Eaha ta te Bibilia e parau ra no nia i te mau ati natura?

Te pahonoraa a te Bibilia

E ere na te Atua e faatupu ra i te mau ati natura i teie mahana. Tera râ, te haapeapea ra o ˈna no te feia e faaruru ra i te reira. E faaore roa te Faatereraa arii a te Atua i te mau mea atoa e haamauiui ra i te taata, oia atoa te mau ati natura. A tiai noa ˈi, te horoa mai ra te Atua i te tamahanahanaraa i te feia o te faaruru ra i te mau ati natura.—Korinetia 2, 1:3.

• E nafea tatou e papu ai e ere te mau ati natura i te faautuaraa no ǒ mai i te Atua ra?

• E tapao anei te mau ati natura e te ora nei tatou i te mau mahana hopea?

• E nafea te Atua e tauturu ai i te feia tei faaruru i te mau ati natura?

• E nehenehe anei te Bibilia e tauturu mai ia ineine tatou ia tupu anaˈe te ati natura?

• Te mau irava Bibilia no te tamahanahana i te feia tei faaruru i te mau ati natura

E nafea tatou e papu ai e ere te mau ati natura i te faautuaraa no ǒ mai i te Atua ra?

Ia au i te Bibilia, ua ite tatou e ua faaohipa Iehova i te puai o te natura no te faautua i te taata, mea taa ê roa râ ta ˈna huru raveraa i ta te mau ati natura e faatupu nei.

• E rave rahi tei pohe e tei pepe i te ati natura. Ia au i te Bibilia, ia faaohipa te Atua i te puai o te natura no te faautua i te taata, e haapao oia ia pohe noa te feia ino. Ei hiˈoraa, i to te Atua haamouraa i na oire ra o Sodoma e Gomora, ua haapao o ˈna ia ora mai te taata maitai ra o Lota e ta ˈna na tamahine. (Genese 19:29, 30) Ua ite te Atua eaha to roto i te aau o te taata e ua haamou oia i te feia anaˈe ta ˈna i manaˈo e mea ino ratou.—Genese 18:23-32; Samuela 1, 16:7.

• E tupu noa mai te mau ati natura aita hoê aˈe faaararaa. Area râ no te Atua, ua faaara noa oia i te feia ino hou a faaohipa ˈi i te puai o te natura no te haamou ia ratou. Ua ora mai te feia atoa o tei faaroo i tera mau faaararaa.—Genese 7:1-5; Mataio 24:38, 39.

• Na te mau faaotiraa hape e te ohipa a te taata i faatupu i te mau ati natura. E nafea? Te tuino ra te taata i te natura e te patu ra ratou i te tahi mau vahi e pinepine te mau aueueraa fenua, te pape pue e te fifi natura i te tupu. (Apokalupo 11:18) E ere te Atua te tumu i rave ai te taata i te faaotiraa hape.—Maseli 19:3.

E tapao anei te mau ati natura e te ora nei tatou i te mau mahana hopea?

E. Te faataa ra te mau parau tohu Bibilia e e tupu te mau ati i “te anotau hopea o te ao nei” aore ra “i te mau mahana hopea.” (Mataio 24:3; Timoteo 2, 3:1) Ei hiˈoraa, no te tau ta tatou e ora nei, ua parau Iesu: “E tupu te oˈe e te aueueraa fenua i tera e tera vahi.” (Mataio 24:7) Fatata te Atua i te haamou roa i te mau mea atoa o te haamauiui ra i te taata, oia atoa te mau ati natura.—Apokalupo 21:3, 4.

E nafea te Atua e tauturu ai i te feia tei faaruru i te mau ati natura?

• E tamahanahana te Atua i te feia tei faaruru i te mau ati natura maoti te Bibilia. Te haapapu ra te Bibilia e te tâuˈa ra te Atua ia tatou e te mauiui atoa ra o ˈna ia mauiui anaˈe tatou. (Isaia 63:9; Petero 1, 5:6, 7) Te parau atoa ra te Bibilia e i te hoê mahana, aita e ite-faahou-hia te mau ati natura.—A hiˈo “Te mau irava Bibilia no te tamahanahana i te feia tei faaruru i te mau ati natura.”

• Te tauturu ra te Atua i te feia tei faaruru i te mau ati natura maoti ta ˈna mau tavini. Te faaohipa ra te Atua i ta ˈna mau tavini i nia i te fenua ia pee ratou i te hiˈoraa o Iesu. Ua tohuhia e e tamahanahana Iesu i “te feia aau mauiui” e “te feia atoa e oto ra.” (Isaia 61:1, 2) Te tutava ra te mau tavini a te Atua i te pee i to ˈna hiˈoraa.—Ioane 13:15.

  Te faaohipa atoa ra te Atua i ta ˈna mau tavini no te horoa i te rima tauturu i te feia o tei faaruru i te mau ati natura.—Ohipa 11:28-30; Galatia 6:10.

E nehenehe anei te Bibilia e tauturu mai ia ineine tatou ia tupu anaˈe te ati natura?

E. Noa ˈtu e ere te Bibilia i te hoê buka faaineineraa no te mau ati natura, te horoa mai ra te reira i te tahi mau aratairaa o te nehenehe e tauturu ia tatou. Ei hiˈoraa:

• A faaineine eaha ta tatou e rave ia tupu anaˈe te hoê ati natura. Te parau ra te Bibilia: “E ite te taata feruriraa haroˈaroˈa i te tupuraa atâta e e tapuni oia.” (Maseli 22:3) E haerea paari ia faaineine i te hoê pute faaineinehia no te mau tupuraa ru e ia feruri atea eaha ta tatou e rave e ihea to tatou utuafare e haere ai ia tupu anaˈe te ati natura.

• Mea faufaa aˈe tatou i te mau taoˈa materia. Te haapapu ra te Bibilia: “Aita hoi ta tatou e taoˈa i hopoi mai a fanauhia mai ai tatou i roto i teie nei ao, e aita ta tatou e taoˈa e hopoi na muri ia tatou ia pohe tatou.” (Timoteo 1, 6:7, 8) E tia ia ineine tatou i te haapae i to tatou fare e ta tatou mau taoˈa no te ora mai i te ati natura. Eiaha e haamoˈe e mea faufaa aˈe tatou i te mau taoˈa materia.—Mataio 6:25.