“E teie nei, e pohe oe!”

Te tomoraa te hoê taata haru vahine i roto i te fare o te hoê vahine kerisetiano

E PITI na rima hotaratara mau tei haru mai i to ˈu arapoa. Ua oioi aˈera vau i te tatara i to ˈna rima no te tuô.

“A faaea! A faaea i te tuô eita vau e hamani ino ia oe”, ta taua taata ra ïa i parau ma te faarahi atu â i te uumi mai.

Aita râ vau i tiaturi ia ˈna, e aita hoi au i faaroo atu, e ua tamatâ vau i te tuô. Ua paraˈu aˈera vau i to ˈna mata, e inaha, ua marua aˈera to ˈna titia mata e to ˈna niho haavare. E a haˈa noa ˈi oia i te tapea mai ia ˈu ia mau roa vau, ua patia ˈtura vau i to ˈu maiuu rima i roto i to ˈna poro mata. Ua tuô noa vau. E i te taime to ˈna manimani rima e tapea mai ai i to ˈu vaha, ua hohoni aˈera vau ia ˈna ma to ˈu puai atoa.

E tiaturi mai outou aore ra eita, aita roa ˈtu vau i riaria i taua taime ra; i muri iho to ˈu riariaraa. I taua taime ra, ua riri roa vau! Eiaha roa ˈtu ïa taua tuputupua ra e turai mai i to ˈu opani e e haru mai ai ia ˈu, i ô nei aore ra i te tahi atu vahi!

Ua mârô noa râ taua taata ra. Ua rave aˈera oia i te hoê hatua e vai ra i reira, e e rave rahi taime to ˈna taamuraa i to ˈu rima i muri i te tua, inaha i te mau taime atoa e taamu mai ai o ˈna i to ˈu rima, e matara noa na vau. A uumi noa ˈi hoê o to ˈna rima i to ˈu arapoa, ua maimi aˈera oia ma te perehahu i to ˈna titia mata e to ˈna niho i nia i te tahua. E inaha, ua matara taue noa ˈtura vau e ua taora noa ˈtura i te tahi mau tauihaa na roto i te piha ma te tuô rahi, mai te maamaa ra te huru.

Ma te ore e taa faahou, ua faaea rii atura taua taata ra ma te parau e: “Eaha hoi teie?” Horo ê atura vau i taua taime ra. Aita râ i maoro roa, ua noaa-faahou-hia maira vau, e ua aratai aˈera oia ia ˈu i roto i te piha ma te taue ia ˈu i nia i te roi. I muri aˈe to ˈna taamu-faahou-raa mai i to ˈu rima, ua nehenehe aˈera oia e tatara i te tahi tuhaa o to ˈu ahu. E taviriviri noa na vau ma te tue atu ia ˈna ia tuu oia ia ˈu. Mea riri roa na ˈu ta ˈna mau huru paraparau faufau e te ohipa hairiiri mau ta ˈna e hinaaro ra e faahepo mai ia ˈu ia rave!

E i te pae hopea, ua matara aˈera te hatua, e ua turai atura vau i taua taata ra e ua horo ê atura vau i te pae opani mea na reira mai te taata ia tomo mai. Te tatara ra vau i te opani e inaha, ua haru maira oia ia ˈu na muri mai e ua taue aˈera ia ˈu i raro. Ua mau maira ia ˈu te hoê tipi e ua patia ˈtura vau i nia i to ˈna avae. Ua na ô maira taua taata ra ma te hae e: “Ha! mea na reira! I teie nei râ, e pohe ïa oe!” I taua mau parau na ˈna ra, ua haamata aˈera oia i te tupai i to ˈu upoo, e aita ˈtura vau i ite faahou i te haapaoraa.

I muri aˈe, ua na ô aˈera ïa vau, ahiri pai vau i haapao maitai aˈe. Ua tamata noa vau i te ape i te mau fifi e i te mau taata e faahuehue mai ia faarue vau i te fare. Ia haere vau i te tahi vahi e na muri iho â vau i ta ˈu tane Ite no Iehova atoa hoi. Ua tamata noa vau i te ape i te haere na te mau vahi e na reira ˈtu ai te mau taata taparahi taata mai teie te huru, e ua oomo noa hoi vau i te ahu ma te faaieie ore. Aita râ vau i manaˈo e e haere roa mai te hoê taata haru vahine i roto roa i to ˈu fare.

