‘Ua faarue ta ˈu vahine i ta ˈna ohipa’

A ara mai na!: Mea rave noa iho â ta oe vahine i te ohipa?

Claude: Ua rave o ˈna i te ohipa fatata hoê matahiti i muri aˈe i to mauâ faaipoiporaa; i muri iho, ua faaea o ˈna no te mea ua hapu oia.

A ara mai na!: Ua rave faahou anei oia i te ohipa i muri aˈe i te fanauraa o te aiû?

Claude: Mea huru ê roa! I muri aˈe i to ˈna faaearaa i te rave i te ohipa, to ˈu ïa iteraa e aita matou e erehia ra i te moni ta ˈna e noaa ra.

Jeanne (ma te atata): Aita iho â ra o Claude e rave ra i te hoê noa ˈˈe tuhaa o ta ˈu moni! Ua matau noa vau i te hoo mai i te tiaa, te aahu, e te tahi atu â mau mea; eita o ˈna e tauˈa mai. E hiˈo iho â ïa vau e ua aufauhia anei ta matou tarahu. Mai te peu e e hinaaro vau e piti aore ra e toru aahu, e hoo noa vau, mai ta ˈu e hinaaro.

A ara mai na!: E rave anei oe faarahi te hora hau?

Claude: Te haamanaˈo ra vau hoê taime to ˈu hinaaroraa i te moni no te tatai i to ˈu pereoo. Ua rave ïa vau i te hora hau. Mea fifi roa ta ˈu mau hora ohiparaa e ua noaa ia ˈu te moni hau. Tera râ, i roto e ono avae, aita hoê aˈe pene ta ˈu i haaputu.

A ara mai na!: Eaha ra tei tupu?

Jeanne: Mai te mea ra e ia rahi anaˈe ta ˈna moni te noaa, e rahi atoa ïa ta matou haamauˈaraa.

Claude: E moe noa te moni “mai tera te huru”. Taa ê atu i te reira, e rave te reira mau hora hau i te taime i nia i ta ˈu mau putuputuraa kerisetiano. I muri aˈe, e ono avae te maoro, ua faaea vau i te rave faahou i te hora hau, e e piti avae i muri iho, ua haaputu vau i te moni e ua navai no te tatai i to ˈu pereoo.

A ara mai na!: E jeanne, aita anei oe i rave faahou i te hoê ohipa?

Jeanne: Oia. I teie tau veavea i mairi aˈenei, ua hinaaro vau i te moni e ua opua vau e rave i te ohipa e ua noaa ta ˈu ohipa i roto i te hoê fare haapaoraa tamarii. E toru avae noa râ to ˈu raveraa i te ohipa, no te mea ua ite au i te hoê tauiraa i nia i te huru o ta ˈu tamahine e ono matahiti. E rave o Claude i te ohipa i te po e na ˈna e haapao ia ˈna i te ao. I te hoê râ ahiahi, ua maorohia vau i ta ˈu ohipa.

Claude: Ua vareahia vau i te taoto e, i to ˈu araraa mai, aita ta ˈu tamahine faahou. Ua tuo noa vau ia ˈna. Aita e pahono mai. Ua hiˈo vau na te mau vahi atoa, na te haamaramarama, na muri mai i te mau opani, na roto i te aroa o te fare, na raro aˈe i te roˈi. Aue au te riaria e! I muri iho ua haere mai oia i rapae mai roto mai i te afata vairaa tauihaa ma te ataata. Ua mataˈu roa vau aita ˈtura ta ˈu e nehenehe e aˈo ia ˈna!

Jeanne: Ua faatia mai o Claude ia ˈu i te ohipa i tupu. I muri iho to ˈu feruriraa i te huru o ta ˈu tamahine iti i te pee-noa-raa na muri iho ia ˈu. Taa ihora ia ˈu e ua hinaaro oia e ia haapao vau ia ˈna e i reira to ˈu iteraa e mea faufaa aˈe ta ˈu tamahine i ta ˈu ohipa. Te pau noa râ hoi ta ˈu moni e noaa mai i nia i te tute, te cantine e te aahu. Faarue ihora vau ta ˈu ohipa.

A ara mai na!: I te pae no te moni, aita anei outou i erehia e te tahi mea?

Jeanne: Ua haapao maitai noa mai iho â Iehova ia matou. E ua manaˈo mauâ e ua faataa o ˈna e na te mau metua iho â e haapao i ta ratou iho mau tamarii. Ua taa ia mauâ e e hinaaro iho â ta mauâ tamahine iti ia mauâ. E e tia iho â ia faaea vau i pihai iho ia ˈna. E o te mea faahiahia roa aˈe ïa na matou i ta ˈu ohipa.

Claude: E ere iho â i te mea faufaa mau no matou teie moni hau. E oaoa noa matou i te mea e vai ra ia matou ra. E ere matou te feia moni. E ere atoa râ matou te feia veve. Te vai ra to ˈu mau hoa o te rave ra i te ohipa i te tahi taime e hitu mahana i te hebedoma. Ua tamata vau. Eita e haere ia ˈu.

Jeanne: Ua ite au e mea fifi mau â te oraraa i teie nei, te tiaturi papu nei râ matou i te parau tǎpǔ a te Bibilia i roto i te Mataio 6:33 oia hoi, ia imi anaˈe tatou i te Basileia na mua roa, e tauturu mai iho â te Atua ia tatou.

A ara mai na!: E i teie nei, e nafea oe i to oe taime?

Jeanne: A toru avae i teie nei, te horoa nei au e 60 hora i te avae no te haapii i te taata i te Bibilia. Ua oaoa roa vau!

A ara mai na!: Te manaˈo ra ïa oe e e tia i te mau metua vahine ia faaea i te fare?

Jeanne: E, mai te peu e e nehenehe. Eita te mama ruau e riro ei mono i te metua vahine iho.