Te papai mai nei te feia taio

Te mau huma Mauruuru roa no ta outou tumu parau no nia i te tauturu e horoahia ˈtu i te mau huma (08 no atete 1989). Ua roohia vau i te hoê maˈi ino roa e haaparuparu nei i to ˈu mau uaua, te mau puoiraa ivi e te tahi atu mau vahi o to ˈu nei tino. No reira, ua tâpûhia vau e rave rahi taime, e ua titauhia ia ˈu ia rave i te parahiraa huira, i te tauihaa no te tauturu ia ˈu ia haere, te turutootoo e te tahi atu mau matini no te faaafaro i te tino. E 25 matahiti noa to ˈu, e te faaroo nei au i te taata i te parau-roa-raa mai ia ˈu aore ra ia vetahi ê i te tahi mau parau rii mauiui mau no nia i to ˈu nei maˈi. Te vai ra iho â te feia ui maere, area vetahi ra, mea ino roa ïa ratou e aita ratou e tâuˈa nei i to ˈu huru. Inaha, mea faufaa roa teie tumu parau eiaha noa no te mau huma, no te feia atoa râ e fanaˈo nei i te oraora-maitai-raa, no te mea e nehenehe ratou e haapii e nafea ia haapao i te manaˈo o vetahi ê.

D. H., Fenua Marite

Fatata roa vau i te taeahia i te 14 matahiti e te hinaaro nei au e haamauruuru ia outou no ta outou tumu parau no nia i te tauturu no te mau huma i neneihia i roto i te vea o te 8 no atete 1989. I to ˈu haereraa i te fare haapiiraa tuatahi, e toru tamarii turi i roto i ta ˈu piha haapiiraa. Aita roa ˈtu te tahi atu mau tamarii i tâuˈa noa ˈˈe ia ratou e e faahiti noa na ratou i te tahi mau parau no nia ia ratou no te mea ua ite maitai ratou e aita teie mau tamarii e faaroo maira i ta ratou parau. I to matou iteraa i te reira, ua opua aˈera matou te tahi mau tamarii e haapii i te parau na roto i te mau hautiutiraa rima. I to te tahi pueraa iteraa i teie ohipa anaanatae mau, ua haamata atoa ˈtura ratou i te haapii i teie reo. Te hinaaro nei au e riro i te hoê mahana ei auvaha no te feia turi e te vava i roto i te mau tairururaa a te mau Ite no Iehova.

A. B., Fenua Marite

Afaifai parau Fatata hoê matahiti i teie nei, ua afaihia te tahi mau parau haavare no nia ia ˈu nei. I tera taime, ua mauiui roa vau, tera râ, aita mâua to ˈu metua tane i haamaoro e itea mai nei ia mâua i te taata i afai i teie mau parau, e i tera iho â mahana, ua ore roa teie mau parau faaino. Ua tauturu mai te tumu parau (08 no tiurai 1989) ia ˈu ia haamoe i teie haavare ino mau.

P. M., Fenua Marite

E 17 matahiti to ˈu, e te faahiti rahi nei te taata i to ˈu parau. I te hoê po, ua farerei au i te hoê o te feia e faaino ra ia ˈu, tera râ, aita vau i taa e nafea râ. I to ˈu hoˈiraa ˈtu i te fare, ua ite atura vau i ta outou tumu parau, e ua haamauruuru ihora vau ia Iehova ma to ˈu mafatu taatoa i to ˈna pahonoraa mai i ta ˈu mau pure. Oia mau, ua haapii au e nafea râ i mua i teie mau taata e ua taa atoa ia ˈu e eita e tia ia haafaufaa rahi roa ia ˈu iho. Inaha, e ere hoi au i te taata iti faufaa roa e e tamau noa ˈi te taata i te faahiti i to ˈu parau i roto i to ˈu oraraa taatoa. E hau atu, ua ite maitai to ˈu mau hoa mau e o Iehova e, e mau parau haavare anaˈe te mau faainoraa e faahitihia ra no nia ia ˈu nei. Mauruuru roa no to outou iteraa i te mau mea e hinaarohia ra e te mau taurearea.

L. U., Beresilia

Parau faufau Aita i maoro aˈenei, ua papai atu vau ia outou no nia i te mau parau faufau a te mau taurearea. I teie nei mahana, ua tae mai ta outou vea o te 08 no setepa 1989 e, ua maere roa vau i te iteraa i te tumu parau ra “Eaha te ino ia parau faufau i te tahi taime?”. Ua ite maitai hoi au e ua faaineinehia teie tumu parau hou vau i hapono atu ai i ta ˈu rata. Auê hoi e, ua itoitohia vau e ua puai atoa to ˈu faaroo i to ˈu iteraa i te pahonoraa i ta ˈu mau pure na roto i ta outou mau papai.

J. A., Fenua Marite

Te hoohia nei te pohe E parau mau anaˈe te mau parau atoa o ta ˈu i taio i roto i ta outou tumu parau (8 no tiurai 1989) e e mau parau maramarama maitai. Ua papu ia ˈu i te reira, no te mea hau atu i te ahuru matahiti to ˈu puhipuhi-noa-raa i te avaava e ua ite au i te mau faahopearaa ino: rohirohi, e tahe te hou e te iria ia pau anaˈe ta ˈu mau avaava. Ua opua ihora vau i te hoê mahana e faaore i te avaava, e piti noa râ avae to ˈu tapearaa. I muri aˈe, ua haamata ˈtura vau i te haapii e te mau Ite no Iehova. Ua haapii atura vau ia faaohipa i te mau aˈoraa bibilia i roto i te Korinetia 2, 7:1, e ua faaea roa ˈtura vau i te puhipuhi i te avaava. Te opua nei au e riro ei Ite bapetizohia i te mau tau i mua nei.

A. P., Paniora