Te faahiahia o to tatou nau rima

MA TE tuô puai, ua faarue taue atura te taurearea i ta ˈna hamara e ua uumi ihora i to ˈna rima rahi, mai te mea ra e te tamata ra oia i te iriti i te mauiui. Maoti hoi i te tupai i te naero, ua tupai atu o ˈna i ta ˈna hamara i nia i to ˈna rima rahi—e ere hoi a tahi ra!

I taua taime ra, mea au aˈe paha na ta tatou taurearea haapii tamuta ahiri e aita teie rima rahi to ˈna. Teie râ, ua riro teie nei rima rahi “mâuˈa” ei melo no te hoê mauhaa faahiahia roa e vai ra ia tatou nei: te rima.

No te mea e ua matau roa tatou i te faaohipa i to tatou nau rima, aita ïa tatou e tâua faahou nei ia raua. Mea ohie roa ia moehia e te vai ra i nia iho te mau rima rii hautiuti haere, te mau fatiraa rima fati ohie, te mau uaua uira fafa vave, e te vai aturâ. Teie râ, aita tatou e nehenehe e rave i te tahi ohipa mai te peu e aita to tatou rima. Teie te aˈoraa a te arii paari ra o Solomona: “O tei itea ia oe ta to rima e rave ra, a rave ma to puai atoa ra.” (Koheleta 9:10) Ma te tano roa, ua maiti o Solomona i te rima ei taipe no te mau ohipa a te taata nei. Inaha, ua riro mau â te rima ei mauhaa raveraa ohipa papu aita e faaauraa.

Te hoê hamaniraa faahiahia mau

E nehenehe te mau rima rii e horohoro i nia i te mau pitopito o te hoê matini patapataraa parau ma te vitiviti e naeahia te tahi mau taata ia patapata hau atu i te hoê hanere parau i te minuti. E nehenehe atoa ratou e hee noa i nia i te mau 88 pataraa o te hoê piana rahi e e faariro i te hoê api parau tapaoraa nota ei upaupa taˈi navenave mau. Eaha râ ïa no te rima rahi? A tamata na i teie ohipa. A haamahora i to outou apu rima e a faaetaeta i to outou mau rima rii. I teie nei, a ofati na te tahi i muri aˈe i te tahi, ma te haamata e te rima rii nainai. Te ite ra outou e mea fifi roa ia ore te tahi atu mau rima rii ia hauti atoa. I teie nei râ, a ofati na i to outou rima rahi, a faahaere i nia, i raro, e i muri iho, a rave na ia ohu oia. Eita ïa te tahi atu mau rima rii e hautiuti. Maoti te tahi anairaa uaua iˈo faataahia no ˈna iho e te mau ivi fatiraa mai te hoê parahiraa ra te huru e vai ra i to ˈna tuatiraa e te ohie roa ia hautiuti, te fanaˈo nei te rima rahi i te hoê tiamâraa otahi roa ia faaauhia i te tahi atu mau rima rii, e no reira, e rave rahi ïa mau tuhaa aravihi to ˈna.

Ei hiˈoraa, tei te tahi aˈe pae te rima rahi i te tahi atu mau rima rii. E nehenehe ïa o ˈna e faatanohia i nia i te rima rii tataitahi e e apiti atu ia raua. E tuhaa faufaa ore anei teie? A tamata na i te ohi i te hoê moni, e tatara i te hoê oroi mohina aore ra e taviri i te tapearaa opani ma te ore e faaohipa i to outou rima rahi, e ite ïa outou! E titau atoa hoi to tatou hoa tamuta i to ˈna nau rima rahi “mâuˈa” no te tapea i te naero aore ra no te faaohipa i ta ˈna hamara. Inaha, e peu hairiiri ta vetahi mau nunaa no Tahito ra, i te tâpûraa i te mau rima rahi o te mau faehau enemi o tei haruhia mai, e te reira, ia ore ratou ia nehenehe faahou e haere i te tamaˈi.—Te mau tavana 1:6, 7.

Ia feruri tatou i te mau ohipa atoa ta to tatou mau rima rii e nehenehe e rave, mea maere mau â ia ite e mea iti roa te mau uaua iˈo i roto. A tahi e nehenehe tatou e manaˈo e eita te reira e tano. Oia mau, ia rahi anaˈe te mau uaua iˈo, e rahi atoa ïa te puai. Teie râ, e tupu te mau uaua iˈo i te rahi ia faaohipa-pinepine-anaˈe-hia ratou. Eaha ïa te ohipa e itehia mai te peu e e mau uaua iˈo puai to roto i to tatou mau rima rii? Ia hiˈohia te rahiraa ohipa o ta ratou e rave ra, e riro oioi noa ïa to tatou mau rima mai te mau hoě meumeu ra te huru. Mea fifi roa ïa, e eita roa ˈtu e nehenehe, e rave i te hoê ohipa rave-maite-hia. E nehenehe tatou e haamauruuru i to tatou Poiete i to ˈna faanahoraa, maoti to ˈna paari, i te rahiraa o te mau uaua iˈo o te faatere nei i te rima i roto i te tuhaa nia ˈˈe o to tatou nau rima e to ˈna faatuatiraa ia ratou i te mau rima rii maoti te mau uaua tuatiraa paari maitai!

