“Ua mau maite noa vau maoti to ˈu here ia Iehova”

Eaha tei tauturu i te hoê Communiste mai ia ˈu ia riro ei mero no te hoê haapaoraa tei parihia na i te patoi i te faatereraa? Mea nafea te here o Iehova e te tauturu a te mau taeae i te tauiraa i to ˈu huru i te mau matahiti i roto vau i te aua haavîraa?

Ua imi noa vau i te parau-tia e te hau o te feruriraa

Ua fanauhia vau i te matahiti 1930 i te oire iti o Tabany i te pae apatoerau o Moldavie. Ua rohi puai papa raua mama i te hoê vahi faaamuraa animara no te faatamaa e 6 tamarii. E feia riirii roa matou. E mero mama no te haapaoraa Orthodoxe no Rusia, area o papa, e Katolika ïa. Pinepine raua i te mârô a ite ai i te haerea tano ore o te mau perepitero!

Ua noaa ta ˈu parau tuite i te 18raa o to ˈu matahiti e faaô atura vau i roto i te pǔpǔ ui apî Communiste parauhia Komsomol. I muri mai, ua maitihia vau ei papai parau no tera pǔpǔ. Mea faufaa roa no ˈu te autaeaeraa, te aifaitoraa e te parau-tia. No reira, ua peapea roa ïa vau a ite ai i te mau ohipa tia ore e te piˈo ati aˈe ia ˈu.

I te mea, mea turu roa vau i te ohipa a te Komsomol, ua auraro noa ïa vau a faaue ai te faatereraa Rusia tahitoa ia opani i te mau fare pure e te mau haapaoraa atoa. Te ora ra te tahi mau Ite no Iehova i to matou oire rii. Noa ˈtu ua ite au e feia afaro ratou e te hau, i manaˈo na vau, mea etaeta roa ratou i roto ta ratou haapaoraa! Aita â ïa vau i ite na te hoê o ratou e pahono e rave rahi o ta ˈu mau uiraa!

E Ite no Iehova te tuaana o to ˈu papa, e ora na oia i to matou oire rii, o Dimitriy to ˈna iˈoa. I te hoê mahana i te matahiti 1952, ani mai nei oia: “Georgiy, eaha ta oe e hinaaro e rave i to oe oraraa?” O ˈna anaˈe iho â hoi te haapeapea ra no ˈu, te tumu ïa o ˈna e ui mai ai tera uiraa. Parau mau, mea rahi ta ˈu mau uiraa aita â i pahonohia ˈtu ra. I uiui na vau: “Mai te peu te vai mau ra te Atua, no te aha ïa oia e vaiiho ai ia rahi roa te mauiui?” I na 8 mahana i muri iho, ua faaohipa Dimitriy i te Bibilia no te pahono i ta ˈu mau uiraa. I te tahi taime, ua paraparau noa mâua i nia i te Atua e hora 3 atu i te aahiata!

I muri aˈe i tera mau aparauraa, ua faaoti au i te haapii maite i te Bibilia. Ua haamata vau i te taa e Metua to ˈu i te raˈi o te here mau ra ia ˈu. (Salamo 27:10) Noa ˈtu mea iti roa to ˈu ite no nia i te Bibilia, ua here au ia Iehova e ua tauturu mai te reira ia taa eaha mau tei titauhia ia ˈu ia rave. Ua faarue au i te pǔpǔ Communiste noa ˈtu te mau haamǎtaˈuraa. E 4 noa avaˈe i muri aˈe i to ˈu haamataraa i te haapii, ua pûpû vau ia ˈu ia Iehova e bapetizohia ˈtura vau i Tetepa 1952.

Ua tamatahia to ˈu here ia Iehova

Ua opanihia te mau ohipa a te mau Ite no Iehova i tera mau matahiti. Tera râ, ua hinaaro vau e faaite i to ˈu here ia Iehova. Hinaaro atura vau e horoa i to ˈu taime no te afai i te mau papai i te mau Ite no Iehova e ora ra na te mau oire rii. Mea atâta roa no te mea e nehenehe noa te tahi taata e faaite i te feia mana! Aita atoa te tahi mau Ite no Iehova i tiaturi mai no to ratou manaˈo e mutoi huna vau o tei faaô omoˈe mai i roto i te amuiraa. Ua itehia râ te parau mau i muri aˈe! E 2 noa avaˈe i muri iho i to ˈu bapetizoraahia, ua tapea e ua faautuahia vau i te opereraa i te mau papai opanihia.

