mua ˈtu, e moehia ˈtu ai ia tatou i taua oraraa ra, e riro ïa te moeraa te hiroa mai te reira te huru ei fifi rahi mau. Na roto i te haamanaˈoraa i ta tatou mau hape e nehenehe ai tatou e fanaˈo i te reira.

Oia atoa, te manaˈo nei te feia e turu ra i te mea e parauhia ra te rapaauraa o te ora-faahou-raa i roto i te hoê tino ê atu e e nehenehe outou e arai maitai aˈe i teie fifi o ta outou e farerei ra, mai te peu e na roto i te faataoto, e nehenehe outou e haamanaˈo i to outou oraraa na mua ˈtu. Te na ô ra taua haapiiraa tumu ore ra e ua fanau-faahou-hia tatou no te haamaitai atu â i te tahi mea, noa ˈtu â ïa e ua moehia ia tatou eaha taua mea ra.

E faarirohia te moeraa te hiroa i roto i teie nei oraraa, mai te hoê fifi. Hoê â ïa huru no teie tuhaa. Te patoiraa na roto i te parauraa e eita taua huru moeraa i te hiroa ra e tupu, e oia hoi o te mau taata maitatai anaˈe te fanau-faahou-hia ei taata, e ere roa ˈtu ïa i te hoê manaˈo papu no teie nei tau, ia mana te ino i nia i teie nei ao. Mai te peu e o te mau taata maitatai anaˈe te fanau-faahou-hia mai ei taata, nohea mai ïa te taatoaraa o te feia iino? E iti roa mai anei te feia iino? Te parau mau: Aita e taata, maitai aore ra ino, e ora faahou mai no te haamata i te tahi atu oraraa ei taata aore ra ei mea ê atu no taua tuhaa ra.

E riro râ paha outou i te parau e ‘e ere anei te parau no te ora-faahou-raa i roto i te hoê tino ê atu i te hoê haapiiraa no roto mai i te Bibilia?’ E hiˈopoa anaˈe na i taua uiraa nei i roto i te tumu parau i mua nei.

[Parau iti faaôhia i te api 6]

Ua riro to tatou feruriraa mai te hoê vairaa haamararamaramaraa o tei tuuhia i te hiti e o te nehenehe râ hoi e faahaamanaˈohia mai a muri aˈe

[Parau iti faaôhia i te api 7]

“E huru te pohe,” e ere râ te hoê tupuraa.—Taote Richard Blacher i roto i te The Journal of the American Medical Association