Te hoê vehî rima tano maitai

E ere noa te iri e tapoˈi ra i te rima i te hoê puohu. Mai te peu e e iiti outou i te niaraa o to outou rima, e ite ïa outou e mea rairai e mea mǎrû atoa te iri i reira. Maoti teie nei vahi taa ê, e nehenehe ïa tatou e uumi i to tatou rima ma te ohie roa. I to ˈna aˈe pae, eita te iri e vai ra i roto i te apu rima e matara ohie noa. A feruri na i te fifi no te tapea maitai i te hoê taoˈa mai te peu e e ere mai te reira te huru! Hau atu, no te haapapu atu â i te tapearaa, ua faaîhia te apu rima e te tahi mau meumeuraa mii, i te tuatiraa iho â râ o te mau rima rii e i raro mai i te rima, i te mau vahi mau i reira e û ai te rima ia haru mai tatou aore ra ia uumi tatou i te tahi taoˈa.

Ia hiˈopoa maite outou i to outou apu rima, e ite mai outou e e ere to ˈna iri i te mea manina maitai. Taa ê atu i te mau omiˈomiˈoraa ite-papu-hia, ua faatoretorehia oia i te mau rahiraa reni huˈa roa e te apapa-maitai-hia te tahi i pihai iho i te tahi e te mau reni omenemene tei parauhia dermatoglyphes, aore ra tupuai o te iri. Ua riro ratou mai te raro-aˈe-raa o te hoê tiaa o te ohipa nei ia mau maitai te mau taoˈa.

I nia roa i teie mau tupuai o te iri, te vai ra te tahi mau pu faatahe hou huˈa roa, e ta ratou ohipa, o te faararirariraa ïa i te apu rima. Ua ite ê na paha outou i te hoê taata rave ohipa i te ǔi-puai-raa i to ˈna rima hou oia e rave ai i te hoê ohipa teimaha. E ere noa te reira i te peu na ˈna. Oia mau, na roto i te ǎhu e noaa mai ia ǔihia na rima, e faaitoito te reira i te mau pu faatahe hou ia hamani ratou i te hou, e na te reira e haamaitai i te piriraa o te iri, ia mau maitai aˈe te mau tauihaa e ravehia mai. E nafea outou mai te peu e mea fifi no outou ia huri i te mau api rairai roa o te hoê buka? Peneiaˈe hoê â mea: e ǔi outou i te hopearaa o to outou mau rima rii i nia i to outou rima rahi. I muri iho, mea ohie aˈe ïa no te vahi i te mau api rairai.

Te vai ra te tahi atu faufaaraa o te mau omenemeneraa e te mau faaohuraa o te mau reni o te iri i nia i te iˈo o to outou mau rima rii: ua riro ratou ei tapao rima no outou. Noa ˈtu e mea fifi roa ia tiaturi, i nia i te tuhaa iti o te hopearaa o to outou rima rii, ua papaihia te hoê hohoˈa o te ore roa ˈtu e itehia i nia i na hau atu i te 50 miria rima rii e te mau rima rahi o te ao nei. Noa ˈtu e e ravehia e piti maehaa hoê â to raua hohoˈa, e nehenehe raua e faataa-ê-hia na nia i to raua mau tapao rima. I te senekele toru hou to tatou nei tau, e faataa na te mau taata hoo taoˈa tinito i ta ratou mau taata hoo na nia i to ratou mau tapao rima, e ravea papu mai te hoê tarimaraa ra. Eita to outou tapao rima e mâ noa ˈtu e e pepe to outou rima rii. E faura faahou mai oia ma te ore i tauihia, mai te peu iho â ïa e e ere i te pepe hohonu roa.

Te mau tausani uaua uira

Eita tatou e nehenehe e ite, e faaroo aore ra e hâuˈa, e to tatou nau rima. Teie râ, ua riro raua ei ravea matamua no te fafaraa ˈtu i te ao e haaati nei ia tatou. Ei hiˈoraa, eaha ta outou e rave mai te peu tei roto outou i te hoê piha poiri roa? E faatoro outou i to outou rima i mua ia outou, ma te faahamaa i te mau rima rii, e e perehahu haere outou i te mau papai o te piha. Oia, e ere noa te mau rima ei mau mauhaa ohiparaa papu, ua riro atoa râ raua ei mau taoˈa haruharu aravihi. E hapono mai ratou ehia rahiraa haamaramaramaraa ma te faaea ore: mea veavea te umu, ua rari te tauera, mea manina te ahu, mea mǎrû te huruhuru o te mimi, e e rave rau atu â. E haamata te paeraa o te tumu ite, oia hoi te fafaraa, e te mau rima.

