Ia ora anaˈe te mau pepe tahito

E RIRI rahi to te potii ra o Adeline Nako, tei faahitihia i te omuaraa o teie mau tumu parau, i te fenua o to ˈna mau tupuna, o Tapone. Ia pii anaˈe te tahi mau tamarii i te mau afa Tapone afa Vaihi e e “Japs,” e pahono atu oia e, “E Marite matou.” Ua peni oia i te mau hohoˈa papaihia i nia iho e “A taparahi i taua mau nuu enemi” e ua tia ˈtu oia i roto i te ohipa hooraa mai i te mau titiro no te turu i te tamaˈi i te pae moni. Te na ô ra o Adeline e: “Ua teoteo roa vau i te 100raa e te 442raa o te pǔpǔ faehau o te mau nisei, oia hoi te piti o te ui o te mau afa Tapone, afa Marite, o tei aro ma te itoito no te fenua Marite.”

Teie râ, i to ˈna paariraa mai, ua haamata ihora oia i te aniani e: ‘No te aha te taata e taparahi ai te tahi e te tahi?’ Eita roa te reira e tano. ‘Ua haere te mau Bouddhistes i te tamaˈi. Ua haere te mau kerisetiano i te tamaˈi. E feia haavare anaˈe ratou,’ o ta ˈna ïa i manaˈo. I to ˈna haamataraa i te haapii i te Bibilia e te mau Ite no Iehova, ua tamata ˈtura oia i te Ite e haapii ra ia ˈna na roto i te hoê uiraa, “E haere anei outou te mau Ite no Iehova i te tamaˈi?”

Ua parauhia ˈtura o ˈna e eita ratou e rave i te mauhaa no te taparahi i te taata. I taua tau ra, te uˈana noa ra te tamaˈi i Europa e i Asia. Ua ite atura o Adeline e ua hopoihia te mau Ite i Helemani i roto i te mau aua tapearaa area te mau Ite i te Hau marite ra, ua tuuhia ïa ratou i roto i te fare auri no te mea aita ratou i rave i te mauhaa i roto i te tamaˈi. ‘Tera paha te haapaoraa mau,’ o ta ˈna ïa i manaˈo.

Te hoê hopoia no te hau

A rahi noa ˈtu ai to ˈna ite no nia i te Bibilia, ua hinaaro ihora oia e pûpû i to ˈna ora no Iehova, te Atua o te Bibilia. Ua turai to ˈna auraro i “te Atua hau” ia ˈna ia faarahi atu â i to ˈna aroha na roto i te peeraa i te taahiraa avaˈe o na feia afa Tapone, afa Vaihi e pae o tei ani e haere atu i Tapone i muri noa ˈˈe i te Piti o te Tamaˈi rahi. (Philipi 4:9) Te hinaaro uˈana ra hoi ratou e tauturu i te feia no te fenua o to ratou mau tupuna, e enemi tahito hoi, na roto i te pororaa ei mau mitionare i te parau apî maitai tamahanahana mau no nia i te Basileia ta te Bibilia e faataa ra.—Mataio 24:14.

Te haamanaˈo ra o Shinichi Tohara, tei ani e haere atu e tauturu i te fenua no Tapone o tei ahoaho roa i muri aˈe i te tamaˈi, i to ˈna huru no nia i ta ˈna hopoia. “Ua feruri au i te auraro rahi o te nunaa Tapone no te tavini i te mau fatu taata nei e te emepera,” o ta ˈna ïa e parau ra. “Ua haamanaˈo vau i te mau pairati kamikaze, o tei pûpû i to ratou ora no te emepera na roto i te faaûraa ˈtu i to ratou manureva i nia i te mau pahi tamaˈi enemi. Mai te peu e mai te reira te auraro o te mau Tapone i te mau taata, eaha ˈtu ïa ia itea mai ia ratou i te Fatu mau, o Iehova?”

Na roto i teie mau manaˈo maitatai, i te matahiti 1949, ua tapae atura teie mau taata i Tokyo, tei vavahi-roa-hia na mua noa ˈtu e te mau topitaraa a te mau manureva B-29. Eaha tei itea mai ia ratou i roto i te mau fare rii i roto i te mau vahi paparari? Te tahi mau taata mamahu rii e feia rave ohipa itoito atoa hoi. Oia mau, te faatupu noa râ ratou i te riri e te inoino. E rave rahi râ o tei farii maitai i te poroi a te Bibilia no te hau.

