E tano mau anei ia na reirahia?

TEIE TE UPOO parau o te vea ra Newsweek i roto i ta ˈna numera o te 10 no atete 1987 “Te maˈi pee o te SIDA: te matahiti e taiohia ˈi e rave rahi mumera”. I nia 12 api, e itehia te mau hohoˈa o na taata e 300 i roohia i te SIDA i te mau Etats-Unis. O te tahi noa hoi teie mau taata i roto i na 30000 taata tei pohe i te SIDA i roto i taua fenua ra e tae roa mai i teie mahana. Inaha hoi, i nia i na 300 taata, fatata 17 tei roohia i taua maˈi ra i muri aˈe i te pâmuraahia te toto i roto ia ratou aore ra i muri aˈe i to ratou amuraa i te maa e toto to roto, mai te rahiraa tausani taata.

Teie te tahi mau ohipa i tupu: “A rapaauhia ˈi oia, ua pâmuhia te toto ino i roto ia ˈna”, “faainohia e te hoê pâmuraa toto i te matahiti 1983”, “Ma te faainohia e te hoê pâmuraa toto, ua peehia aˈera ta ˈna tane i te tirotiro (virus) o te SIDA e tae noa ˈtu ta ˈna tamaiti”, “Ua roohia oia i te SIDA i te pâmuraahia ˈtu te toto i roto ia ˈna”, “Ua tupu mai te hoê SIDA i roto ia ˈna i muri aˈe i te hoê pâmuraa toto ia ˈna i tâpûhia i te matahiti 1981”, “Ua roohia o ˈna i te hémophilie; e pohe ta ˈna tamaiti iti i te SIDA e e roohia ta ˈna vahine i te ARC (na mua ˈˈe te SIDA e papu maitai ai]”, “E roohia o ˈna i te SIDA i muri aˈe i te hoê pâmuraa toto; e faaromai oia e toru matahiti te maororaa i te mau mauiui ino mau, inaha ua haaparuparu e ua matapo rii mǎrǔ maira oia”.

Te hoê aiû 13 avae “tei pohe, mai to ˈna metua vahine, i ino roa i muri aˈe i te hoê pâmuraa toto” tei faaô mai te SIDA i roto ia ˈna.

I te mea hoi e ua papu-maitai-hia taua mau fifi ra, no te aha ïa vetahi mau mana e onoono faahou ai e faahepo atu i te pâmu i te toto i roto i te mau Ite no Iehova e tae noa ˈtu i roto i ta ratou mau tamarii? I roto i te rahiraa o te tupuraa i farereihia, e nehenehe te tahi atu mau huru rapaauraa e faaohipahia, e te oaoa roa nei te mau Ite no Iehova i te tahoê atu e te mau taote e faaau mai ia ratou i te tahi atu huru rapaauraa e ore e patoi i te opaniraa a te Atua no nia i te toto. — Levitiko 17:11, 12; Ohipa 15:28, 29.

[Hohoˈa i te api 29]

Ua pohe te tahi mau aiû i te SIDA i muri aˈe i te pâmuraahia te toto i roto ia ratou.