Hou a tupu ai te haavaraa, ua tapeahia vau fatata hoê matahiti te maoro. Ua uiuihia vau e rave rahi taime e ua turai noa mai te mau tiai ia taiva ia Iehova. Ua puai ê na râ to ˈu here ia Iehova! I muri mai, ua faatupuhia te tahi haavaraa i te oire o Odessa i Ukraine. Ua titauhia to ˈu nau metua e to ˈu mau taeae e tuahine ia haere mai i te haavaraa, e ere ïa ratou i te Ite no Iehova i tera taime!

Ua horohia vau i mua i te ture no te mea ua faaô vau i roto i te hoê pǔpǔ faaroo atâta. Ua hinaaro te feia mana ia manaˈo to ˈu utuafare ua inohia to ˈu upoo! Ua riaria roa to ˈu na metua, ua taparu mai raua ma te taˈi ia faarue i tera haapaoraa. Aita râ vau i aueue, ua parau vau ia mama: “Eiaha e haapeapea, aita to ˈu upoo i inohia. Ua itehia mai râ ia ˈu ta ˈu i imi noa na e eita roa vau e faarue i tera haapaoraa.” (Maseli 23:23) Mea iti to ˈu ite i nia i te Bibilia, ua navai râ no te tapea i to ˈu taiva ore ia Iehova! E 6 matahiti i muri aˈe, ua haapii atu â to ˈu na metua no nia i ta ˈu mau tiaturiraa e riro atoa mai nei raua ei Ite no Iehova.

Ua faautuahia vau 15 matahiti ohipa faahepohia e ua hopoi-ê-hia vau na nia i te pereoo auahi i te tuhaa fenua Kolyma tei reira te pu rahi o te mau aua haavîraa atoa i Sibérie. Ia ore te feia mau auri ia orure hau, e taparahi na te mau tiai e te mau raatira ia matou ma te ore atoa e horoa mai i te maa. I te omuaraa, feruriraa ïa vau: “E roaa anei ia ˈu ia faaoromai i teie huru tupuraa?”

Ua ite au i te rima aupuru o te Atua e ta ˈna tauturu

I to ˈu taeraa ˈtu, 34 Ite no Iehova tei tapea-aˈena-hia i roto i te aua. Ua ani haere ratou ma te haapao maitai râ: “Te vai ra anei te tahi Iehonadaba i roto ia outou?” Oioi noa vau i te ite, to ˈu mau taeae teie! O ratou anaˈe hoi te faaohipa i teie parau no roto mai i te Bibilia. Aita noa teie mau taeae paari i haapii mai e nafea ia pee i te mau aratairaa Bibilia i roto i te fifi, ua tauturu atoa mai râ ratou ia faatupu i te mau huru maitatai faufaa mau mai te haroˈaroˈa.

I roto i te aua, e ohipa na vau ei taata haapao matini. I te hoê mahana, ma te teoteo, na ô mai nei to ˈu hoa ohipa o Matphey ua mau aau ia ˈna te iˈoa o na 50 peata. I to ˈu taora-parau-raa ia ˈna no nia i tera mau peata, tamata mai nei Matphey i te moto ia ˈu, auaa râ ua horo vau! I muri aˈe, ua inoino roa vau i te iteraa i te mau taeae ia ata. Na ô atura vau ia ratou: “Eaha outou e ata ˈi? Ua hinaaro hoi au e poro ia ˈna!” Ma te mǎrû, ua haamanaˈo mai ratou: Ta tatou fa, e faaite ïa i te parau apî oaoa, eiaha râ e haapepe i te taata. (Petero 1, 3:15) E ere Matphey i te mea tâuˈa roa i te faatereraa, ua tapao râ o ˈna mea faatura roa te mau Ite no Iehova i te mau tiai e te feia mana. I muri mai, ua anaanatae oia i te poroi o te Bibilia. Eita e moˈe ia ˈu i te po i bapetizo-omoˈe-hia ˈi oia i roto i te hoê farii pape toˈetoˈe!

