‘Ua haere ta ˈu vahine e rave i te ohipa’

A ara mai na!: Eaha ta oe ohipa e Jean?

Jean: E rave au i te ohipa i roto i te mau piha ohiparaa no te hoê fare hamaniraa tauihaa.

A ara mai na!: E o oe, e Carole?

Carole: E turu utaa vau no te taata paari.

A ara mai na!: No te aha oe i haere ai e rave i te ohipa?

Carole: No te maraaraa ïa te hoo. Te moni fare e te moni maa te maraa noa ˈtura ïa i nia e eita e navai faahou te moni no te avae.

Jean: Na ǒ nei, e hinaaro ïa te hoê utuafare 181 800 e tae atu i te 218 160 farane i te avae faito iti roa ïa no te oraraa. To matou moni fare ua hau atu ïa i te 65 500 farane. No te maa, e haamauˈa matou fatata 10 910 farane i te hebedoma. E te vai ra te pereoo, te aahu, te tahi atu â mau mea.

A ara mai na!: Ua rave oioi anei o Carole i te ohipa?

Jean: Aita, aita i rave oioi. Ua tamata vau i te rave i te hora hau. I te tahi taime, e rave au 10 aore ra 11 hora i te mahana e e 5 aore ra 6 hora i te mahana maa.

Carole: E mea fifi mau no mauâ. Aita to mauâ taime faahou no mauâ iho. E aita iho â e navai ta mauâ moni.

Jean: Ua ite au e eita ta ˈu e nehenehe e tamau noa haamaoro atu â mai te reira te huru. Oia mau, ua haamata vau i te haapii i te Bibilia e te mau Ite a Iehova. A haere noa ˈi au i mua i ta ˈu haapiiraa, ua ite ihora vau e e rave rahi roa te ohipa i to ˈu taime. E tia roa ia ˈu ia horoa i te taime no te mau ohipa i te pae varua, mai te putuputuraa kerisetiano. Ua opua ihora vau eiaha e rave faahou i te hora hau. Tera râ, ua tiai mauâ ia rahi rii mai ta mauâ tamahine. Ia haere anaˈe oia i te haapiiraa tama hou, e hinaaro ïa vau ia faaea o Carole i te fare. I to ˈna râ haereraa i te haapiiraa tua rua, rave ihora ïa o Carole i te ohipa afa mahana i roto i te mau fare toa rarahi. I muri iho, ua opua mauâ e mea maitai aˈe ia noaa ta ˈna ohipa no te mahana taatoa.

A ara mai na!: E mea teimaha anei no oe ia haere e rave i te ohipa e Carole?

Carole: Eita. Ua ite mau ra vau e mea rohirohi mau no Jean e ua oaoa roa vau i te tauturu ia ˈna.

A ara mai na!: No te mea te rave nei oe i te ohipa eaha ïa te huru no to orua taairaa?

Carole: I teie nei, aita o Jean e rave faahou i te hora hau, e taime rahi roa ïa to mauâ no te haapao i te tahi e te tahi.

Jean: No te mea e te rave nei o Carole i te ohipa ua afaro roa ïa te mau mea atoa, no te mea e tauturu rahi roa te reira ia mauâ i te pae no te moni. Te haapao maitai nei ra mauâ eiaha mauâ ia haapae te tahi e te tahi.

Carole: Mea au roa na mauâ ia parahirahi mauâ no te aparauraa i tera e tera mea e ia haere e hoo haere mauâ atoa. E faanaho mauâ i to matou mahana faafaaearaa i te hopea hebedoma ia nehenehe mauâ toopiti atoa ra ia haere i te pororaa. Te mea au-roa-hia ïa e mauâ.

Jean: E, o te mau taime faahiahia roa teie na mauâ no te faaearaa te tahi i pihai iho i te tahi.

A ara mai na!: E te mau ohipa utuafare ïa?

Carole: E opere matou i ta matou ohipa. E rave te taata taitahi i ta ˈna iho hopoia. E tunu vau i te maa e auaˈa pai e, e ere o Jean te mea ohipa rahi no te pae o te maa. Ia rohirohi anaˈe au e ia hamani noa vau i te salade anaˈe, e oaoa noa o ˈna.Na ta mauâ tamahine ra e horoi ïa i te mau auˈa repo e purumu o Jean i te fare e e faaanaana atoa oia i te tahua.

A ara mai na!: E ere anei i te mea fifi i muri aˈe i te taime ohiparaa?

Jean: Oia! I te rahiraa ra o te taime e nehenehe. Ua ite ra vau e, ahiri o Carole e tei te fare i te mahana taatoa, eita ïa vau e rave i te rahiraa o taua mau ohipa utuafare ra.

A ara mai na!: Ia manaˈo orua e mea maitai anei ia rave te tane e te vahine i te ohipa toopiti atoa ra?

Jean: Eita, mai te peu e e nehenehe ta raua e faanavai. E ere i te mea maitai na te na taata faaipoipo ia tiaturi rahi roa i nia i te moni avae a te vahine. Eaha ïa te tupu mai te peu e e faaea o ˈna i te ohipa? Te tahi, e nehenehe te mau fifi hau e faateimaha roa ˈtu i te na taata faaipoipo apî. No reira, te tiaturi nei mauâ e ia tae i te hoê mahana e nehenehe ta mauâ e taui i te huru o to mauâ oraraa nei e ia rave mauâ toopiti atoa ra i te ohipa i te afa mahana. E nehenehe ïa ta mauâ e haere tau hora i te mau mahana atoa i roto i te taviniraa kerisetiano.