Te anavai Li — Te hoê nehenehe aita e faaauraa

NO ROTO mai o ˈna i te mau mouˈa e te tahe ra te anavai Li i te pae apatoa. E aano roa ˈtu oia e tahe rii mǎrû noa ˈtu ai i Guilin, i te pae apatoa-hitia o te râ o te fenua Taina, te hoê oire tahito taata roa e vai ra i to ˈna pae atau.

Mea taa ê o Guilin i te mau oire tooa o te râ. I te mau hora taata, e î roa to ˈna mau aroâ i te mau pereoo taataahi. Te tahi noa tau taxi e te mau pereoo uta tauihaa e faataˈi ra i te pu ia nehenehe ratou e tere na ropu i te pereoo taataahi. Mea oaoa te feia e na nia ra i te pereoo taataahi, aita ratou e tâuˈa ra i te mau pereoo uira e tere ra na pihai iho ia ratou. Aita e inoinoraa, aita e tuôtuôraa, aita hoi e ririraa. Eita e nehenehe e faaauhia i te mau hora taata i New York, i Paris aore ra i Mexico. E mea taa ê mau, te vai ra râ te mau parau no te faataa i te reira.

I raro mai, te vai ra te mau oire rii i te hiti o te anavai Li. I te hiti pape, te hauti ra te mau tamarii ma te taraperape i te mau pahi ratere e tere mǎrû noa ˈtura i te pae apatoa. Te puˈa ra te mau vahine i te ahu e te horoi ra i te mau pota i roto i te pape. Te aratai ihora te mau tane i te mau puaatoro pape na te hiti pape. I roto rii atu i te fenua, te rave ra te mau taata faaapu te ohipa ra i roto i te mau faaapu raiti; mea patia rima noa ta vetahi i te mau tumu raiti, area ta te tahi pae ra, te huri ra ïa i te vari ma te tauturuhia e te mau puaatoro pape. Mea taa ê mau â te reira.

Tera râ, na te hiti i te anavai Li, te tia noa ra te mau mouˈa mai te mau farero aore ra te feo te huru. E mea taa ê roa ratou. E nehenehe â e faataa i te huru o te taatoaraa o te mau fenua aihere ta outou e mataitai a haapou noa ˈi te pahi i te anavai mai Guilin e tae atu i Yangshuo, area râ no nia i taua mau mouˈa farero e te huru ê ra, aita ïa e parau no te reira.

E 5 hora no teie tere e 80 kilometera te roa, mai te haamataraa e tapae atu i te hopea, e ite-noa-hia taua mau mouˈa farero ra. E mea piripiri noa to ratou anairaa, e e rahi roa hoi ratou ia atea anaˈe teie mau mouˈa mea marehurehu roa ratou e e manaˈohia e e ere ratou i te mea mau. Te ravea e ore ai e moehia taua fenua huru ê ra, e pata faarahi ïa ratou i te hohoˈa. Ma te feaa ore, hoê hohoˈa e hia ïa tausani parau!

Tera râ, eita te mau hohoˈa e nehenehe e faaite mai i te maere mau o taua mau mouˈa farero otahi ra e tia ra te tahi i muri mai i te tahi e moe noa ˈtu i te mata. Ua afai mai te ihitai o te pahi i te maa mahanahana. Ua haere te taatoaraa e tamaa, toe mai nei hoê i nia i te tahua i nia roa mai i te pahi, no to ˈna faahiahia. E nehenehe ta ˈna e tamaa i te mau taime atoa, area râ, taua mau hohoˈa nehenehe mau no te mata ra, ua fatata ïa i te hope. Ta te mau hohoˈa e ore e faaite mai, na to ˈna ïa feruriraa e faahaamanaˈo mai.

“Ia au i te mau tuatapaparaa i te huru o te repo fenua, te faataa maira te hoê api parau a te ratere, i te haamataraa, tei raro te fenua ra o Guilin i te miti. No te mau otuetue-tamau-raa o te fenua, i mapiha mai ai te mouˈa puˈa e vai ra i te haamataraa i raro i te miti e ua pahee roa te miti i taua vahi ra. Na roto i te ohiparaa a te mau vero e te mau taheraa pape, ua tupu maira no roto mai i taua mouˈa puˈa ra teie mau anairaa farero, te mau tupuai mouˈa otahi, te mau anavai na raro i te fenua e te mau ana. Na teie huru hamaniraa taa ê Karsta faariro i te fenua o Guilin ei fenua maere roa no te ao nei.”

Te faarahi roa ra paha teie pereota hopea i te parau, e tumu râ to te reira. E ore roa teie rahiraa mouˈa farero e tahehia e te anavai Li ra e moe. E ore hoi e nehenehe e haapapu mea nafea to ˈna tupuraa mai, ua papu râ ia tatou e na vai i hamani. Mai te peu e e nehenehe faito ore mau to te anavai Li, eaha ˈtu â ïa te nehenehe o to ratou Poiete! “E rahi Iehova, e ia haamaitai-rahi-hia; oia â ïa, e ore to ˈna rahi e itea ia imi.” — Salamo 145:3.

[Nota i raro i te api]

[Tumu parau tarenihia/Hohoˈa i te api 30]

Te ohipa faahiahia roa ˈˈe

Ua tupu te reira no matou i te hoperaa to matou tere na nia i te anavai Li, i to matou haereraa ˈtu i roto i te hoê fare haapiiraa tamahou no Guilin. Ua hauti e ua ori mai te mau tamarii e maha matahiti; i muri aˈe, ua parahi ratou i raro e ua faaroo atura ratou ma te faahiahia mau i te hoê vahine ratere marite o tei himene mai no nia i te hoê tamahine e ta ˈna “pepe haavare mata ninamu”. Parau mau, aita ratou e taa ra i te mau paraparau, ua riro roa râ to ratou manaˈo i te reo mǎrû e te au o taua himene ohie ra, e te aparaa o te rima o te aamu: ua faaoomohia to ˈna ahu, ua haere o ˈna i rapaeau e hauti, e i te pae hopea, ‘ua faataotohia oia ma te himene i te toparaa mahana’. Ua au roa te mau tamarii e ua itehia te oaoa i nia i to ratou mata. Te ataata ra ratou. E mea parahi noa vetahi, ma te maniania ore e te popou. I to matou revaraa, ua taraperape noa mai ratou ia matou ma te oaoa.

E ua putapû roa to matou mafatu.