Tau taime rii i muri aˈe i to matou taeraa ˈtu i roto i te aua, ua titau-manihini-hia vau e e 2 taeae apî ia haere i te tahi rururaa poritita. Ua patoi oioi matou ma te manaˈo e ofati matou i to matou tiaraa amui ore. (Ioane 17:16) Hurihia ˈtura matou i roto i te hoê piha poiri e 2 hebedoma te maoro. I te matararaa mai matou, ua faataa mai te mau taeae î i te here, eita matou e ofati i to matou tiaraa amui ore no te mea noa ua haere matou i tera rururaa. E nehenehe hoi matou e faaohipa i tera taime no te haapapu e Ite no Iehova matou. Ma te mǎrû, ua tauturu mai teie mau taeae î i te here ia faaite atu â i te paari e ia haapao i te mau aratairaa Bibilia i roto i ta matou mau faaotiraa.

Ua tauturu noa mai tera mau taeae ma te faaoromai e ua riro mau te reira ei haapapuraa te tâuˈa mai ra Iehova ia ˈu. Ei hiˈoraa, te vai ra hoê mau auri e perepitero atoa tei maitihia ei haapao faufaa. I te mau taime atoa e ite mai ai oia ia ˈu i te taime tamaaraa, e aroha mai oia ia ˈu ma te parau: “Ia ora na tamaiti a te Diabolo!” Na ô mai nei te tahi mau auri: “E hoa, e pahono ïa oe, Ia ora na papa!” Ua na reira iho â vau, i te pae hopea, ua taparahi-maitai-hia vau! I to te mau taeae iteraa i te ohipa i tupu, ua tauturu mai â ratou ia taa aita vau i faaite i te haerea maitai. (Maseli 29:11) I muri mai, ua haere au e tatarahapa i tera perepitero.

Na mua ˈˈe au i afaihia ˈi i te aua haavîraa, i matau na vau i te haere omoˈe i te mau putuputuraa i te po e i te mau aahiata. I roto râ i te aua, aita e vahi no te tapuni! No reira i te mau mahana atoa, e ruru matou ma te tia noa i mua maitai i te mau tiai no te paraparau i nia i te tahi mau irava ta matou i papai aˈena i nia i te mau papie nainai roa. Ta matou fa, e tamau aau ïa e rave rahi irava Bibilia ia nehenehe matou e feruri tamau i nia i te reira. Ia haere anaˈe mai te tiai e tâpû i ta matou putuputuraa, oioi noa matou i te huna i ta matou mau papie.

Ua hopoi-ê-hia, aita râ i faataa-ê-hia i te here o te Atua!

I te matararaa mai au i te matahiti 1959, ua hopoi-ê-hia vau i te tuhaa fenua o Karaganda i Kazakhstan. Noa ˈtu tei roto noa â vau i te hoê tau hiˈopoaraa, ua ani au i te parau faatia no te rave 20 mahana no te haere e faaipoipo. Ua tere au i te tuhaa fenua o Tomsk i Rusia i reira vau i te farereiraa ia Maria te tahi tuahine haapao maitai e te haviti mau. Mai taˈu iho â i matau, ua faaite tia ˈtu vau i to ˈu manaˈo. Ua na ô atu vau: “Maria, aita to ˈu e taime ia haamatau tâua. No reira, eiaha e faataere, faaipoipo anaˈe!” Farii mai nei oia, e faatupuhia ˈtura te tahi oroa haihai no to mâua faaipoiporaa. Te huru maitatai ta Maria i ite i nia ia ˈu, o to ˈu ïa faaoromai tamau i roto e rave rahi ati e ua hinaaro oia e tauturu ia ˈu ia tamau i te tavini ia Iehova.—Maseli 19:14.

I tera matahiti, eita matou e nehenehe e haere tiamâ i tera e tera fare no te poro. Ua imi ïa matou i te ravea no te faaite i ta matou e tiaturi ra ma te faanaho-ore-hia. Ei hiˈoraa, ia titau-manihini-anaˈe-hia matou aore ra i roto i to matou mau tere faafaaearaa, pinepine matou i te faahiti i to matou tiaturiraa e ora e a muri noa ˈtu i nia i te fenua. E imi atoa matou i te ravea no te faatupu i te aparauraa. Ei hiˈoraa, e haere matou e mataitai i te mau fare e hoohia ra e e tamata matou i te paraparau i te fatu fare no nia i te Atua. Na roto i tera ravea, e 6 taata tei farii i te hoê haapiiraa Bibilia e ua riro mai ratou ei Ite no Iehova i muri mai.

