Teie ta ˈu fa: Ia auraro noa ia Iehova

I 1906, ua haapii to ˈu na papa e mama ruau i te mau parau fafau a te Faatereraa arii a Iehova i muri noa aˈe i te poheraa ta raua tamaiti i te hoê maˈi pee i roto i te arapoa. E mero o te Feia haapii Bibilia ta raua taote, piihia i teie nei Ite no Iehova. Ua faaite o ˈna ia raua te hoê tiaturiraa mahanahana mau i roto i te Bibilia mai te tia-faahou-raa. Mea na reira to ˈu papa e mama ruau, to ˈu mama e te tuahine o to ˈu mama i riro ai ei Feia haapii Bibilia.

Ua tavini to ˈu fetii ia Iehova ma te itoito e rave rahi matahiti. A patahia ˈi te “Hohoˈa-Darama o te Poieteraa” i Chicago, Illinois i Marite, na te mau vahine ïa i aratai i te mau taata i to ratou parahiraa. Tera râ, o to ˈu noa mama tei tamau i te tavini ia Iehova. E ere i te mea ohie no ˈna, mea piri roa hoi o ˈna i te utuafare fetii e ua haamori amui ratou tae roa mai i te mau matahiti 1930. Ua putapû roa râ vau i te hiˈoraa taiva ore e te auraro o to ˈu mama ia Iehova e te hiˈoraa atoa o to ˈu papa tei tavini ia Iehova ma te taiva ore.

Ua fanauhia vau i 1927, o vau te matahiapo e e ono matou. Mea here roa na matou ia Iehova. E tamuta to ˈu papa e ua noho matou i roto i te hoê fare au mau i rapaeau i te oire no Chicago. E faaapu rahi ta matou e ua faaamu atoa matou i te moa e te moora.

Mea au roa na ˈu e rave i te ohipa mai te tafairaa i te totini o te utuafare. Eita teie ohipa e rave-faahou-hia i teie mahana. I to matou râ tau, eita te totini e faaruehia ia mutumutu. E ravehia râ te nira e te taura no te tafai atu. Ua tauturu te reira ia ˈu i roto i to ˈu oraraa no te mea i muri iho ua rave au i te ohipa nira ahu.

Te hiˈoraa maitai o to ˈu nau metua

Ua haapao maite to ˈu papa ia maitai noa matou i te pae varua. Ua haere matou i te mau putuputuraa atoa e ua tamau i te poro e i te hiˈopoa i te hoê irava Bibilia i te mahana tataitahi. I te mahana maa i te po, te vai ra ta matou haapiiraa Bibilia utuafare maoti Te Pare Tiairaa.

No te poro atu i te feia tapiri, ua tuu to ˈu papa i te hoê iri papai i te haamaramarama o te piha faafaaearaa. Na to matou mau taeae i hamani i te reira. I nia iho, ua faaitehia te tumu parau o te oreroraa parau aore ra hoê o ta matou mau buka. A purapura ˈi te mori i nia i tera iri papai, e ite mai te taata i te poroi. Ua tamaumau atoa to ˈu papa e piti parau faaiteiteraa i muri mai i to matou pereoo.

Na roto i ta ˈna parau e ohipa, ua haapii to ˈu papa ia matou te faufaaraa ia auraro ia Iehova. Ua turu to ˈu mama ia ˈna i roto i te mau tupuraa atoa. E pae noa matahiti to to ˈu tuahine apî aˈe a haamata ai to ˈu mama i te tavini ia Iehova ei pionie. E ua tamau noa o ˈna i teie taviniraa tae roa ˈtu i te hopea. Auê ïa metua faahiahia mau!

Mea taa ê roa te oraraa i na mua aˈe. Aita ta matou e afata teata, e parahi ïa vau e to ˈu mau taeae e tuahine i nia i te tahua no te faaroo i te radio o te haapuroro i te mau aamu anaanatae mau. Tera râ, te mea ta matou i au roa ˈˈe o te mau porotarama ta te faanahonahoraa a Iehova i haapuroro na roto i te radio.

