Te uiui nei te mau taurearea . . .

Nafea ia faaruru i te mau faahaparaa a to ˈu nau metua?

“TE TIATURI nei e rave rahi metua e te ravea maitai roa ˈˈe no te tauturu i ta ratou mau tamarii ia maitaihia mai o te faahaparaa ïa i te mea o ta ratou i ore i rave maitai.” Ta Clayton Barbeau ïa i papai i roto i ta ˈna buka Nafea ia haapii atu i te mau metua (beretane).

Aita e feaaraa, ahiri e taata apî oe, peneiaˈe ua faatitiaifaro-aˈena-hia oe e to oe nau metua fatata mai ta ratou e haatamaa tamau nei ia oe. I te tahi mau taime e riri iho â oe, e ere râ teie mau faahaparaa i te mea ino i te mau taime atoa.a E tia iho â ia aˈohia tatou pauroa i te tahi taime, e nehenehe te mau faahaparaa tano e riro ei mea maitai e te faufaa hoi.

I te tahi atu pae, e huru tano ore iho â to te mau metua i te tahi mau taime, i te tatamaˈi-noa-raa i ta ratou mau tamarii o tei taiâ roa. (Kolosa 3:21) Aore ra no to ratou inoino rahi e aˈo hua ratou e e faaooo atoa i ta ratou mau tamarii apî no te tahi noa mau hape rii. Noa ˈtu te huru o te faahaparaa, e nehenehe oe e faufaahia. Hau atu â, ma te aau tae te haapeapea mau nei to oe nau metua no oe. Mai ta te Bibilia i parau e mea maoro i teie nei, “e mea maitai te paruparu no te taua.” (Maseli 27:6) Parau mau, e mea piri roa oe i to oe nau metua, no reira e mauiui roa oe i ta ratou mau imiraa hara. Ia haapii râ oe i te faaruru ma te paari i ta ratou mau faahaparaa, e iti mai te mauiui e e faufaa-rahi-hia oe.

Te haerea tano ore

A hiˈopoa i te ohipa i tupu i nia ia Stéphanie: “Ia hoˈi mai to ˈu mama na te ohipa,” te faatia ra o Stéphanie, “e haamata o ˈna i te tamaˈi noa ia ˈu no te mea aita vau i tamâ i te fare aore ra i faarue i te pehu. E na ô mai e, ‘aita ta oe e ohipa maitai aˈe i te fare, ia haere râ e ori, mea maitai roa ïa.’ E na ô ïa vau ‘No te tatamaˈi, mea maitai roa ïa oe.’ E haamata o ˈna i te tuôtuô i nia ia ˈu e e faarue vau ia ˈna ma te tapiri i te uputa o to ˈu piha eiaha vau ia faaroo faahou i to ˈna reo. E tomo uˈana mai o ˈna ma te tuô e e faautuahia vau.”—Te haamaau ra to ˈu nau metua ia ˈu, na te taote ra o Joyce L. Vedral.

Ua matau oe i te reira? Ua ite ïa oe i te rahi o te mauiui ia na ôhia oe e “aita ta oe e ohipa maitai aˈe.” Noa ˈtu te reira, eaha tei noaa ia Stéphanie i to ˈna ririraa ˈtu i to ˈna mama? Te maniania, te tuôtuô e te patoi e faatupu mai ïa i te inoino i roto i te hoê metua. E mâha rii noa oe i te faaiteraa i to oe riri e aita rea faufaa ia faaau-anaˈe-hia i te utua e tae papu mai i nia ia oe. Hau atu â, e fifihia te hoê taurearea kerisetiano tei pahono ma te faatura ore i to ˈna metua i te pae varua—e e nehenehe o ˈna e au-ore-hia e te Atua.—Maseli 30:17; Ephesia 6:1, 2.

Aita paha te metua vahine a Stéphanie i haavî ma te tano roa. E ere râ anei e e maa parau mau rii ta ˈna i to ˈna ohumu-noa-raa ia Stéphanie? I te patoiraa i te faahaparaa, aita noa o Stéphanie i haafifi hau atu i to ˈna oraraa, aita atoa râ oia i rave i te mau tauiraa maitai titauhia.

