Te horoaraa ˈtu—E tumu oaoaraa

Na te taata papai i te A ara mai na! i Heremani

O VAI te ore e oaoa ia noaa ia ˈna te hoê ô nehenehe? Auê te tamahanahana e ia ite e te haapaohia maira oe! Te oaoa i te horoaraa ˈtu hoê â ïa huru maitai te noaa mai. Ia au i ta Iesu, te tumu no te Kerisetianoraa, i parau “e mea maitai i te horoa ˈtu i te rave mai.”—Ohipa 20:35.

Te faatia ra te Bibilia e rave rahi horoaraa taoˈa, ma te horoa faarahi i te tahi taime. I to te arii vahine o Seba ite-roa-raa ˈtu i te paari o te Arii ra o Solomona, “ua hopoi atura oia i na taleni auro na te arii hoê hanere e piti ahuru, e te raau noˈanoˈa e rave rahi, e te ofai maitatai.” (Te mau Arii 1, 10:10) Te auro noa ïa ua hau atu ïa i te 46 mirioni dala marite ia faaauhia i te faufaa o to tatou nei tau! E ua vaiiho te Pharao no Aiphiti i te hoê o ta ˈna mau tamahine ma te horoaraa ˈtu i te hoê oire taatoa ei ô!—Te mau Arii 1, 9:16.

Aita e titauhia ra te ô unauna rahi roa ei tumu no te faaoaoa. Te haamanaˈo ra paha oe i te taata maitai no Samaria o te parabole a Iesu, tei tauturu ma te aau tae i te hoê taata tupu e fifihia ra. (Luka 10:30-37) Aore ra, te mau kerisetiano no te amuiraa no Korinetia tei hopoi na to ratou mau taeae no Ierusalema e fifihia ra te “taoˈa horoa.”—Korinetia 1, 16:3.

Te hiˈoraa tuiroo roa no te horoaraa ˈtu i te taoˈa e faahitihia ra i roto i te Bibilia, no nia ïa i te feia hiˈo fetia—te matauhia ei taata paari—tei hopoi mai i te ô na te tamarii ra ia Iesu. Ua niu e rave rahi taata i te peu horoaraa taoˈa i Noela i nia i teie tupuraa.—Mataio 2:2-11.

Eaha te parau no te horoaraa taoˈa i Noela?

Oia mau, mea au roa na te taata aau tae mau e rave rahi ia tae i ta ratou e parau ra te manaˈo no te Noela—oia hoi te manaˈo horoaraa taoˈa. E faaineine atea te tahi pae, ma te popou rahi i te iteraa i te ô taa ê roa e te imiraa i te mau rata hohoˈa au maitai. Te mea tahito roa, ua itehia ïa i te mau matahiti 1840 i Beretane, o vai mau tei haamata i te reira e tumu aimǎrôraa ïa. Noa ˈtu râ, e ô aore ra e rata hohoˈa, e oaoaraa mau no te rahiraa te imiraa i te tahi taoˈa taa ê na te taata au-rahi-hia.

I te tahi atu pae, aore e tia ia haapaehia te rahiraa feia horoa taoˈa no te Noela o te ore e tuea i te huru taata tei faahiti iho nei. Ua tapao te hoê fatu fare toa no Heremani no nia i te feia hoo haere i te tau Noela e: “Ia fatata te tau no te Noela, e haapeapea rahi roa te taata. E tae ratou i te rave noa mai i te tahi mea o ta ratou noa i ite.”

Ma te faaô na roto i te vahi o te fare toa î i te taata ma te haamâuˈa i to ratou taime i te imiraa i te ô tano e tae te tahi feia hoo i te amuamu no nia i te hepohepo rahi, te ru-noa-raa, e te teimaha. Ia au i te hoê vea no Auteteria, e autâ hoê i nia i te toru o te taata hoo atoa no nia i “te ru-haere-noa-raa,” ma te parau e topa to ratou hau “ia hope te hoo-haere-raa ru.” E te mau taurearea no Heremani i te uiraahia ˈtu eaha to ratou huru i te tau Noela, teie ïa ta ratou pahonoraa “Mea fiu roa na ˈu,” “Aita roa ˈtu oe e ite eaha ta oe e horoa ˈtu” e, “E mea moni rahi roa te mau mea atoa.”

E ere ïa te mau taata atoa te ite i te rahi o te “maitai i te horoa ˈtu” o ta Iesu i parau. Ma te feaa ore, te tumu rahi oia hoi ua riro te Noela ei imiraa moni, ei tumu no te iria o te rahiraa. Ia au i Te buka parau paari o te ao, (beretane), “ua naeahia hoê i nia i te maha o te mau hoo-mâmâ-raa i te tupu i te tau Noela.” Papu maitai, te pehe tuiroo te “Pateraa ǒe” ta te ao o te tapihooraa taoˈa e au rahi i te faaroo o te maniania ïa o te taˈi o te mau afata moni.

Ua taa-maitai-hia, eita te horoaraa taoˈa i Noela e faatupu pinepine mai i te oaoa te itehia mai ia horoa-anaˈe-hia te hoê ô. “E au ore roa vau i te Noela,” ta te hoê ïa vahine Kalolita i faˈi mai.

Eita ïa e maerehia e te uihia ra e na vai i haamata te horoaraa taoˈa i Noela. E auraa mau anei to te reira?