E maˈi mau anei teie?

“UA HAERE au e hiˈo i tera taote e tera taote,” o ta Priscilla ïa e faatia ra, ua roohia hoi oia i te maˈi o te tupuraa tamau i te rohirohi. “Ua hiˈopoahia to ˈu toto e ua uiuihia vau no nia i to ˈu huru oraraa. Ua parauhia mai e mea maitai roa vau e e tia ia ˈu ia haere e hiˈo i te hoê taote rapaau feruriraa. Aita hoê o teie mau taote i tâuˈa i ta ˈu parau aore ra i anaanatae i te mau tapao o to ˈu maˈi.”

Te tupu pinepine nei te reira. O te ohipa ïa i haapapuhia i te matahiti i mairi aˈenei e te hoê taote i roto i te vea JAMA (Journal of the American Medical Association): “Ua haere ê na te feia tei roohia i te maˈi o te tupuraa tamau o te rohirohi, e hiˈo tau 16 taote. Ua parauhia mai te rahiraa e mea maitai roa ratou, ua roo-noa-hia ratou i te maˈi hepohepo aore ra ua teimaha roa to ratou oraraa. E rave rahi o tei arataihia ˈtu i te hoê taote rapaau feruriraa. I teie mahana, mea maitai aˈe te huru tupuraa, tera râ, te haere mǎrû noa ra.”

Mai ta te vea American Journal of Medicine e faaite ra, te faatupu ra te maˈi o te tupuraa tamau o te rohirohi i te mau fifi taa maitai: “Mea fifi roa ia rapaau i te mau taata maˈi e ia hiˈo-anaˈe-hia ratou mea maitai roa ïa, e ia hiˈopoahia ratou i te pae tino e i te pae ihiora, aita hoê aˈe vahi hape. Mea pinepine ua taaihia te fifi i te mau peapea e te hoa faaipoipo aore ra e te tahi atu mau melo o te utuafare, aore ra e te paoti ohipa, te orometua haapii, te taote aore ra te taiete parururaa.”

No te mau taote, te fifi, oia hoi ua riro te rohirohi ei tapao matauhia. “Mai te peu e e aufauhia te taote 1 dala marite i te mau taime atoa e haere mai ai te hoê taata maˈi e parau e ua rohirohi oia, e nehenehe ïa oia e faaea i te rave i te ohipa,” o ta te hoê vahine papai i te pae rapaauraa ïa i papai. Teie râ, e au ra e, i nia i te numera o te feia e parau nei e ua rohirohi roa ratou, hoê noa faito iti o tei roohia i te maˈi o te tupuraa tamau o te rohirohi. I te mea e aita hoê aˈe tamataraa no te haapapu i teie maˈi, nafea ïa te taote e ite ai e tera taua maˈi ra?

Te hoê tatararaa no te maˈi tupuraa tamau o te rohirohi

I te avaˈe mati 1988, ua pia te Pu marite no te tuatapaparaa i te mau maˈi pee (C.D.C.) i roto i te Annals of Internal Medicine i te hoê o te mau faaiteraa e te mau tapao amuihia o te maˈi o te tupuraa tamau o te rohirohi. (Hiˈo i te tabula i te api 7)

Teie na tapao haapapuraa matamua e piti 1) te hoê tupuraa o te rohirohi o te tamau noa hau atu i te ono avaˈe e o te faaiti e 50 % o te faito ohipa a te taata maˈi, e 2) aita ˈtu e maˈi o te tino aore ra o te feruriraa o te nehenehe e riro ei tumu no te mau tapao o te maˈi. Teie râ, ia haapapu-maitai-hia e e maˈi teie o te tupuraa tamau o te rohirohi, taa ê atu i te reira, e tia i te taata maˈi ia faatupu e 8 o te mau 11 tapao o tei faataahia ei mau haapapuraa tapiri aore ra e 6 o teie mau 11 tapao e oia atoa e 2 o te mau 3 tapao e vai ra i nia i te tabula o te mau haapapuraa i te pae tino.

Oia hoi, e maˈi ino mau to te feia o te manaˈohia ra e ua roohia ratou i te tupuraa tamau o te rohirohi e no te hoê tau maoro. Ua faaoti te C.D.C. e horoa i te hoê faataaraa taotiahia o te maˈi ia ite-papu-hia te feia i roohia iho â i taua maˈi nei. No teie taime, aita te feia o tei roohia i te mau maˈi huru haihai aˈe i te tupuraa tamau o te rohirohi, i taiohia i roto i teie nei faataaraa.

E maˈi hepohepo anei?