I te matahiti 1953, ua apiti atu o Adeline i taua mau mitionare matamua ra. Ua tauturu oia ma te itoito i te feia e pohe ra i te poia e e poihâ ra i te poroi tamahanahana a te Bibilia. Ua farerei oia i te feia patoi i roto i ta ˈna ohipa pororaa. E parau mai ratou ia ˈna e: “Na outou i taora i te mau paura atomi i nia ia Hiroshima e o Nagasaki!”

E pahono atu ïa oia e, “Ua ite outou e no te mau motu Vaihi mai au. E na Tapone i aro matamua mai ia Pearl Harbor e e rave rahi mau taata o tei pohe i reira. Aita râ te reira i tapea ia ˈu ia haere mai i Tapone no te faaite i teie parau oaoa i te mau taata i ǒ nei.” Mea pinepine teie mau parau i te tamǎrû ia ratou, e e farii ratou i te mau buka e tatara ra i te Bibilia.

Auaa te niu maitai ta teie mau mitionare matamua no Vaihi mai e te tahi atu mau fenua i haamau, i teie nei hau atu i te 150 000 Tapone o tei amui mai i roto i te autaeaeraa o te feia o te ore e “haapii faahou i te tamaˈi.”—Isaia 2:4; Petero 1, 2:17.

Nafea te mau tamaˈi atoa e ore roa ˈi

Oia mau, mea faufaa roa te matauraa i te tahi e te tahi e te faatupuraa i te here miimii ore, no te haamau i te hau na te ao nei. Teie râ, eita te reira e navai. Ua ô atoa te feia o tei here i te hau e e hoa hoi to ratou i roto i te tahi atu pae i roto i te tamaˈi no Patitifa i raro aˈe i te faaheporaa a te mau tumu “faatiahia.” Ua na nia ˈtu hoi te manaˈo here aiˈa uˈana i to ratou mau hinaaro hohonu. Ua patoi vetahi i te haere i te tamaˈi noa ˈtu e e nehenehe ratou e afaihia i roto i te mau aua tapearaa aore ra i te mau fare auri, aita râ ta ratou ohipa, noa ˈtu e mea faahiahia roa, i faahuru ê noa ˈˈe i te manaˈo uˈana no te tamaˈi.

Ia arataihia te hoê nunaa taatoa i roto i te tamaˈi, e ere na te rima taata anaˈe e aratai ra i te mau ohipa. Mea pinepine, e faaite paatoa ratou e mea au aˈe na ratou ia ape i te tamaˈi. Teie râ, te aratai nei te mau mana puai mau ia ratou ia patoi i to ratou mau hinaaro. Te faataa ra te Bibilia i taua mana puai ra mai “te atua o teie nei ao.” (Korinetia 2, 4:4) Oia mau, “te vai noa nei to te ao atoa i raro aˈe i taua varua ino ra,” te Diabolo ra o Satani.—Ioane 1, 5:19; hiˈo atoa Ioane 12:31; 14:30.

Teie râ, te tǎpǔ nei te Bibilia e “na te Atua hau e haaparuparu ia Satani.” (Roma 16:20) Ua tupu te omuaraa o taua taataahiraa ra i nia i te raˈi tau 77 matahiti i teie nei. A faaroo na i te faataaraa ta te aposetolo Ioane i ite i roto i te hoê orama putapû mau 18 senekele na mua ˈtu i to ˈna tupuraa i te matahiti 1914 ra: “E e tamaˈi tei nia i te raˈi . . . Hurihia ˈtura hoi te teni rahi i rapae, o taua ophi tahito ra ïa, o tei parauhia o te diabolo ra, e o Satani hoi, o tei haavare i to te ao atoa nei; i hurihia oia i rapae i nia iho i te fenua nei, e ta ˈna mau melahi atoa ua huri-atoa-hia i rapae.”—Apokalupo 12:7-9.