Tairururaa, matini faataˈi pehe e api parau faaiteiteraa

Mea au roa na matou e haere i te mau tairururaa a te mau Ite no Iehova. I te tairururaa i 1935, ua taa ia matou eaha mau na te tiaturiraa o te “nahoa rahi” o te na roto mai i “te ati rahi” faahitihia i roto i te Apokalupo 7:9, 14. O te oraraa ïa e a muri noa ˈtu i roto i te paradaiso i nia i te fenua nei. Hou 1935, ua rave to ˈu mau metua i te pane e te uaina i te Oroa haamanaˈoraa. I muri aˈe râ i teie tairururaa, o to ˈu noa ïa papa tei rave. Ua papu i to ˈu mama e eita o ˈna e faatere e te Mesia i nia i te raˈi, e ora râ o ˈna e a muri noa ˈtu i nia i te fenua nei.

I 1941, i te tairururaa i Saint Louis, Missouri, ua faaite Joseph Rutherford te neneiraa o te buka Tamarii (Beretane). Mea puai te mau haapopouraa! Ua bapetizohia vau hoê matahiti na mua aˈe, 14 ïa matahiti to ˈu i tera taime. Te haamanaˈo maitai ra vau i te haereraa i mua na muri iho i te tahi atu mau tamarii no te rave i ta ˈu iho buka.

I tera ra tau, mea taa ê mau te pororaa. I 1930, ua taˈitaˈi matou i te mau matini faataˈi pehe ia faaroo te taata i te mau oreroraa parau Bibilia haruharuhia. Hou a patoto ai i te uputa, e tatara matou i te vairaa matini faataˈi pehe e e tuu i te nira i te hiti o te pehe. Ia haere mai te fatu fare i rapae, e faaite ïa matou i te hoê haruharuraa poto e maha minuti i te afa o te hoê tumu parau e i muri iho e pûpû matou i te vea. Mea faaroo roa te taata ma te faatura e te haamanaˈo ra vau aita hoê aˈe i patoi mai. A haamata ˈi au i te taviniraa pionie i te 16raa o to ˈu matahiti, ua horoa mai to ˈu papa i ta ˈu iho matini faataˈi pehe e ua oaoa roa vau i te faaohipa i te reira i roto i te pororaa. Ua tavini au ei pionie e te hoê tuahine pionie maitai roa, o Lorraine to ˈna iˈoa.

Te vai atu â te tahi ravea pororaa, te taahiraa e te poroi papaihia. E porote matou na te mau aroâ ma te amo e piti poroi i nia iho ia matou, hoê i mua e hoê i nia i te tua. Teie ïa te mau poroi “E marei e e ohipa taviri te haapaoraa” e “A tavini i te Atua e te Mesia te Arii.”

Ua faaineine te mau putuputuraa ia matou ia faaruru i te patoiraa e ua haapii atoa eaha te parau no te paturu i te parau mau. Tera iho â tei tupu i muri iho. Ei hiˈoraa, i te taime matamua a pûpû ai matou i te mau vea i te hoê tapihooraa mea rahi te taata, ua haruhia e ua afaihia matou i te aua mutoi. Ua tuuhia matou tau hora i muri iho, oaoa i te hamani-ino-hia no te auraroraa ia Iehova.

Faaipoiporaa, Haapiiraa Gileada e te tau faehau

I te hoê mahana, ua haafarerei Lorraine ia ˈu i te hoê taeae o Eugene Rosam te iˈoa. Ua matau raua i te hoê tairururaa i Minneapolis, Minnesota. Ua paari Eugene i Key West, Floride. I te fare haapiiraa tuarua, ua tiavaruhia o ˈna no te mea aita o ˈna i hinaaro e apiti atu i te hoê oroa here aiˈa. Mea na reira o ˈna i te haamataraa i te tavini ei pionie. I te hoê mahana, ua farerei oia i te hoê tamahine hoê â ta raua piha haapiiraa na mua aˈe. Ua hinaaro o ˈna e ite no te aha Eugene i tuuhia i rapae, e piahi maitai roa hoi o ˈna. Ua faaohipa Eugene i te Bibilia no te pahono atu e i muri iho ua farii teie tamahine i te hoê haapiiraa Bibilia. Ua farii o ˈna i te parau mau e ua riro mai ei tuahine taiva ore.