Te faufaaraa ia faaroo

Te horoa ra te Bibilia i teie aˈoraa: “E faaroo i te parau, e farii i te aˈo, ia paari oe ia tae i to oe ra hopea.” (Maseli 19:20) Oia mau, eiaha roa e ru i te faatia ia oe iho, eiaha e maniania ma te pahono, e a feruri maite i tei parauhia ra. Mai teie te huru o te papai a te vea ra ’Teen: “Na to oe upoo e faaroo i te faahaparaa, eiaha râ to oe mau manaˈo hohonu.”

I te na reiraraa eita ïa oe e faananea ˈtu e e faarahi i te parau a to oe metua. Te faaite ra anei to oe metua, e mea faufaa ore oe e mea maau, aore ra te parau ra oia e ere ta oe ohipa i te mea maitai i te peniraa i te fare vairaa pereoo aore ra i te tamâraa te umu? Ahiri e parau mau te piti o te manaˈo, no te aha ïa oe e riri ai? “Aore roa e taata i nia i te fenua e rave i te mea maitai i te mau taime atoa e aore roa e hape,” ta te Bibilia e parau ra. (Koheleta 7:20, Tatararaa Beretane o teie mahana) E mai te peu e aita oe i rave maitai i te tahi ohipa, e ere ïa te auraa e mea mâuˈa oe no te rave i te mau mea atoa o te oraraa. No reira, a haamanaˈo noa e e mau vahi puai e mau vahi maitai â ta oe.

Vai hau noa i mua i te pariraa

“I te mau taime atoa e ohipa maau ta ˈna e rave,” ta te hoê metua tane e faˈi ra, “E na o vau, ‘E maau mau oe.’” Eaha ˈtura te parau e ahiri to oe nau metua e pii atoa ia oe mai te reira te huru aore ra te tahi atu mau parau tano ore? A tahi, a haavî i to oe mau manaˈo hohonu! “O tei ore e ru i te parau ra, ua noaa ia ˈna te ite, e te taata i noaa ia ˈna te ite ra e aau maitai to ˈna.”—Maseli 17:27.

Eiaha e feruri noa i te parau hape tei parauhia mai; na te reira e faariri hau atu ia oe. A feruri râ i te vahi ta oe e nehenehe e haamaitai. Ia haamanaˈo oe e te here ra to oe nau metua ia oe e aita ratou e na reira ra no te faaino ia oe. (Ua farii te metua tane i faahitihia iho nei: “Aita vau i tano i te piiraa ia ˈna e maau i te mau taime atoa. Eita e maoro o ˈna i te tiaturi i te reira.”) A manaˈo noa e peneiaˈe ua rohirohi ratou aore ra ua hepohepo roa ia hoˈi anaˈe mai na te ohipa. “Na te haapao o te taata e ore e riri vave ai; o to ˈna ïa maitai te faaore i te hara.”—Maseli 19:11.b

I te mea e eita e tano ia pahono atu, e nehenehe paha oe e faaiti i te riri e itehia ra i roto i te parau faahapa. Ei hiˈoraa, a tamata i te faaau i te mau parau a to metua, ma te feruri maite i te fifi. Ia pii anaˈe to oe metua tane ia oe e maau no te mea aita o ˈna i mauruuru i ta oe ohipa i te faaanaanaraa i te pereoo o te utuafare, a na ô paha i te parau e: “Ua inoino oe no te mea aita vau i faaanaana maitai i te pereoo.” Aore ra a farii noa i te faahaparaa. (“Ua tano oe, e papa. Ahani au i rave maitai i ta ˈu ohipa.”) Aore ra a ui atu paha e nafea oe no te haamaitai i ta oe ohipa. Te na ô ra te Maseli 15:1 e: “Te parau mǎrû ra tei faaore i te riri; area te parau faaooo ra, o te riri ïa te tupu.”

Te haamanaˈo ra anei oe ia Gideona? Te parau ra te Bibilia e ua aratai o ˈna i te nunaa Iseraela e ua upootia mai ratou i nia i te nunaa enemi no Midiana. Ua tono ihora o Gideona i te mau vea i te opu puai no Epheraima e ua ani ia ratou ia tapea i te mau ati Midiana e horo ra. Ua farii te mau Epheraima na roto i te haruraa e piti na tamaiti hui arii Midiana. I reira râ “ua avau hua atura” te mau taata teoteo no taua opu ra ia Gideona! Ua inoino ratou no te mea aita ratou i titauhia i te tamaˈi i te omuaraa iho â.—Te mau Tavana 8:1.

