Nafea ia hoo mai i te oaoa ma te moni ore

Ma te marô te arapoa na roto i to outou haere-maoro-raa na nia i te mahana puai, tapae atura outou i roto i te hoê oire iti. I reira, te faaite ra te hoê tabura e ua faataahia te mau inu haumǎrû na outou. Taui roa ˈtura to outou huru i to outou iteraa e aita hoê aˈe ta outou e moni no te aufau i taua mau inu haumǎrû ra.

I mua i to outou hepohepo, te parau maira hoi te taata hoo taoˈa ia outou e: ‘A haere mai, e nehenehe ta outou e hoo i te inu eita vau e ani atu ia outou i te moni.’ I taua taime ra, e mauruuru roa outou i taua pûpûraa horoa maitai ra. I muri iho, e uiui iho â ïa outou i te tahi mau uiraa. ‘Nafea ïa te reira?’ ‘E nehenehe anei e hoo mai i te tahi mea ma te moni ore?’

A hoo mai ma te moni ore

Ma te maere mau, ua farerei o Karel e o Julian, raua toopiti atoa ra o ta tatou i faahiti i roto i te apî 3 i taua huru tupuraa ra. I te tahi anotau, ua manaˈo raua e e faaoaoa te moni ia raua. Teie râ hoi tei farereihia e Karel. Te faatia ra oia e: “Ua taui te haapiiraa bibilia i to ˈu manaˈo no nia i te moni. Ua horoa mai oia no ˈu i te tiaturiraa no te ora mure ore i nia i te hoê fenua o te riro mai ei paradaiso, tiaturiraa tei hau atu i te faufaa i te mau mea o ta ˈu e nehenehe e hoo mai i te moni.” Area o Julian ra, te hinaaro ra hoi e riro oia e riro mai ei ona milioni, teie ta ˈna e faaite ra: “Ua fatata roa i te roaa mai ia ˈu i te mea ta ˈu i opua a itehia ˈi ia ˈu i te parau mau e vai ra i roto i te Bibilia.”

Hoê atoa ïa huru to Kiyoshi Tomomitsu, faatere tahito no te hoê faretoa rahi no Tapone, tei tuu ta ˈna ohipa na mua ˈˈe i te mau mea atoa, e ua tae roa oia i te manaˈoraa e te haapaoraa i to ˈna utuafare, ‘e ere ïa i te mea faufaa’. Teie to ˈna mau huru feruriraa: “Te manaˈo noa ra vau e te faaoaoa ra vau i to ˈu utuafare na roto ia paruru vau i to ratou oraraa no a muri atu na roto i te mau ohipa materia.” Eaha te mea i faataui i to ˈna hiˈoraa no nia i te moni e te mau maitai materia? Ua pahono mai oia e: “Te tahi mau irava no roto i te Bibilia, mai te Maseli 23:23, o te parau ra: ‘E hoo i te parau mau, e eiaha roa e hoo-faahou-hia ˈtu.’”

E ani paha ïa outou e nafea vau e nehenehe ai e ‘hoo mai i te parau mau’?

Te tia ia aufauhia e roaa mai ai te oaoa

E titau te reira i te taime. ‘A faaherehere i te taime’, ta Paulo ïa e faaara ra, “no te mea e anotau ino teie.” (Ephesia 5:15-17. E oaoa roa te mau Ite no Iehova e ora ra i pihai iho i to outou nohoraa i te haapii atu ia outou i te mau parau mau e vai ra i roto i te Parau a te Atua, te Bibilia, i te taime ta outou e maiti e, hau atu â, ma te tamoni ore.

E au ore anei outou i te ‘farii’ i te reira? Mai te peu e mai te reira te huru, a hiˈopoa hohonu i te mau parau a Iesu i muri nei: “E ao to tei hiaai i te maitai; e faaîhia hoi ratou.” Ma te huti i te feruriraa o te feia e faaroo ra ia ˈna i nia i te ravea e roaa mai ai te oaoa, te parau nei â o Iesu e: “E ao to tei haehaa te aau, no ratou hoi te basileia ra o te ao.” (Mataio 5:3, 6). Taua faatereraa i nia i te raˈi ra oia hoi te Basileia o te Atua, te mana hoê roa ïa e nehenehe e horoa mai i te oaoa no outou.