E rave na taua taata ra i te ohipa i nia i te hoê vahi raveraa ohipa i pihai noa ˈtu i ô mâua. Ua faaau mâua e te taata haapao i taua vahi raveraa ohipa ra e e nehenehe ta ˈna e patia mai i te hoê reni uira i ô mâua no te faatere i ta ratou mau matini. I te tahi taime, e haere mai na te hoê taata rave ohipa e tuu faahou i te uira, inaha e pohe na te uira i te tahi taime. E faaauraa ohie roa teie, e ere râ hoi i te mea maitai roa.

Ma te papu maitai, ua manaˈo ê na taua taata ra e haru ia ˈu ma te ore vau e ite atu. Eita e ore e ua manaˈo oia e i te mea hoi e eita ta ˈu e nehenehe faahou e hauti, e vaiiho ïa vau ia ˈna ia rave mai ta ˈna e hinaaro. Parau mau, ua mau roa vau ia ˈna i ouˈa mai i nia ia ˈu, aita râ vau i tuu. Aita vau i feruri noa ˈˈe i te mea ta ˈna e rave mai: ua oioi aˈera vau i te tuô mai te maamaa ra te huru, ma te parau atu ia ˈna, ma te tue e te hohoni atu ia ˈna. Aita ˈtu hoi ravea maitai aˈe; oia mau ua maere to ˈu enemi i ta ˈu huru aroraa ˈtu ia ˈna. I te omuaraa ra iho â, ua mau maitai i roto i to ˈu feruriraa e aita to taua taata ra e mana taatoa i nia ia ˈna e i nia ia ˈu. Ua opua maitai aˈera ïa vau e aro atu ia ˈna, no te mea ua papu maitai ia ˈu e e upootia ˈtu vau i nia ia ˈna.

Ua hoˈi faahou maira to ˈu feruriraa e inaha, tei mua vau i te hoê pereoo e tere noa ra, i te parahiraa. I teie nei, ua taamu-maitai-hia te hatua i nia i to ˈu arapoa, mai te hoê fifi urî, e te tapea noa ra taua taata ra i te reira a faahoro noa ˈi oia i te pereoo. A ite faahou ai au i te haapaoraa, ua ite oioi aˈera vau i te ohipa e tupu ra e mai te uira e anapa ra: te vahi tei reira vau, te tumu vau e tae mai ai i reira. E inaha, ua hoˈi faahou maira to ˈu hae.

Ua huti aˈera vau i nia i te faahororaa, ma te rave i te hoê tutavaraa rahi mau ia nehenehe te pereoo ia faarue i te purumu. Ua papu maitai atura ia ˈu e te hinaaro matamua o taua upoo ino ra te haapohe-roa-raa ïa ia ˈu maori hoi i te haru ia ˈu. E haapohe roa oia ia ˈu ia ore roa ˈtu taua ohipa ra ia itehia. Ua rohirohi roa vau i muri aˈe i te hoê aroraa uˈana mau, teie râ, ua upootia mai vau. No to ˈna rohirohi, ua tapea aˈera taua taata ra i te hiti purumu ma te turai ia ˈu i rapae i te pereoo. Ua tapea maira te hoê pereoo e ua faahoro aˈera ia ˈu i te fare maˈi.

Ua upootia mai au! Aita taua taata ra i haru mai ia ˈu! Ua upootia mai au, aita vau i roaahia ia ˈna! Aita to ˈu haava manaˈo i viivii, e aita atoa hoi au i viivii. Taa ê atu i te reira, ua tapea aˈera ïa vau i to ˈu haapao maitai i mua i te aro o Iehova, te Atua Mana hope!