Te faaite nei vetahi mau taote e i te parau mau, te roohia nei te feia tei pohehia i te tupuraa tamau o te rohirohi, i te hepohepo e vetahi atu mau fifi i te pae feruriraa. Eaha te tia ia manaˈo? Te itehia ra anei te mau tapao matauhia o te maˈi hepohepo i nia ia ratou?

E parau mau e e rave rahi o teie mau taata maˈi o tei roohia i te maˈi hepohepo. Teie râ, mai ta te taote Kurt Kroenke e faaite ra, e orometua haapii oia i te fare haapiiraa teitei no te toroa rapaauraa no Bethesda (Hau amui no Marite), “o vai i rotopu ia tatou o te ore e hepohepo roa mai te peu e e roohia oia i te rohirohi e hoê matahiti aore ra hau atu?” No reira, e tia ˈtura ia faataa mai te peu e, o te hepohepo anei te tumu o te maˈi o te tupuraa tamau o te rohirohi aore ra na teie maˈi anei e faatupu i te hepohepo.

Mea pinepine, e ere i te mea ohie ia faataa i te reira. E nehenehe te hoê taote e haafaufaa i te piti o te haapapuraa matamua (oia hoi te haapaeraa i te mau fifi i te pae feruriraa e nehenehe e riro ei tumu no te mau tapao o te maˈi) e e manaˈo e te roohia ra te taata maˈi i te hepohepo eiaha râ i te hoê maˈi i te pae tino. Inaha, i roto i te rahiraa o te mau tupuraa, e ere teie huru faaotiraa i te mea papu.

Teie hoi ta te hoê vea i te pae rapaauraa (The Cortlandt Consultant) e papai ra: “Te haapapuraa maitai roa ˈˈe e e tumu ‘i te pae tino’ to te tupuraa tamau o te rohirohi, o to ˈna ïa fa-taue-raa mai i roto e 85 % o te mau hiˈoraa. Te faatia nei te rahiraa o te feia maˈi e ua haamata te maˈi i te hoê mahana papu maitai mai te hoê maˈi hupe ra te huru: fiva, [mauiui arapoa, mauiui o te mau ponapona, mauiui i roto i te mau uaua] e vetahi atu mau tapao tapiri.” Te tiaturi papu nei te mau taote e haapao ra i te feia tei roohia i te maˈi o te tupuraa tamau o te rohirohi e mea pinepine, e ere te hepohepo te tumu o te mau tapao o te maˈi.

“I to matou faaauraa i te feia maˈi, ua maere roa matou i te mea e ua parau mai te rahiraa o te feia maˈi e mea maitai roa ratou na mua ˈˈe, mea oraora maitai, e ua fanaˈo ratou i te hoê oraraa hotu mau e tae roa ˈtu i te taime a putahia ˈi ratou i te toetoe, a roohia ˈi ratou i te maˈi hupe aore ra i te maˈi mahaha o tei ore i ora,” o ta te taote Anthony Komaroff ïa e faataa ra, e raatira oia no te toroa rapaauraa i te fare maˈi Brigham and Women’s Hospital no Boston (Hau amui no Marite). “Ua fa mai te mau tapao no te maˈi o te nehenehe e manaˈohia e no roto mai i te feruriraa—mai te hepohepo, te mau huru-ê-raa, te mau fifi o te taotoraa, e te vai atu râ—i te hoê â taime e te maˈi.”

E ore roa te taata hepohepo matauhia e anaanatae i te mau mea atoa. Area ra, mai ta te taote Paul Cheney e faataa ra, “mea taa ê roa te huru o teie mau taata maˈi. Te hinaaro nei ratou e ite e eaha mau na to ratou. Mea paruparu roa ratou; eita ta ratou e nehenehe faahou e rave i te ohipa; e rave rahi tei mehameha roa. Teie râ, aita roa ˈtu ratou i erehia i te anaanatae i te mau mea e haaati ra ia ratou.”

Mauiui o te mau ponapona, fiva, numera tano ore o te mau toropuru uouo, maˈi haapê o te mau vahi hutiraa aho tupu pinepine, mauiui i roto i te mau uaua e te mau fatiraa ivi, e te hoê huru-ê-raa apitihia e te mau mauiui i roto i te uaua e nehenehe e tupu mai i muri aˈe i te hoê tutavaraa noa ˈtu e e ere i te mea puai roa—e mau tapao anaˈe teie o te ore roa e tuea ra e te maˈi hepohepo.

Te faufaa o te mau haamaramaramaraa apî roa ˈˈe i roaa mai

I roto i te numera o te 6 no novema 1991 a te vea JAMA, teie tei taiohia: “Te faaite nei te mau faaotiraa matamua a te hoê maimiraa e ravehia nei i nia i te feia maˈi o te faatupu nei i te mau haapapuraa o te maˈi tupuraa tamau o te rohirohi i faataahia e te C.D.C. e, aita te rahiraa e roohia nei i te maˈi hepohepo aore ra i te tahi atu fifi i te pae feruriraa.”