Mai reira mai, ua tapeahia te Diabolo o Satani na te hiti o te fenua. Na roto i te faaohiparaa i te feia politita e te mau tia a te nuu mai te mau taata haavare ra te huru, ua faatupu oia i te mau mauiui aita e faaauraa i roto i te mau tamaˈi o teie senekele. Teie râ, te haapapu noa ra to ˈna ru i to ˈna riri rahi, inaha “ua ite oia e maa taime poto to ˈna e toe nei.” (Apokalupo 12:12) Na roto i te rima puai o te ‘Tamaiti hui arii no te hau,’ o Iesu Mesia, e haavî te Atua ia Satani i muri aˈe i “te tamaˈi i taua mahana rahi o te Atua Puai hope ra” i “Aramagedo.”—Isaia 9:6; Apokalupo 16:14, 16.

Taa ê atu i te mau tamaˈi atoa o tei faatupuhia e te mau taata, te ture o te parau-tia o te faatere i teie tamaˈi a te Atua e fatata maira, e ture tia roa ïa. O te ture ïa a te Poiete o te huitaata nei, o te putapû nei no te maitai o te mau taata. Taa ê atu i te mau faatere politita o te faahepo nei i to ratou nunaa ia haere i te tamaˈi, area o Iehova ra, to tatou Poiete, e faaue atu oia i to ˈna nunaa mai ta ˈna i parau atu i te nunaa o Iseraela i te tau o Iehosaphata no Iuda i te senekele ahuru hou to tatou nei tau e: “E ore outou e aro i tena na, e haamau outou, e tia noa mai, e hiˈo i te ora na Iehova e horoa mai na outou.”—Paraleipomeno 2, 20:17.

Ia ore roa anaˈe te mau ata poiri o te mana o Satani, e fanaˈo te mau taata no te mau nunaa atoa i te hau e te ino ore mau na te fenua atoa nei. E riro ïa teie mau huru tupuraa i tohuhia mai e Isaia ei parau mau. “Inaha, te hamani nei au i te raˈi apî e te fenua apî, e ore hoi tei mutaaihora e manaˈohia, e ore e faatupu-faahou-hia i roto i te aau.”—Isaia 65:17.

No reira, eita te ohipa i tupu i Pearl Harbor e haamanaˈo-faahou-hia ma te mauiui rahi, e eita atoa te feia i atihia i te harururaa te mau paura atomi i Hiroshima e i Nagasaki e auê faahou “Eiaha faahou o Hiroshima!” No te aha? No te mea e riro atoa mai teie parau tohu a Isaia ei parau mau no te taata tataitahi i nia i te fenua nei: “Na ˈna [te Atua] e haava i roto i te mau [nunaa], e e faataa i te parau i te taata atoa e rave rahi; e tiapai ratou i ta ratou ˈoˈe ei auri arote, e ta ratou mau mahae ei tipi tope raau; e ore te hoê fenua e aa mai i te tahi fenua i te ˈoˈe, e ore hoi ratou e haapii faahou i te tamaˈi.”—Isaia 2:4.

Ua tupu ê na teie mau parau tohu i rotopu i te mau Ite no Iehova, o tei riro i teie nei mahana ei autaeaeraa e rave rahi mirioni taata na te ao atoa nei. E ite-papu-hia te reira i roto i te mau tairururaa rahi a te mau Ite no Iehova e faatupuhia i roto i te mau fenua taa ê. E nehenehe atoa outou e apiti mai i roto i teie autahoêraa e teie hau na te ao atoa nei. A haere mai e a haapii nafea ia riro ei melo no te nunaa o tei ‘tiapai ê na i ta ratou ˈoˈe ei auri arote e ta ratou mau mahae ei tipi tope raau,’ o te ore “e haapii faahou i te tamaˈi,” e o te tiai ra i te hoê paradaiso e fatata roa i te haamauhia i nia i te fenua, i reira eita te tamaˈi e tupu faahou.—Salamo 46:8, 9.

[Hohoˈa i te api 9]

Ua farii o Jerry e Yoshi Toma, o Shinichi e Masako Tohara, e o Elsie Tanigawa i te haere e tauturu i to ratou mau enemi tahito

[Hohoˈa i te api 10]

I teie mahana, te haamori nei te autaeaeraa na te ao nei ma te tahoê e te hau