Ua nehenehe atoa matou e poro i te tahi taime i te tau maitiraa. I te hoê mahana, haere mai nei te tahi mau mutoi huna i ta matou raveraa ohipa. Tau taeae rii e o vau nei te ohipa ra i reira. Fatata 1 000 rave ohipa matou pauroa. I mua ia ratou, ani mai nei teie mau mutoi, no te aha te mau Ite no Iehova e ore ai e apiti i te ohipa poritita. Ua paturu mai hoê o to matou raatira e te tahi mau rave ohipa. Ua parau ratou e rave ohipa itoito e te haapao maitai matou. Roaa mai nei ia matou te itoito no te faataa i to matou tiaraa ma te faahiti i te mau irava Bibilia ta matou i tamau aau. No to matou itoito, ua nehenehe e 4 rave ohipa e anaanatae i te Bibilia, e aita i tia hoê matahiti, bapetizohia ˈtura ratou.

I te area matahiti 1970, e rave rahi feia aau tae tei riro mai ei Ite no Iehova i Kazakhstan. Ua taa ia matou e titauhia ia faatupu i ta matou tairururaa matamua. Teie nei râ, e nafea paˈi ia faatupu e ia ore te feia mana ia ite! Faaoti atura matou i te faatupu i te hoê â taime te tairururaa e te hoê oroa faaipoiporaa. Hau atu i te 300 taata tei apiti mai. Ua rohi puai o Maria e te tahi atu mau tuahine no te faanehenehe i ta matou vahi rururaa e no te tunu i te maa au mau. Te mea râ ta te mau manihini i haafaufaa ˈtu â, o te haapiiraa Bibilia ïa tei horoahia mai e te mau taeae orero e rave rau. I tera mahana, a tahi ra vau a horoa ˈi i te hoê oreroraa parau i mua i te nahoa rahi.

Ua turu noa mai te here o Iehova i roto i te ati

Ua riro mau ta ˈu vahine here ra o Maria ei tauturu papu. E vahine mǎrû e te auraro o tei tuu noa i te Faatereraa arii na mua roa. Noa ˈtu e vahine pautuutu maitai oia, ua roo-taue-hia o ˈna i te hoê maˈi ino mau o te mau ivi. Eita ˈtura ta ˈna e nehenehe e hahaere faahou, ua tarava noa ïa oia i nia i te roˈi fatata 16 matahiti te maoro. Ua tauturu ta mâua tamahine o Lyudmila ia ˈu ia aupuru ia ˈna e tae noa ˈtu i to ˈna poheraa i 2014.

Ia ite anaˈe vau ia Maria ia mauiui, mauiui roa atoa vau no te mea eita ta ˈu e nehenehe e tamǎrû ia ˈna! Tera râ, tae roa i te taime hopea, ua taio amui mâua i te Bibilia e i ta tatou mau papai. Pinepine mâua i te paraparau no nia i te ao apî! I te tahi taime, e taˈi noa vau a faaea noa ˈi i pihai iho ia ˈna. Ia taio anaˈe râ mâua i te mau parau fafau faahiahia a Iehova, ua topa ïa to mâua hau e ua faaitoito mai te reira ia faaoromai tamau.—Salamo 37:18; 41:3.

Mai te mahana mai â i taa ˈi au te here ra Iehova ia ˈu, ua ite noa vau i ta ˈna tauturu e to ˈna aupuru! (Salamo 34:19) E ere au i te taata feruriraa paari na mua ˈˈe, ua ite râ vau i te here o Iehova na roto i te feia o tei tauturu mai ma te faaoromai ia haamaitai i to ˈu huru. Ua hopoi-ê-hia vau, ua hurihia i roto i te aua haavîraa, ua faaitoito noa mai râ Iehova ia ˈu na roto i ta ˈna Parau. Na ˈna atoa i horoa mai i te itoito e hinaarohia no te aupuru i ta ˈu vahine here ra o Maria e tae noa ˈtu i to ˈna poheraa. I teie mahana, e nehenehe au e parau, ua mau maite noa vau maoti to ˈu here ia Iehova.