E fafa vave taa ê noa te iˈo o to tatou mau rima rii, no te mea e rave rahi mau taoˈa aporaa i roto ia ˈna, fatata e 1 400 i te tenetimetera tuea. Mai te peu e e tapea outou e piti pine e 6 milimetera te atearaa te tahi e te tahi, e ia patia outou i to outou hohoˈa mata, e au ra ïa e hoê anaˈe patiaraa. I teie nei, a na reira i nia i te iˈo o to outou rima rii. I teie vahi, no te puairaa o te mau uaua uira, e taa oioi noa ia outou e e piti patiaraa. Maoti teie vahi taa ê o te iˈo o te mau rima rii e nehenehe ai te feia matapo e taio i te papairaa braille [faataahia no te feia matapo]. O vai tei parau e eita e nehenehe e ite e to tatou rima?

O te mau maiuu anaˈe te vaehaa o te rima aore e uaua uira to nia iho. E ere râ te auraa e aita to ratou e faufaa. Oia mau hoi, ua riro te mau maiuu ei turu e ei paruru i te iˈo mǎrû, e te paruparu atoa hoi. Mea au roa atoa ratou no te hohore i te hoê anani, no te raˈuraˈu i te tahi tafetafeta aore ra no te ohi i te hoê poe huˈa roa. Aita anei outou i aniani aˈenei e eaha te vitivitiraa e tupu ai te mau maiuu? Tei te huru ïa o vetahi mau tuhaa. Mea vitiviti aˈe ratou i te tupu i te tau veavea maoti hoi i te tau toetoe. Hau atu, e tupu oioi aˈe ratou i nia i te mau rima rahi maoti hoi i nia i te mau rima nainai, e mea vitiviti aˈe i nia i te rima e faaohipa-rahi-aˈe-hia. Te manaˈohia ra e te tupu nei ratou i roto i te faito au noa i te vitivitiraa fatata e 0,1 milimetera i te mahana.

Te hoê ravea taairaa

E rave rahi mau tapao ta te mau rima e faaite no nia ia tatou. Te hoê aroharaa rima mahanahana, te hoê horomiriraa mǎrû, te rima i haamenemenehia, te hoê rima rii i faatorohia no te tamaˈi atu, e mau haamaramaramaraa anaˈe te reira no nia i to tatou huru. Mea fifi roa no te rahiraa o tatou nei ia paraparau ma te ore e haapapu i ta ratou mau parau e te mau aparaa rima no te faahohoˈa aore ra no te faatoma i te parau. Mea faufaa roa no te feia tariˈa turi ia faaohipa i te mau aparaa rima. I te vahi eita te mau parau e manuïa, na te rima ïa e turu mai. Ua haamau te mau nunaa Inidia no Marite, te feia no te mau motu Vaihi, e te nunaa Bochimans no Afirika i te mau paraparauraa nehenehe mau na roto i te aparaa rima.

E faaite to tatou rima i to tatou huru ia vetahi ê. E ere râ te reira anaˈe. Te haapii mai nei ratou i te tahi mea. I roto i ta ˈna buka Nau rima (beretane), ua papai o John Napier e: “E taoˈa otahi roa te mau rima o te taata, no te mea ua riro raua ei ravea eiaha noa no te faatae i te mau parau, oia atoa râ te horuhoruraa o te aau e te mau manaˈo.” Noa ˈtu e fatata hoê â huru to te mau “rima” o te mau animala e rave rahi e to tatou nei, eita te huru hamaniraa e te mau ravea otahi roa o te rima taata nei e nehenehe e faataahia na roto i te tahi tupuraa matapo. Area ra, ua riro te aravihi o to ˈna hamaniraa ei tapao haapapuraa i te paari o Tei hamani ia ˈna, oia hoi te Poiete o te mau mea atoa, te Atua ra o Iehova.—Apokalupo 4:11.

E tuu faahou ta tatou tamuta apî i ta ˈna naero i rotopu i to ˈna rima rahi e to ˈna rima tohu, e ta ˈna hamara i roto i te tahi rima. I muri aˈe i ta tatou tauaparauraa, peneiaˈe te faatupu nei oia i te hoê faatura apî no to ˈna nau rima faufaa rahi. Oia mau, ua ineine maitai tatou no te rave i te mau mea atoa e itea i to tatou rima ia rave.

[Hohoˈa i te api 24]

I nia hau atu i te 50 miria rima rii e mau rima rahi, aita e piti rima hoê â to raua tapao rima