“E mau urî na te Diabolo”?

UA FAAHITI-RAHI-HIA te parau no te mau hohoniraa a te mau urî pit-bull i Kanada, Beretane, e i te mau Hau amui no Marite i roto i te mau matahiti i mairi aˈenei. Te faataa ra te mau Pu marite no te arai i te mau maˈi e e 42% o te mau 157 taata o tei pohe i te hohoniraa urî i te mau Hau amui no Marite i rotopu i te mau matahiti 1979 e 1988, ua hohonihia ïa e te pit-bull. I Beretane, ua faaau te mau ravea haapuroro parau apî i te mau pit-bull terriers taehae mai te mau “urî na te Diabolo.” Te pii ra te vea Equinox i teie urî “te hoê matini taparahi faahiahia roa.”

I roto i te ohipa opanihia e te ture o te taputôraa urî, te faarirohia ra te pit bull mai te “urî numera hoê i rotopu i te mau urî taparahi,” no to ˈna puai, to ˈna vitiviti, to ˈna faaoromai, e to ˈna taehae. Te faaite ra te vea The Globe and Mail no Toronto, Kanada, e ‘ua haamatarohia te urî pit bull no te haapohe i te tahi atu mau urî.’

“E nehenehe to ˈna nau taa puai e haapepe ino roa i te tahi atu mau animala e te mau taata, te mau tamarii iho â râ, aita hoi ta ratou e ravea no te paruru ia ratou,” o ta te vea The Toronto Star ïa e parau ra. I rotopu i te mau aamu riaria no nia i te hohoniraa urî, te vai ra te hoê tamahine e iva matahiti o tei titauhia e pae hora no te tataˈi i to ˈna mata i muri aˈe i to ˈna hohoniraahia e te hoê pit bull. Ua rapaauhia te hoê tamarii e 13 matahiti no te mau hohoniraa i nia i te mata, te ouma, te avae, te ihu, e te ohure. Ua motumotu ino roa te mata o te hoê potii nehenehe e 21 matahiti, e ua titauhia e 70 niraraa, ua pahono mai hoi te urî pit bull a to ˈna hoa i ta ˈna apa na roto i te hohoniraa mai ia ˈna. I Beretane, ua hohoni e piti “urî a te Diabolo” i te hoê taata e 54 matahiti e ua motu roa to ˈna ihu.

I te omuaraa, ua manaˈo o Kathleen Hunter, raatira vahine no te Taiete tauturu huiraatira no Toronto, e ia haamataro-maitai-hia te hoê pit bull, e riro oia mai te tahi atu urî rata. Tera râ, te farii ra oia i teie nei e “te vai ra i roto i te pit bull te mau tapao hohonu o te faariro ia ˈna ei urî aita e taahia to ˈna huru. E urî ino roa teie . . . , tei faaineinehia no te hohoni ma te ore e faatihaehaehia ˈtu.”a Te faaite ra te faatere rahi no te pu arairaa i te animala no te Tuhaa o te oraora-maitai-raa o te huiraatira no Toronto, o Jim Bandow, e: “E topita faataimehia te pit bull. Eita e itehia e afea râ oia e hohoni ai.”

Te tamata nei te feia iriti ture i te faatitiaifaro i te fifi na roto i te haamauraa e te haapapuraa e rave rahi mau faatureraa. Te titauhia nei te mau fatu pit-bull i Edmonton, Kanada, ia faataa te faito raro roa ˈˈe e 500 000 dala kanada ei tuhaa parururaa e ia aufau i te hoê parau faatia e 100 dala kanada. I Winnipeg, Kanada, aita te mau pit bull apî e faatia-faahou-hia i roto i te mau otia o te oire, e e tia i te mau fatu ia taamu e ia tuu i te hoê tavaha i nia i ta ratou urî e ia faaite i te parau haapapuraa e te vai ra ta ratou tino moni parururaa e 300 000 dala kanada. Ua faaoti te Apooraa Beretane i te hoê ture e taua mau titauraa nei no te mau fatu pit-bull. Ia ofatihia te ture, e nehenehe e faautuahia i te hoê tino moni e te fare auri.

Ia au i te Ture a te Atua ia Iseraela tahito, e tia ia tapea-maitai-hia te mau animala atâta. Mai te peu e e tuu-noa-hia te hoê animala atâta, e hopoia atoa ta te fatu no te fifi e tupu. Mai te peu e e haapohe te animala i te hoê taata, e utua toto ïa to te fatu, e e nehenehe atoa oia e haapohehia. (Exodo 21:29) Ia au i tei haapapuhia i roto i te Ture a te Atua, mea paari mau â no te mau kerisetiano ia rave i te mau faanahoraa e titauhia no te tapea maitai i te mau urî iino aita hoi e taahia to ratou huru aore ra ia haapae i teie mau huru urî.

[Nota i raro i te api]