E ere ïa te auraa e i te mau mahana i muri iho, i te fare maˈi, ua oaoa roa ïa vau e ua faaoru roa vau. Ua aueue mau vau, e e ere roa ˈtu vau i te mea nehenehe ia hiˈo. E i te mea hoi e aita vau i riaria i te taime vau a haruhia ˈi, i teie nei râ te riaria noa nei au. Eita to ˈu feruriraa e faaea i te faahiti ma te faufaa ore, no nia i te ohipa i roohia i nia ia ˈu. I taua atoa area taime ra, ua haere maira te tahi mau mutoi e uiui i to ˈu manaˈo, e ua ite aˈera hoi au e no matara noa maira taua taata hairiiri mau ra mai roto mai i te fare auri e no taua nei â ohipa haru ra e ua tatarahia mai oia a ono hebedoma atura te maororaa.

I to ˈu matararaa mai mai te fare maˈi mai, ua tiâ ia ˈu ia faaruru i te hoê ohipa riaria mau inaha, e tia ia ˈu ia tohu e o vai taua taata ra. Oia hoi, ua horo vau ia ˈna i te mutoi. Ua manaˈo hoi au e e tia mau taua taata ra ia faautuahia; te tauturu ra ïa vau, ia na reira vau, i te tahi atu mau vahine o te nehenehe e haruhia, e ia ˈu atoa iho, ia mana te parau-tia e ei haapapuraa ia ˈu iho e tei ia ˈu te parau i to ˈu iho ora. Ua tohu atura vau i te taata i haru mai ia ˈu, ma te fifi ore i roto i te anairaa taata i manaˈohia e o ratou. O te taata ïa i taamuhia te hohoˈa mata e to roto te rima i te tima!

I te fare maˈi e i to ˈu fare, i roto i te mau hebedoma i muri aˈe i taua ohipa i tupu ra, ua tamahanahana mau te mau rata e rave rahi e te mau farereiraa a to ˈu mau hoa kerisetiano o te mau amuiraa a te mau Ite no Iehova no reira iho, ia ˈu. Te parau ra vetahi o ratou e ua oaoa roa ratou ia ˈu. Aita te tahi pae e taa ra eaha te parau mai, teie râ hoi ia haere mai ratou e farerei ia ˈu e faaite mai na ïa ratou e te anaanatae mau ra ratou ia ˈu. Te parau ra vetahi o ratou e vahine roo rahi roa vau, inaha i te parau mau, eita roa ˈtu hoi. I mua i te hoê ati ta ˈu i ore i ite i te haerea mai, ua faaohipa noa vau i ta te Bibilia i haapii mai ia ˈu, e na te reira i faaora ia ˈu.

I te mea hoi e e vahine vau mai te tahi atu mau vahine, mea hinaaro iho â ïa na ˈu ia tamǎrûhia mai to ˈu manaˈo i muri aˈe. E mau mahana peapea mau ta ˈu i ratere mai. I te hoê tau, aita vau i hinaaro faahou e haere i rapae. Mai te peu e te tahi mau mahana e e hohoˈa mata oaoa to ˈu, e nehenehe ïa ta ta ˈu tane e faaite atu e e ruru noa na vau eita e faaearaa, e eita hoi ta ˈu e nehenehe e haavî ia ˈu iho, a faaitoito noa ˈi to ˈu mafatu e to ˈu feruriraa i te tiahi i taua ohipa riaria mau ra ia nehenehe te reira ia moehia ia ˈu. Te mea i tauturu rahi mai ia ˈu ia ora mai au, eita e ore ia manaˈo vau e maoti te turu a Iehova, ua rave vau mai te tia mau ia ˈu ia rave. I roto i te mau taime oaoa roa ˈˈe, e ite na vau i te tahi mau tumu e oaoa ˈi vau ra. E hia taime to teie nei irava bibilia i te tamǎrûraa ia ˈu:

“Ia momoˈahia te hoê paretenia i te tane, e roohia ihora oia e te hoê taata i roto i te oire, e ua rave ihora ia ˈna; e aratai outou ia raua atoa i rapaeau i te uputa o taua oire ra, a tui ai outou ia raua i te ofai e ia pohe roa raua; taua paretenia ra, no te mea, i roto oia i te oire e aita oia i pii; e taua tane ra, no te mea, ua rave oia i te vahine a tana taeae ra; taa ê atura te ino i roto ia outou ia oe i reira. Ia roohia ˈtu râ te paretenia momoˈahia e te hoê taata i te vahi atea ra, e ua uumi ihora taua taata ra ia ˈna, ua rave iho ia ˈna, o taua tane anaˈe i rave ia ˈna ra te pohe i reira: eiaha râ oe e faautua noa ˈtu i taua vahine ra; aita hoi a taua vahine ra e hara e au ai te pohe: e au hoi te reira i te taata i tia noa i nia e ua rave, ua taparahi noa i tana taeae ra, oia atoa hoi te reira: roohia ˈtu hoi oia e ana i te vahi atea, e ua pii noa hoi taua paretenia i momoˈahia ra, e aore e taata i te faaora ia ˈna.” — Deuteronomi 22:23-27.

Ua oaoa roa vau i te iteraa i taua mau parau rii nei. Ua haapii mai te reira ia ˈu eaha mau râ ta ˈu hopoia i te pae morare, ua haapae roa te reira i te arepurepu e te manaˈo feaa. Maoti taua mau parau nei, vau i ite maitai ai e eaha te tia ia ˈu ia rave. Ua pii vau e ua aro atoa ˈtu hoi au. Ua haapao vau i te mau faaueraa a te Bibilia, e ua nehenehe aˈera hoi au e ite e e mau parau papu iho â te reira. Ua pinepine mâua ta ˈu tane i te pure, e ua itea aˈera ia ˈu i to ˈu puai e to ˈu vai-aifaito-raa.

Eita roa ˈtu vau e hinaaro ia roaahia te hoê vahine i te ohipa haru. Teie râ, te tupu noa nei te ohipa haru i te mau hitu minuti atoa i te fenua Marite, ia au i te parau faaite a te F.B.I. no nia i te ohipa taparahi taata i te fenua Marite. O vau nei, ua tapea vau i to ˈu tiaturiraa ia Iehova, e ua haamanaˈo vau i ta ˈna mau parau, e ua pii au. E hau atu i te reira, ua aro atu vau.

I te tau mau ra, ua haavahia taua taata haru ra i tuuhia ra. E i te 7 no febuare o taua matahiti ra, ua faautuahia oia i te mau utua i muri nei: te tamataraa e taparahi haapohe, te tomoraa ˈtu i roto i to te tahi fare, te tamataraa i te rave i te ohipa haru e te haruraa ia ˈu.

Oia hoi, ia upootia noâ to tatou tiaturiraa itoito i te Atua i nia i te mataˈu i te taata e tia ˈi. Ia faariro na tatou i teie salamo a Davida ta tatou e hinaaro e pee ma te aueue ore, no tatou iho: “E tiaturi au i te Atua, e ore e mǎtaˈu i ta te taata ia rave mai ia ˈu.” — Salamo 56:11. — Na te hoê o to matou mau vahine taio.

[Tumu parau tarenihia i te api 26]

No te aha e tia ˈi ia outou ia aro atu i te taata e haru mai ia outou i te omuaraa ra iho â:

1. E nehenehe taua taata ra e maere roa e e vaiiho mai ia outou.

2. E nehenehe ta outou e haapepe i taua taata ra e e horo ê atu ai.

3. E nehenehe te aroraa ˈtu outou e faaore roa i to ˈna hinaaro uˈana e rave ia outou aore ra e haaparuparu ia ˈna, e e faahoro ê ia ˈna.

4. E nehenehe ta outou aroraa ˈtu e turai i te mau taata e na reira mai i te hahaere, ia haere mai e tauturu ia outou.

5. Eita hoi to outou haava manaˈo e viivii. (Noa ˈtu â ïa e ua nehenehe taua taata ra e taoto ia outou, aita outou i haaviivii i to outou tiamâraa e to outou huru viivii ore i mua i te aro o te Atua.)

6. E nehenehe to outou haapeperaa ˈtu ia ˈna e tauturu i te mutoi ia ite e o vai taua taata ra (ei hiˈoraa te mau huˈa iri i roto i to outou maiuu).