“E ere na ˈu te hape!”—Te tau o te aperaa i te hopoia
Crash! Ua horo atura te mama o Johnny i roto i te fare tutu no te hiˈo e eaha teie maniania rahi. Ua huˈahuˈa roa te auˈa faraoa monamona i nia i te tahua. Te tia noa ra o Johnny i pihai iho, te tapea noa ra ma te haama rii i te hoê faraoa monamona i roto i to ˈna rima e ma te tamata i te hoê â taime i te rave mai te mea ra e aita o ˈna i rave i te hoê ohipa ino. “E ere na ˈu te hape!” o ta ˈna ïa e parau oioi noa.
Ua ite maitai te mau metua e eita te mau tamarii e farii ohie noa e ua hape ratou. Teie râ, te ite-atoa-hia ra teie huru fifi i roto i te totaiete a te feia paari. Te rahi noa ˈtura te taata o te tiaturi nei e mea puai aˈe te faahemaraa e haamâha i to ratou mau hinaaro i ta ratou e nehenehe e faaoromai.
Ei hiˈoraa, te vai ra te hoê taata o tei hamani ino i te hoê vahine e toru taime. Ua patoi oia i mua i te haavaraa e na to ˈna mau oromona otane i turai ia ˈna ia na reira; mea teitei roa te faito o to ˈna oromona testosterone. Ua faatiamâhia oia. Ua parau te hoê taata politita o tei faahapahia i te haavare e ua na reira oia no te tahi fifi i te pae no te inuraa i te ava. Ua faatiamâhia te hoê taata hoo huna i te raau taero i muri aˈe i to ˈna parauraa e ua roohia oia i te “fifi o te hiaai e haa”.
Ia au i te vea U.S.News & World Report, hau atu i te 2 000 pǔpǔ o te putuputu nei i te mau hebedoma atoa no te aˈo atu i te feia e hiˈo nei ia ratou mai te feia faatîtîhia i te taatiraa tino aore ra te here. Hau atu i te 200 taatiraa o tei rave mai i te iˈoa na ratou ia au i ta te Pu tauturu i te taero ava, no te tauturu i te feia “faatîtîhia” e te tahi atu mau “peu”, mai te Pu tauturu i te feia hamani ino, Pu tauturu i te mau mâhu mâha ore, Pu tauturu i te feia hauti moni, Pu tauturu i te mau mesia e Pu tauturu i te feia rave ohipa mâha ore.
Te turu nei vetahi feia aravihi i te manaˈo ra e ua riro teie mau haerea faaino atoa ra ei mau haerea faatîtî, area vetahi ra, te haapeapea nei ïa no teie peu haavî apî e faateiteihia nei. Teie hoi ta te hoê taata maimi no nia i te feruriraa i parau: “Ia faatupu tatou i te hoê ao tei î roa i te mau maˈi faatîtî, e faatupu ïa tatou i te hoê ao i reira e fariihia te mau mea atoa.” Te faaara ra te hoê taote rapaau i te feruriraa e ia manaˈo anaˈe te mau taata e ua faatîtîhia ratou i te tahi peu e aita ta ratou e ravea faahou, mea fifi roa ˈtu â ia rapaau ia ratou; inaha, e mau hohonu roa to ratou manaˈo faatiamâ ia ratou i roto ia ratou iho.
Te faataa ra te taote William Lee Wilbanks, orometua haapii i te pae no te haavaraa i te ohipa taparahi taata e ua riro te ravea apî no te rapaauraa i te mau peu faatîtî ei tuhaa no te hoê tatararaa e maha parau o ta ˈna e pii ra te Peu faufau Apî: “Aita ta ˈu e ravea.” Te faahapa ra oia i “te peu e parare noa ˈtura i rotopu i te mau aivanaa ia faariro i te mau taata mai te mau taoˈa i raro aˈe i te mana o te mau puai no roto mai e no rapaeau mai, o ta ratou e ore e nehenehe e haavî.” Te na ô faahou ra oia e: “Ia au i teie huru faataaraa, mea iti roa aore ra aita roa ˈtu to te tiamâraa ia maiti e tuhaa i roto i te haerea o te taata.”
Ua faaite mai te mau maimiraa e mea puai aˈe te mana o te hinaaro o te taata i nia i te mau peu faatîtî matau-roa ˈˈe-hia i tei manaˈohia na. Ei hiˈoraa, fatata e 75% o te mau taata tîtî i te héroïne tei ore i manuïa i te tiamâ mai i teie peu. Teie râ, i rotopu i te feia tei haere i te tamaˈi i Vietnam, mea teitei aˈe te rahiraa taata i manuïa — fatata e 90% o tei haapae i teie peu. No te aha? Hoê â raau taero, hoê â faito faatîtîraa. Peneiaˈe paha, ia au i te manaˈo o Wilbanks, no te mea “ua tauturu ta ratou huru haafaufaaraa i te mau ohipa e to ratou haavîraa ia ratou iho, ia ratou ia ‘parau e Aita’”? Te vai ra iho â teie mau mea e parauhia ra te matauraa i te tahi mau taoˈa aore ra te hiaai hohonu i mua i te tahi mau fifi. Mai ta Wilbanks e parau ra, “e haafifi roa ˈtu â” teie mau ohipa “i te aroraa i te faahemaraa. Teie râ, e nehenehe e upootia i te aroraa.”
Oia mau. Mea puai roa paha te faahemaraa o te haamâ-oioi-raa i te hinaaro, teie râ, e puai taotiahia teie. Mai ta te ohipa a te mau Ite no Iehova i haapapu mai na te ao atoa nei, e nehenehe te mau taata rave i te raau taero, te feia inu ava, te feia faaturi, te feia hauti moni e te mau mahu e haapae i te hinaaro e haamâha oioi noa i to ratou hiaai. Maoti te mana o to ratou hinaaro e te mea faufaa roa ˈtu â, te tauturu o te varua moˈa o te Atua, e nehenehe ratou e faaruru i ta ratou mau fifi e te na reira mau nei ratou. No reira, taa ê atu i te parau a te feia “aravihi”, ua ite maitai to tatou Poiete afea râ e tia ˈi ia tatou ia amo i te hopoia o ta tatou mau ohipa (Numera 15:30, 31; Korinetia 1, 6:9-11). Teie râ, e Atua hamani maitai atoa oia. Aita o ˈna e titau ra ia rave tatou hau i te maraa ia tatou, ‘ua ite hoi oia e e repo tatou nei’. — Salamo 103:14.