Te hoê fenua mâ—Mea titauhia

Na to matou papai vea i te fenua Beretane

UA ITE anei outou e i Lonedona te titau ra te ture i te feia faahoro i te mau pereoo uira tarahu ia tamâ maitai i to ratou pereoo? Mai te peu noa ˈtu e eita ratou e tâua i teie ture, e nehenehe ratou e opanihia i te faahoro i roto i te oire. Noa ˈtu eaha te huru o te mau purumu, e noa ˈtu e mea repo roa te rahiraa o te tahi atu mau pereoo uira i te mau mahana atoa, area ra, mea mâ maitai te mau pereoo uira tarahu no Lonedona. E faatupu te mau vahi anaana maitai o te pereoo i te teoteo e te oaoa o te taata faahoro e te feia o ta ˈna e faauta ra.

Oia atoa, ia mâ maitai to tatou fare, to tatou ahu aore ra ta tatou mau tauihaa, e riro tatou i te oaoa. Teie râ, ia hoˈi noa ˈtu te tamarii haere haapiiraa i te fare e ia ite atu to ˈna metua vahine ia ˈna i te tomoraa mai i roto i te fare e to ˈna tiaa repo, auê hoi e!

Inaha, maoti te vai-mâ-raa o te tino e oraora maitai ai te taata. Mea faufaa roa ia atuatu maitai i to ˈna tino e ia horoi tamau ia tatou no te tatara i te repo, o te nehenehe hoi e faatupu i te maˈi. Te monihia nei te tahi mau totaiete tapihooraa tauihaa na roto i te hooraa ˈtu i te mau raau tamâ fare, te mau faaanaana tauihaa, te mau puˈa e te mau raau tupohe i te mau manumanu ino o ta tatou e faaohipa nei ia vai mâ noa to tatou tino e te mau mea e haaati ra ia tatou. Ma te papu maitai, ua ite te rahiraa o te taata e mea titauhia te vai-mâ-raa. Teie râ, mai te peu e te ora ra outou i te oire, ua ite atoa ïa outou e ere roa ˈtu mai te reira te huru.

A haapao maitai — e haaviiviiraa!

Ua ite maitai te feia no te oire e eaha mau na te haaviiviiraa e te repo o te vahi nohoraa. Te ite nei ratou i te mau pehu aore e ohihia nei o te faarue-noa-hia i nia i te purumu e te mau nanaˈoraa faufau e faaino nei i te mau fare i te mau vahi taata. Te huti nei ratou i te mau auauahi iino no roto mai i te mau tereraa pereoo rahi e te rupehu avaava o te faaihuihu nei i te tahi mau oire rahi.

No reira paha te mau taata e rave rahi e haere ai i te mataeinaa ia vata anaˈe ratou. Mea au roa hoi na ratou ia huti i te mataˈi mâ aore ra ia inu i te pape ateate no roto mai i te tahora pape o te mouˈa. Mea au roa na te tahi atu mau taata e haere i te pae miti no te tarava i nia i te one aore ra no te haere e hopu i roto i te pape haumǎrû.

Heru na râ! Ua viivii roa atoa teie mau vahi. “Eaha ïa? o ta outou paha e parau. Mea mâ maitai hoi i ǒ nei.” Ahani, e hiˈo anaˈe na mai te peu e ‘mea mâ maitai’ te mataˈi e te pape mai tei manaˈohia.