Te mau maitai no te haereraa na raro

“E mea au-roa-hia e te mau taata (...) te haereraa na raro no te mea ua ite-faahou-hia mai te mau maitai (...) o ta ˈna e horoa ra no te tino.” Ua iritihia teie nei mau parau i roto i te vea nainai Te haereraa na raro: faaetaetaraa tino e e mea au hoi neneihia e te Taatiraa taaro e no te oraora-maitai-raa o te tino, faanahoraa no ǒ mai i te peretiteni Marite.

I roto i teie nei faaiteraa ua apiti-atoa-hia te hoê tabula faahiahia no te mau maitai no te pae tino nei e faufaahia ia haere anaˈe tatou na raro. Teie vetahi mau maitai: te haere-maitai-raa te aho ora i roto i te tino nei i te taime ohiparaa, te itiraa te otuituiraa mafatu ia faaea anaˈe tatou, te itiraa te puai o te toto i roto i te uaua e te tere-maitai-raa te mafatu e te mahaha. E e ere râ i te nevanevaraa e te haere marû-noa-raa ia au i te mau faataaraa a te vea nainai, ia haere râ “ma te vitiviti e ia tupaipai te mafatu e ia huti hohonu tatou i te aho”.

E tapao tatou ma te maere e pau fatata hoê â rahiraa calories (faito no te rahiraa o te mahanahana) i te haere-vitiviti-raa i te hororaa. Ua tamatahia te reira i nia e 24 taurearea haapii: ua tanumerahia te rahiraa ito e pau i te haereraa na raro, i te hororaa e aore ra i te horo-puai-raa. Ua itehia “i te roaraa e 1600 metera i te atea e ia horo i roto i te roaraa e 8 minuti e 30 tetoni e pau noa ïa e 26 calories e hau atu mai te mea e haere vitiviti noa i roto i te roaraa e 12 minuti”. Hau atu, e pau 78 calories i te kilometera hoê ia haere anaˈe na raro e 8 kilometera i te hora, e pau noa râ 25 calories hau atu i te kilometera hoê ia horo e 15 kilometera i te hora.

E maitai hau atu â i te haereraa na raro. Teie ïa: aita e haamauˈaraa no te hoo mai i te tauihaa (maoti râ i te tiaa maitai), aita e faaineineraa, e mea varavara e pepehia tatou. E farii atoa outou i te parau a teie nei vea nainai e: “Te haereraa na raro: e mea taere roa, e mea papu roa râ no te vai-maitai-raa o te tino nei.”