“Aita roa e taata aroha ê atu i te reira”

E ITE A IEHOVA o François. Te noho nei oia i Paris e ua matau maitai oia i teie mau parau a Iesu Mesia: “Teie ta ˈu parau, Ia aroha outou ia outou iho, mai ia ˈu e aroha ˈtu ia outou na. Ia horoa te taata i to ˈna iho ora no to ˈna ra mau taua, aita roa e taata aroha ê atu i tei reira.” (Ioane 15:12, 13). I to ˈna ra araraa i te poipoi 22 no setepa i mairi aˈenei, aita roa o François i manaˈo noa ˈˈe e hou a oti ai te reira mahana e riro mau â teie nei mau parau a Iesu ei auraa taa ê no ˈna.

Mai te matauhia e ana i te reira po, ua haere atu i te putuputuraa a te mau Ite a Iehova no te amuiraa i Paris-Centre, e te haamata i te hora 5 h 30. A 25 matahiti to teie nei amuiraa haaputuputu-noa-raa i roto i te hoê piha tarahuhia i te toru o te tahua o te hoê fare teitei tahito e mau piha ohiparaa anaˈe to reira. E vahi haviti mau te vairaa o teie nei fare no te mea tei mua oia i te aroa tuiroo o te Opéra, e ere i te mea atea roa i te vahi vairaa tauihaa tahito o te Louvre.

No te mea e haaparahi oia i te mau taata, tei pihai iho ïa o François i te opani, ineine no te farii i te mau taata e tae mai nei i muri aˈe i te hora. Tei te afaraa te taata orero i ta ˈna oreroraa parau bibilia, a hauˈa ai o François i te hauˈa paapaa. I muri iho ite atura oia i te hoê auauahi iti haihai na raro mai i te opani. Tatara atura i te opani e te ite atura oia i to ˈna nau avae, te hoê vairaa ahu matie mai reira mai te auauahi te haereraa i rapae.

Haru aˈera i te vairaa ahu, horo oioi mai atura o François i te eˈa no na tahua e toru ra, teie râ i raro ua hee atura e topa ihora te vairaa ahu e matara maira te hoê farii plastique tarona î i te gazoline. Tapiri oioi ihora o François i te vairaa ahu î i te auauahi, e te amoraa i te reira, haere atura i rapae i te reira fare. Ua fatata oia i te pirihia e te hoê pereoo uira na roto i to ˈna hororaa mai i te tahi aˈe pae o te purumu. E i muri aˈe i to ˈna taoraraa i te vairaa ahu i roto i te hoê vairaa pape e vai ra i ropu i te reira vahi, hoˈi oioi atura i muri e tii i te farii gazoline ma te manaˈo e ere atoa anei râ i te hoê paura topita. Horo faahou aˈera i pihai iho i teie nei apoo pape no te taora atu i roto.

I taua taime râ, ua haere e piti na tia o te amuiraa e hiˈo eaha ra teie ohipa e tupu ra, e haere atura e farerei ia François i pihai iho i te apoo pape. I te mea hoi e te mai noa maira te auauahi mai roto mai i te vairaa ahu, ua opua ihora te hoê o te mau matahiapo ia taniuniu i te mutoi. Tau metera noa to ratou atearaa paaina ˈi te tupita. Ua paparari te mau haamaramarama hiˈo pae purumu, e ua pepe rii noa i te mau huˈahuˈa hiˈo tau mau taata e haere ra na reira. Ua rari roa o François tae noa ˈtu o na kerisetiano toopiti i te pape e te vari no roto mai i teie apoo pape, teie râ aita ratou i pepe noa ˈˈe. Ua paruru mau te tahua tima o teie nei apoo pape ia ratou.

I roto i te Piha o te Basileia, i te toru o te tahua, ua huˈahuˈa atoa te mau hiˈo haamaramarama pae purumu e ua pee te tahi mau taata i raro na roto i te paainaraa. Teie râ aita roa hoê i pepe noa ˈˈe. Ua tapeahia te mau huˈahuˈa hiˈo e te mau paruru meumeu o te mau haamaramarama.

Te faaitoito nei te taata orero parau ia faaea hau noa te feia. Ua faatupuhia te hoê pure uˈana ia Iehova no te haamauruururaa ia ˈna no to ˈna paruru, e i muri aˈe ua tamau noa te putuputuraa. Aita i maoro roa, ua tae mai te mutoi e te feia tupohe auahi i reira. Teie râ, ua tiai ratou ia hope roa te putuputuraa no te haamataraa i ta ratou titorotororaa e te tataratararaa i te mau huˈahuˈa hiˈo i roto i te piha.

Ua haapopou te mau mutoi i te mau Ite no to ratou mataˈu ore e o François iho â râ no to ˈna itoito rahi. Ua farii ratou pauroa e ua ora mai te feia i roto i teie nei piha auaa to ˈna ara maite e to ˈna vitiviti i te ohiparaa. Ahiri te paura i paaina i roto i te mau eˈa hamani-raau-hia e vai ra i mua i te opani e a ura ˈi teie farii gazoline, e mau atu ïa te mau Ite i roto i teie nei piha ma te ore e nehenehe e horo i rapae.

Ua paraparau-rahi-hia no teie nei totoaraa i roto i te mau vea farani. Teie te upoo parau a te hoê vea no Helevetia: “Te hoê mataˈu ore maere mau”. Na roto i te aniraa a François, ua paruru te mau mutoi ia ˈna i te feia no te pae o te tele e te feia papai vea atoa o te hinaaro nei e faarahi ia ˈna. I to ˈna uiraahia, ua pahono mai oia ma te haehaa e: “Ua ite au e fifihia to matou ora. Ua manaˈo aˈera vau e mea maitai aˈe ia pohe o vau anaˈe, eiaha râ te taatoaraa.”

Ua parau atu te hoê mutoi ia ˈna e: “E semeio mau â, a vai ora noa mai ai oe. E mea papu ua paruru to oe Atua ia oe. E Ite a Iehova mau â oe.”

I te taime a papai ai matou i teie nei tumu parau, te maimi noa nei â te mutoi i te mau taata na ratou teie totoaraa.