“Te hoê ohipa faahiahia roa a te natura”
MEA na reira to te hoê aivanaa no Afirika-apatoa faataaraa mai i te parau no nia i te ihu o te elefani. Maoti teie ihu, aita hoi e ivi e mea hamanihia i te iˈo amui, e nehenehe ai te elefani e huti mai e 4 litera pape o ta ˈna e tutuha ˈtu i roto i to ˈna arapoa. Mai te peu e aita to ˈna e ihu, mea ohipa rahi roa ïa no teie animala rarahi ia tuturi i te mau taime atoa e hinaaro ai o ˈna e inu i te pape. Maoti atoa to ˈna ihu e nehenehe ai oia e amu e 230 kilo maa tupu i te mahana. E nehenehe atoa o ˈna e pohe i te poia mai te peu e ua pepe ino roa to ˈna ihu inaha, e melo faufaa roa teie no ˈna.
E faaohipa te elefani i to ˈna ihu no te rave i te tahi atu mau ohipa, mai te faaararaa ˈtu i te tahi pae i mua i te tahi ati, te mirimiriraa i te aiû elefani aore ra no te tairi atu ia ˈna mai te peu e aita o ˈna e haapao maitai. E pinepine oia i te faaohipa i to ˈna ihu no te pîpî ia ˈna i te pape aore ra i te vari. No te aha hoi o ˈna e rave ai i te vari? Peneiaˈe paha no te paruru i to ˈna iri i te veavea e te patia o te mau manumanu. Eaha te tumu te elefani e faatia ˈi i to ˈna ihu i nia i te tahi taime, mai te hoê mauhaa hiˈopoaraa a te pahi na raro i te moana ra te huru? No te ite ïa i te tereraa o te mataˈi e no te hâuˈa i te mau mea ta ˈna i ore i matau. No reira, e faaohipa ïa oia i teie melo faufaa mau, eiaha noa no te fafa, no te hâuˈa atoa râ. Te faataa ra o Jim Williams, tei pohe hoi i teie nei, i roto i ta ˈna buka ra Bill te elefani (beretane) e mea nafea te elefani e faaohipa ˈi i to ˈna ihu:
“Mai te peu e eita e noaa ia ˈna i te hoê pae o to ˈna tino e maero ra, eita noa o ˈna e uî i nia iho i te hoê tumu raau; e rave atoa o ˈna i te tahi raau roa no te raˈuraˈu maitai ia ˈna. Mai te peu e mea poto roa te raau, e imi ïa o ˈna i te hoê raau roa ˈˈe.
“Ia amu o ˈna i te aihere e te vai ra te repo i nia iho, e tutu o ˈna i nia iho i to ˈna avae ia topa roa te repo; aore ra mai te peu e te vai ra te pape i reira, e tamâ o ˈna i te aihere hou oia a amu atu ai.”
Hau atu i te piti ahuru matahiti te maoro to Jim Williams rapaauraa i te mau elefani i haapiihia no te faauta i te raau i tâpûhia na roto i te mau ururaau teck i Birmanie. Te parau ra o ˈna e ua huna o ˈna i te huero raau i roto i te maa a te elefani, i te tahi râ taime, ma te faaohipa i to ˈna ihu, “e tatara oia i te huero raau (e au to ˈna faito nainai i to te huero aspirine ra) mai roto mai i te tamaraini, te hoê maa mai te popo iti ra te faito, i reira hoi teie huero i te hunaraahia. Mai te huru ra ïa e te parau maira teie animala e: ‘Eita vau e vare ia oe.’”
Te parau atoa ra o ˈna e: “E nehenehe atoa ta te elefani e tatara mai i te hoê aihere tei tafifi i nia iho i te hoê tumu raau, e e hau atu hoi to ˈna aravihi i to te taata ra o te faaohipa i to ˈna e piti rima. Inaha hoi, mea aravihi aˈe te mau melo ta ˈna e faaohipa no te fafa, i to te taata ra.”
No reira, ia ite noa ˈtu outou i te hoê elefani i roto i te hoê vahi i reira te mau animala e paruruhia ˈi aore ra i te hoê aua faaiteiteraa animala, no te aha outou e ore ai e rave mai ta Gerrie de Graaff e parau ra i roto i te vea Custos no nia i te mau animala oviri, no Afirika Apatoa e: “A hiˈo atu i te animala ma te faatura ˈtu ia ˈna e a rave i te taime no te hiˈopoa maite atu i teie ohipa faahiahia roa a te natura oia hoi: te ihu o te elefani.” E i muri iho, a uiui na ia outou iho e: ‘O vai te tumu o teie melo faahiahia mau ra e te aravihi atoa hoi?’ I teie nei uiraa, te pahono ra te Bibilia e na te Atua ra o Iehova i poiete i ‘te mau animala atoa o te fenua ma to ratou huru’; i muri iho, “hiˈo aˈera te Atua i te mau mea atoa ta ˈna i hamani, e inaha, e mea maitai roa”. — Genese 1:25, 31.