Te mau haapiiraa a te tuituirahonui
E MEHAMEHA anei outou i te hoê tuituirahonui? Noa ˈtu e oia, eita e ore e te haafaahiahia nei outou i to ˈna puaverevere, mea tuea maitai to ˈna mau pae e mea aravihi to ˈna huru hamaniraa. Teie râ, eaha te nehenehe e parau no nia i te taoˈa e hamanihia ˈi oia, oia hoi te tirita?
Mea maoro i teie nei to te mau aivanaa e te feia aravihi i te uiui-maere-noa-raa no nia i te tahi mau huru tirita hamanihia e vetahi mau tuituirahonui, mau hê hamani tirita e vetahi mau rao. Ua rave o Christopher Viney, orometua haapii i te tuhaa aravihi o te ora e te pae no te mau taoˈa auri i te fare haapiiraa tuatoru no Washington, i te hoê maimiraa no nia i te tuituirahonui Nephila clavipes. Ia au i te vea Globe and Mail no Toronto, ua itea mai ia ˈna e hoê o na huru tirita e pae ta teie tuituirahonui e hamani ra, e mea paari aˈe ïa i te auri—inaha, ahuru taime paari aˈe i te Kevlar, taoˈa e faaohipahia no te hamani i te mau ahu paruru ofai pupuhi, te mau tino pahi e te mau pereoo pâ auri.
Ua manuïa te mau aivanaa a te nuu marite U.S. Army i te faataa i te tatararaa o te mau mea e vai ra i roto i te fibroïne, te poroteina tei riro ei niu no teie tirita. Teie râ, ua ite mai ratou e aita noa te mau huru faahiahia o teie tirita e noaa mai na roto i te mau mea e vai ra i roto ia ˈna; no roto atoa mai râ i te huru ninoraa a te tuituirahonui. I roto i te ravea ninoraa a te tuituirahonui, ua riro te tirita mai te pape kerehe ra. E faanaho to ˈna mau huˈa taoˈa ia au i te mau fǐfǐ roa parauhia polymères, eita e motu haere noa i te hoê umeraa. Te tiaturi nei râ te orometua Viney e ia tae i te hoê mahana, ia naeahia i te hamani i te hoê ravea ninoraa taa ê, e naea-atoa-hia i te mau aivanaa i te faito aravihi o te tuituirahonui.
“Tei mua roa te mau tuituirahonui ia tatou,” o ta teie orometua haapii ïa e faaite ra i te Globe and Mail. “O vai râ tei ite? Peneiaˈe e mahemo ratou ia tatou i te hoê mahana.” Peneiaˈe. Teie râ, e tia mau â ia faatae atu i te faahiahia o te hamaniraa matamua i te hoê anaˈe Tumu, oia hoi Tei poiete i te mau mea atoa, o Iehova.—Apokalupo 4:11.