Eaha ˈtura ïa te parahiraa o te moni i roto i to outou oraraa? Te faaite maira te Bibilia i te reira ma te ohie mau.

Te faaohipa-maitai-raa i te moni

Te horoa nei oia i teie aˈoraa: “E faatura ˈtu ia Iehova i ta oe ra mau taoˈa rarahi.” (Maseli 3:9). No reira, te feia e imi nei i te oaoa i pihai iho i te Atua, te faaohipa ra ïa ratou i ta ratou moni na roto i te hoê huru e auhia mai ai oia. Te faaitoito nei ratou i te faanavai i te hinaaro materia o te utuafare (Timoteo 1, 5:8). Te aupuru atoa nei ratou i to ratou mau metua i te pae faaroo. Te pûpû atoa nei ratou i te mau ô no te tauturu i te ohipa haaparareraa i te hoê haapiiraa itoito i te pae varua na roto i te ravea o te Bibilia e te mau aratairaa bibilia, mai teie vea.

I te mea hoi e ua ite ratou e e haamou te Basileia o te Atua i taua mau tumu materia ra, te nounou taoˈa e te miimii o te totaiete taata nei, eita ïa ratou e faaohipa i ta ratou moni i roto i te mau opuaraa o ta ratou hoi i ite aˈena e eita e manuïa (Daniela 2:44). Te ora nei râ ratou i te hoê huru oraraa o te aratai ia ratou ia mauruuru roa i te mau mea e titauhia, oia hoi ‘te maa e te ahu’. — Timoteo 1, 6:8.

Te oaoa i teie nei iho â — E mea mau ïa

Te faatia ra o Sue, te hoê vahine Beretane, e: “Te hoê o te mau ohipa matamua o ta ˈu i maere i to ˈu haereraa i rotopu i te mau Ite no Iehova, inaha, te feia atoa e faaohipa i te mau parau tumu o te Bibilia i roto i to ratou oraraa e tei pûpû taatoa ia ratou i roto i te faaohiparaa i ta ratou haamoriraa mai te mea ra ïa e ua roaa ia ratou i te mau mea atoa o ta ratou e hinaaro ra.” Ua parau atoa mai ta ˈna tane, o John, i te reira. Te faataa nei oia e:

“Mea na roto i to ˈu haapiiraa i te mau parau mau o te Bibilia to ˈu taaraa e eaha te mea e roohia nei i nia i te rahiraa o te taata. Te mau mea atoa ta ratou e hinaaro e no reira ratou e rave ai i te ohipa, ua haamau taatoahia ïa i nia i te moni. Auaa te Bibilia vau i taa papu ai e e ere te reira i te oaoa. Te taa ra hoi ia ˈu i teie nei e e noaa mai te oaoa ia tâuˈa tatou ia vetahi ê e e tia hoi ia tamau noa i te na reira.”

E ere i te mea maere roa te huru tupuraa i farereihia e o John e o Sue. Mai ia raua, e nehenehe hau atu i te toru milioni mau Ite no Iehova e haapapu mai i te tupuraa mau o te parau tǎpǔ a Iesu: ia imihia na mua te Basileia o te Atua e Ta ˈna parau-tia, e ‘amuihia’ mai ïa te mau mea materia atoa e titauhia. — Mataio 6:33.

Te imi ra anei outou i te mau pape haumǎrû o te parau mau? Noa ˈtu e mea moni outou aore ra mea veve, e nehenehe e itehia ia outou i te oaoa mai te peu e e haapao outou i teie piiraa a te Atua e na ô ra e: “E te feia atoa i hiaai ra e, e haere mai i te pape nei! e te feia ario ore ra, a haere mai, e hoo (...) noa eiaha ei ario, e eiaha ei hoo.” (Isaia 55:1). Te faufaa noa nei â teie titauraa tǎpǔhia. A pahono atu inaha teie te taime tano.

[Hohoˈa i te api 28]

Mea na roto i te faaohiparaa i ta tatou moni no te maitai o to tatou utuafare e no vetahi ê, e itehia mai ai ia tatou i te oaoa.