Ua faaipoipo mâua Eugene i 1948. Ua haamata mâua i te tavini ei pionie i Key West. I muri mai, ua titau-manihini-hia mâua i te 18raa o te piha haapiiraa no Gileada e ua fanaˈo i ta mâua parau tuite i 1952. Ua haapiihia matou i te reo Paniora, e ua manaˈo mâua e e tonohia mâua i te hoê fenua reo Paniora. Aita râ i tupu mai ta mâua i manaˈo. Tei Gileada noa â mâua a uˈana ˈi te tamaˈi i Korea e ua titauhia Eugene ia faaô i roto i te nuu. Ua maere mau mâua i te mea e a tupu ai te piti o te Tamaˈi rahi, aita o ˈna i titauhia ia haere i te tamaˈi no te mea e pionie o ˈna. Ua anihia ïa ia mâua ia faaea i Marite. Ua peapea e ua ta ˈi au. Piti matahiti i muri iho, ua faatiamâhia o ˈna i tera titauraa. Teie ïa te haapiiraa faufaa mau ta mâua i huti mai: Aita anaˈe te hoê tupuraa e manuïa e nehenehe Iehova e horoa mai i te tahi atu ravea. Titau-noa-hia ia faaoromai.

Te taviniraa haaati e te haereraa i Kanada!

I 1953, i muri aˈe i te taviniraa ei pionie i roto i te hoê amuiraa reo Paniora i Tucson, Arizona, ua tonohia mâua i roto i te taviniraa haaati. Ua tavini mâua i roto i te tuhaa haaati i Ohio, Kalifonia e i New York. I 1958, ua haamata mâua i te taviniraa i roto i te tuhaa mataeinaaa i Kalifonia e Oregon. Ua noho mâua i ǒ te mau taeae e tuahine. I muri mai, i 1960, ua reva mâua i Kanada e ua tavini Eugene ei orometua haapii no te Haapiiraa no te taviniraa i te Basileia no te mau tiaau amuiraa. Ua faaea mâua i Kanada tae roa i 1988.

Hoê tupuraa faahiahia mau ta ˈu i tapea a ora ˈi i Kanada, no nia ïa i te hoê utuafare ta ˈu e te hoê tuahine i farerei i tera e tera fare. Ua aparau na mua mâua ia Gail te metua vahine e ua faatia mai o ˈna e ua inoino roa ta ˈna mau tamaiti no te mea ua pohe to ratou papa ruau. Ua ani ratou i to ratou mama, “No te aha o ˈna i pohe ai?” “Teihea roa o ˈna?” Aita râ ta Gail e pahonoraa. Ua horoa ïa mâua i te pahonoraa a te Bibilia ma te faaite atu i te mau irava mahanahana mau.

I tera taime, e tiaau haaati Eugene e e faaea noa mâua i roto i teie amuiraa hoê noa hebedoma. Na te tuahine tei haere mai na muri ia ˈu i ho ˈi e farerei ia Gail. Eaha tei tupu? Ua farii Gail i te parau mau, o Bill atoa ta ˈna tane e ta raua na toru tamaiti o Christopher, Steve e Patrick. E matahiapo o Chris i Kanada. E orometua haapii o Steve i Palm Coast, Floride, i reira e faatupuhia ˈi te mau Haapiiraa Bibilia. E e mero o te tomite amaa o Patrick i Thaïlande. I te roaraa o te mau matahiti, ua vai piri noa mâua Eugene e teie utuafare fetii. Ua oaoa roa vau i te horoaraa maa tuhaa iti no te tauturu ia ratou ia ite o vai o Iehova!

Te farereiraa i te taote e te faanahoraa i te mau Tomite tuatiraa e te fare maˈi

A ora noa ai i Kanada, ua horoa Iehova ia Eugene te hoê hopoia apî, te anaanatae e te faahiahia mau. E faatia atu vau.

E rave rahi matahiti i teie nei, mea rahi te taata tei ore i taa i to tatou tiaraa no nia i te pâmuraa toto e mea rahi tei faaino mai. Ati aˈe ia Kanada, i parau na te mau vea e e haapohe te mau Ite no Iehova i ta ratou tamarii no te mea e patoi to ratou mau metua i te pâmuraa toto. Na ta ˈu tane ïa te hopoia taa ê e tauturu i te faaite e e parau haavare te reira.