I roto i taua numera noâ ra, ua faataa te taote Walter Gunn, o tei pee maite i te mau maimiraa a te C.D.C. no nia i te maˈi o te tupuraa tamau o te rohirohi, e: “Taa ê atu i ta te mau taote e rave rahi e nehenehe e tiaturi, oia hoi e mea hepohepo te taatoaraa o te feia maˈi [o tei hiˈopoahia], ua itea mai ia matou e e 30 % anaˈe o ratou o tei faatupu i te mau tapao papu maitai o te hepohepo i te taime a haamata ˈi ratou i te tupuhia i te rohirohi.”

Inaha, e nehenehe e itehia te mau taa-ê-raa i nia i te tino i rotopu e rave rahi feia tei roohia i te maˈi o te tupuraa tamau o te rohirohi e te feia hepohepo. “Te feia e roohia nei i te maˈi hepohepo puai, e fifi pinepine to ratou taotoraa huru ê [parauhia sommeil paradoxal], area i ǒ [te feia rohirohi tamau] ra, o to ratou taotoraa taere [parauhia sommeil lent] ïa tei haafifihia,” o ta te hoê vea i te pae rapaauraa (The Female Patient) ïa e faaite ra.

Ua faahiti te numera o te 20 no titema 1991 a te vea Science i te tahi atu ohipa apî, oia hoi “te itehia nei i nia i te feia i roohia i te maˈi o te tupuraa tamau o te rohirohi, te mau faito tano ore o te tahi mau oromona o te roro.” “Noa ˈtu e mea iti te mau taa-ê-raa e te feia i hiˈopoahia, ua itehia iho â i nia i te feia tei roohia i te maˈi o te rohirohi tamau i te mau faito cortisol (oromona parauhia stéroïde) raro roa e te mau faito A.C.T.H. (oromona adrénocorticotrope hamanihia e te hypophyse) teitei, e tupuraa ê roa hoi i te mea e itehia ra i nia i te feia maˈi hepohepo.”—Na matou e papai faaopa nei.

Ahiri e e maˈi mau iho â te tupuraa tamau o te rohirohi?

E faaite iho â te toroa rapaauraa i te manaˈo tiaturi ore i mua i te mau maˈi taa-ore-hia e ana ra. Mai te reira hoi te huru no te maˈi o te tupuraa tamau o te rohirohi. “Ua mau hohonu roa te manaˈo tiaturi ore i roto i to matou nei toroa,” o ta te taote Thomas English ïa i papai. “E au ra e i teie mahana, mea au roa no te hoê taote maramarama e te paari ia faaite i te tahi manaˈo tiaturi ore maitai.” Teie râ, o ta ˈna ïa e ani ra, mea maitai anei teie tiaturi-ore-raa no te taata maˈi “mai te peu e e maˈi mau iho â te tupuraa tamau o te rohirohi”? I te tahi atu mau taote o te faaite nei i teie huru manaˈo tiaturi ore, te ui atu nei oia e: “E mai te peu e ua hape outou, eaha ïa te mau faahopearaa no ta outou mau taata maˈi?”

Ua roo-atoa-hia te taote English i te maˈi o te tupuraa tamau o te rohirohi, e ua piahia te tiaororaa o ta ˈna i faatae atu i to ˈna mau hoa taote i roto i te vea JAMA i te matahiti i mairi aˈenei. Ma te faaitoito ia ratou ia rave i te parahiraa o te taata maˈi, teie ta ˈna huru faataaraa i te maˈi:

“E ‘putahia’ outou i te toetoe, e ua ino roa to outou oraraa. Aita ta outou e nehenehe faahou e feruri ma te maramarama maitai. . . . I te tahi mau mahana, e tia ia outou ia tutava puai no te taio i te vea aore ra no te taa i te aamu o te hohoˈa teata. Mai te mea ra e ua tauihia te mau hora e aita outou e nehenehe e haapaiuma i te reira. E na te hiti noa outou i te peho poiri o te ao o te maˈi ma te mǎtaˈu, inaha, na mua ˈˈera, e haere atu outou na roto i taua peho ra ma te haerea papu. E iriti te [mauiui i roto i te mau uaua] na roto i to outou tino taatoa. E tupu mai e e moe atu te mau tapao o te maˈi, e rahi atu e e iti mai. . . . E nehenehe atoa outou e roohia i te manaˈo feaa no nia i te tahi mau tapao o te maˈi, ahiri e aita outou i paraparau atu e te tahi mau taata maˈi . . . aore ra i te mau taote o tei ite na mua ˈtu e rave rahi mau hanere hiˈoraa mai te reira te huru. . . .

