Paruruhia i te haruraa maoti te mea ta ˈna i taio
EAHA ïa te ohipa te tia ia rave i mua i te hoê taata haru vahine? Aita te mau manaˈo e tuea ra no nia i taua tumu parau ra. Te haapapu nei vetahi e e faatupu te mau ohipa patoiraa atoa e ia rahi roa te hinaaro o te taata e haru ra. Area te Bibilia ra, te faaue maira ïa ia faaitoito i te patoi atu (Deuteronomi 22:23-27). Eaha ïa i roto i na aˈoraa e piti i te mea maitai aˈe?
Aita i maoro roa, te horoa maira te hoê tuatapaparaa apî i neneihia i roto i te numera no tenuare o te Vea marite no te oraora-maitai-raa no te taatoaraa i te manaˈo e e faaitoito i te patoiraa. Te parau ra te vea e: “Te tapae ra te mau maimiraa no nia i te mau ohipa i tupu i taua faaotiraa faufaa mau: na te patoiraa e faaiti i te papuraa ia ite i te hoê haruraa e tapae roa i te hopea. Teie te hoê hiˈoraa i tupu i te avae setepa i mairi aˈenei i nia i te hoê vahine Tapone. Ua maoro hoi te po, e te hoˈi ra taua vahine ra i to ˈna fare, i reira oia e ora ˈi o ˈna anaˈe iho. Te faatia ra oia e:
“Ua tomo te hoê taata haru i roto i te fare e ua tamau i te opani. No to ˈu hiti mahuta e te riaria, ua faaea noa ˈtura vau ma te ore e hautiuti. Ua tamata taua taata ra i te huti ia ˈu i roto i te piha, ua tapea râ vau i te hoê pou e ua faaitoito vau i te patoi atu ia ˈna.
“I reira vau i te haamanaˈoraa i te irava o te Deuteronomi, i te pene 22, o te parau ra e ia ore te hoê vahine e tuô ia haruhia o ˈna, te faaite ra oia e te auraro ra i taua taata hamani ino ra e ua hara ïa i mua i te Atua ra o Iehova. Ua haamanaˈo atoa vau i te tumu parau ta ˈu i taio i roto i te A ara mai na! tei piihia ‘Te haruraa vahine — Nafea ia paruru i te reira?’. — 8 no atopa 1980.
“Ua manaˈo ihora vau e: ‘E tia ia ˈu ia tuô e ia faaitoito i te patoi atu ia ˈna ma to ˈu puai atoa.’ Ua haamata ihora vau i te tuô ma te tuutuu ore: ‘A tauturu mai ia ˈu, e Iehova!’ A huti ai te taata haru i to ˈu rima i te hoê pae, ua huti vau i te tahi aˈe pae; i to ˈna hutiraa ia ˈu i mua, ua faateiaha vau ia ˈu i muri; i to ˈna tapiriraa i to ˈna rima i nia i to ˈu vaha ia ore vau e tuô, ua hohoni vau ia ˈna. Mea na reira to ˈu tamau-noa-raa i te faaitoito i te patoi ia ˈna na roto i te mau ravea atoa.
“I muri aˈe, ua ite atura vau e te iti noa ra to ˈu puai. Te fifi noa ˈtura to ˈu hutiraa i te aho e e au ra e mau to ˈu mafatu, tera râ ua tamau noa ra vau i te aro mai ta ˈu e nehenehe e i te tuô ia Iehova ia tauturu mai ia ˈu. I te pae hopea, ua vaiiho te taata haru ia ˈu. Ua haere oioi atura i te opani ra e ua horo i rapae.
“Te manaˈo nei au e, ahiri aita vau i hamani-ino-hia, auaa te tauturu a Iehova e te faaohiparaa i te tumu parau ta ˈu i taio i roto i te A ara mai na!. Mai te peu e aita vau i taio i taua tumu parau ra, e manaˈo vau e, no to ˈu riaria, ua faaea noa vau ma te ore e patoi e e auraro ïa vau i te taata e hinaaro ra e hamani ino ia ˈu. Mauruuru roa.”