Na mua noa aˈe i te tairururaa nunaa rau i 1969 i Buffalo, New York, ua haere Eugene e e rave rahi atu â mau taeae i te mau fare maˈi rarahi i taua vahi ra no te faataa e fatata e 50 000 Ite no Iehova no Kanada e no Marite te tae mai i te tairururaa. Ia tupu noa ˈtu te tahi ati i tera tairururaa, e taa ïa i te mau taote eaha mau to tatou tiaraa i te pae o te toto. Ua horoa te mau taeae i te mau taote te mau api parau no nia i te mau rapaauraa ma te ore e faaohipa i te toto no roto mai i te mau papai ta ratou e faaohipa ra. Aita te mau taote i patoi, ua turai te reira ia Eugene e te tahi atu mau taeae ia tamau noa i te haere e farerei i te mau taote i te mau fare maˈi i Kanada. Ua tauturu atoa ratou i te mau matahiapo ia ite eaha te rave ia tupu te mau tupuraa ru.

Ua hoona tera mau tutavaraa atoa. Inaha, e omuaraa te reira no te tahi faanahoraa ta matou i ore i manaˈo aˈenei! Eaha te reira?

I ropu i te mau matahiti 1980, ua taniuniu mai Milton Henschel ia Eugene no te pu rahi mai i Brooklyn, New York. Ua faataa o ˈna ia Eugene e te vai ra te hoê faanahoraa i Marite o te horoa i te mau haamaramaramaraa i te taote i nia i to tatou tiaraa i te pae o te toto e ua faaite mai o ˈna e te hinaaro ra te Tino aratai e haaparare i teie faanahoraa i roto i te tahi atu fenua. Ua haere ïa mâua Eugene i Brooklyn e i Tenuare 1988 ua haamau te Tino aratai i te Tuhaa haamaramaramaraa i te pae rapaauraa. I muri iho, ua maitihia ta ˈu tane e e piti atu â taeae no te aratai i tera mau haapiiraa na mua roa i Marite e i muri iho i te tahi atu mau fenua. Aita i maoro, ua haamauhia te Tuhaa haamaramaramaraa i te pae rapaauraa i roto i te mau amaa e te mau Tomite tuatiraa e te fare maˈi i roto i te oire e rave rahi. Mea papu, mea rahi te mau Ite no Iehova e ta ratou tamarii tei faufaahia i tera faanahoraa î i te here no ǒ mai ia Iehova. A haere ai Eugene i tera mau haapiiraa aore ra i te mau fare maˈi, e ohipa ïa vau i te Betela, i te rahiraa o te taime i te tuhaa niraraa aore ra tunuraa maa.

To ˈu ati mauiui roa ˈˈe

I 2006, ua faaruru vau i to ˈu ati mauiui roa ˈˈe, ua pohe to ˈu hoa here ra o Eugene. Auê au i te mihi ia ˈna e i to ˈna here! Mea rahi te mea tei tauturu ia ˈu ia faaruru i te ati, mai te vai piri-noa-raa ia Iehova na roto i te pure e te taio-tamau-raa i te Bibilia. Te faarooraa i te aparauraa o te irava mahana e te utuafare o te Betela. Te taioraa i te pene no reira mai te irava mahana. E te ohiparaa i roto i te tuhaa niraraa i te Betela, e fanaˈoraa taa ê tera no ˈu. I te mau matahiti i mairi, ua tia atoa ia ˈu ia tauturu ia nira i te mau paruru o te mau Piha tairururaa i New Jersey e New York. I teie nei, te tavini ra vau i te Betela no Fishkill i reira vau e nira ai i te tahi mau mea rii.b

Te mea faufaa roa ˈˈe no ˈu i roto i te oraraa o te hereraa ïa ia Iehova e te auraroraa ia ˈna e ta ˈna faanahonahoraa. (Hebera 13:17; Ioane 1, 5:3) Te oaoa nei au e ua tuu mâua Eugene i teie mau mea i te parahiraa matamua i roto i te oraraa. I teie nei, ua papu ia ˈu e e haamaitai mai Iehova ma te horoa mai i te ora mure ore i roto i te paradaiso i te fenua i reira ïa mâua e farerei faahou ai.—Ioane 5:28, 29.