“Ua tauaparau vau e te mau ahuru rahiraa taata maˈi o tei haere mai e imi i te tauturu i pihai iho i te mau taote, tera râ, ua haere atu ratou ma te faahaehaahia, te riri e te peapea. Te faaite ra hoi to ratou tino e ua maˈihia ratou, area te mau taote ra, na roto i ta ratou mau tatararaa no nia i te maˈi o te feruriraa o te haafifi i te tino, ua faatopa ˈtu ïa ratou i teie feia i roto i te peapea e te riri maoti hoi i te tamǎrû atu ia ratou. Ua faaoti aˈera ratou e aita te mau taote e taa ra i te ohipa e tupu ra. . . . E tia anei ia huna e te vai mau ra te mau tapao o te maˈi no te mea noa e aita tatou e taa ra i to ratou auraa? Ua papu anei ia tatou e e nehenehe e itehia mai, na roto i ta tatou mau tamataraa i roto i te mau piha maimiraa, i te mau maˈi apî e tae noa ˈtu i te mau maˈi tahito? No tahito mai â taua hiˈo-ino-raa i te mau manaˈo apî; e ta ˈna atoa hoi mau faahopearaa iino.”—JAMA, 27 no febuare 1991, api 964.

Te faufaaraa ia farii i te vai-mau-raa o te maˈi

“Te faaroo noa nei te mau taote o te rave i te taime no te tauaparau e te feia maˈi o tei roohia i te tupuraa tamau o te rohirohi i te hoê â aamu; e aamu matauhia,” o ta te taote Allan Kind ïa i faaite, e taote aravihi oia no te mau maˈi haapê. “E nehenehe vau e haapapu atu e e maˈi mau iho â te tupuraa tamau o te rohirohi.”

Te rahi noa ˈtura te mau taote o te farii nei i teie manaˈo. Teie hoi te faataaraa a te vea Female Patient: “E tae roa ˈtu i te taime e faataahia ˈi te hoê faaotiraa papu e e itehia ˈi te hoê ravea rapaauraa e tano, e tia i te taote ia parau atu i ta ˈna mau taata maˈi e ua roohia ratou i te hoê maˈi mau, e aita noa te reira e tupu ra ‘i roto i to ratou upoo.’”

Ia haapapuhia ˈtu i te hoê taata maˈi e e maˈi mau iho â to ˈna, e riro te reira i te haamaitai rahi ia ˈna. Ua parau te hoê vahine, tei faaarahia ˈtu e ta ˈna taote e ua roohia oia i te maˈi o te tupuraa tamau o te rohirohi, e: “Ua tahe to ˈu roimata.” Ua tamǎrû-rahi-hia oia i to ˈna faarooraa i te taote i te haapapuraa mai e e maˈi mau iho â to ˈna, e to ˈna horoaraa mai i te iˈoa o teie maˈi.

Eaha râ te tumu o te maˈi o te tupuraa tamau o te rohirohi? Eaha ta te mau maimiraa i faaite mai?

[Tumu parau tarenihia i te api 7]

Te mau haapapuraa no te faataa i te maˈi o te tupuraa tamau o te rohirohi

Te mau haapapuraa matamua

1. Tupuraa o te rohirohi o te tamau noa hau atu i te ono avaˈe e o te faatupu i te hoê itiraa e 50 % o te faito ohipa a te taata maˈi

2. Aita ˈtu e maˈi o te tino aore ra o te feruriraa o te nehenehe e riro ei tumu no te mau tapao o te maˈi

Te mau haapapuraa tapiri

E faura mai teie mau tapao i muri aˈe i te hoê tupuraa o te rohirohi

1. Fiva rii

2. Mauiui arapoa

3. E mauiui te mau ponapona

4. Paruparu o te mau uaua

5. Mauiui na roto i te mau uaua

6. Paruparu maoro i muri aˈe i te tahi ohipa faaetaetaraa tino

7. Mauiui upoo

8. Mauiui i roto i te mau fatiraa ivi

9. Fifi no te taotoraa

10. Fifi i te pae uaua uira e te pae feruriraa, mai te moeraa i te tahi mau mea, te ahoaho, te fifi no te haamau i te feruriraa, te hepohepo

11. Tupuraa taue (tau hora e tae atu i tau mahana)

Te mau haapapuraa i te pae tino

1. Fiva rii

2. Maˈi arapoa

3. E fafahia te mau ponapona aore ra e mauiui

[Hohoˈa i te api 8]

E tia i te mau taote ia ara maitai no te ite i te taa-ê-raa i rotopu i te maˈi hepohepo e te maˈi o te tupuraa tamau o te rohirohi