E mau faahaparaa tano ore roa teie. Ahiri o Gideona e taata riri vave noa, e avau uˈana ˈtu paha o ˈna i te mau Epheraima—a tupu ai te tamaˈi tivira. Maoti râ, ua na ô oia e: “E vahi iti ta ˈu i rave i ta outou, e ere anei te maitai rahi to te toea vine a Epheraima, i te vine auhune vai tia a Abiezara?” (Te mau Tavana 8:2) Teie te auraa o te pahono a Gideona, e ua hau atu ta te mau Epheraima i rave i ta Gideona iho i rave e i to ratou haruraa i te tamaiti hui arii ati Midiana. Ua faaore te pahonoraa mǎrû e te haehaa a Gideona i te faahaparaa tano ore e ua vai noa te hau.

Te haapiiraa? Eiaha ia ru i te faaite i te inoino i mua i te faahaparaa a to metua. E nehenehe te vai mǎrû noa e tapea ia oe ia pahono aore ra ia rave te tahi mea ta oe e tatarahapa i muri iho.—Hiˈo i te Koheleta 10:4.

A ohipa

Aita ïa e ravai noa te parau mǎrû. A ohipa atoa râ! A haamanaˈo, “te paari no nia maira, . . . te faaroo ohie.” (Iakobo 3:17) A haamata i te tamâ i taua piha ra, e faaanaana i te pereoo, e tâpû i to oe rouru, e taui i ta oe mau faito ahu, aore ra e rave i te tahi noa tauiraa e titauhia ra e to nau metua. Teie te ravea maitai roa ˈˈe ia ore te imiraa hara.

I te tahi atu pae, eita paha oe e farii i te faahaparaa ma te tia. Noa ˈtu e e mau metua maitai roa, aore e metua te ore e hape. Maoti i te tamata e faaafaro i te reira ma te faarahi i te tuôtuô, a tiai i te ‘taime tano,’ e a paraparau atu ai i to metua. (Maseli 15:23) “Area te feia i faaroo i te aˈo ra te reira te paari,” ta te Maseli 13:10 ïa parau. A faaite atu i to oe inoino ma te mǎrû, mai te taata paari te huru, ma te horoa i to oe nau metua i te mau tumu papu e no te aha aita oe e mauruuru. E nehenehe paha oe e ohipa i nia ia ratou ia hiˈo ratou i te mau mea mai ia oe ra te huru. Mai te peu e eita, a auraro ïa i te faatereraa a to oe nau metua.—Maseli 6:20.

I te pae hopea, e faufaahia oe i te fariiraa i ta ratou aˈo. E tae noa ˈtu i te taata tia roa o Iesu iho tei “ite oia i te auraro i to ˈna ra mau pohe.” (Hebera 5:8) E tia atoa ia oe ia ite i te mau haapiiraa faufaa roa. Ua faaruru aˈena oe i te mau faahaparaa a te mau orometua haapii. I muri iho, o te mau paoti paha ïa ta oe e faaruru atu. A haapii i teie nei i te farii i te faahaparaa.

I mua ˈtu e tae roa oe i te mauruuru i te huru hiˈoraa a to oe nau metua. Ua parau te hoê taurearea o James te iˈoa no nia i to ˈna nau metua e: “E mea etaeta mau raua i nia ia ˈu i te pae no te fare haapiiraa, te amuiraa, e te ohipa. I te tahi taime, aita to ˈu e taime faaearaa! Tera râ, i to ˈu paariraa, ua mauruuru vau i te ohipa maitai roa e titauhia ra ia ˈu.” E ere ra anei teie huru haapiiraa i te mea faufaa? E e ite â oe iho i te tahi atu mau haapiiraa faufaa mai teie te huru na roto i te haapiiraa i te farii i te faahaparaa.

[Nota i raro i te api]

[Hohoˈa i te api 11]

Te tuôtuô, te maniania e te faatiaraa ia oe iho e faatupu ïa i te inoino i roto i te hoê metua

Te aniraa i to oe nau metua e nafea oe i te rave maitai i ta oe ohipa e nehenehe te reira e faaore i te mauiui o te faahaparaa