Eaha ta Iesu i rave no te faaora ia tatou?
Pahonoraa a te Bibilia
Ua faaora o Iesu i te feia e faatupu i te faaroo a horoa ˈi i to ˈna ora ei hoo. (Mataio 20:28) Te parau ra te Bibilia o Iesu, te “Faaora i to te ao nei.” (Ioane 1, 4:14) Te na ô atoa ra te Bibilia e: “Ia ite atoa outou e aita roa e ora ia vetahi ê, aita ˈtu hoi e iˈoa i raro aˈe i teie nei raˈi i horoahia mai i te taata, e ora ˈi tatou.”—Ohipa 4:12.
Ua faaruru Iesu i te pohe no te taata atoa e faatupu ra i te faaroo ia ‘na. (Hebera 2:9; Ioane 3:16) I muri iho, “ua faatia mai te Atua ia ˈna mai te pohe mai,” e ua hoˈi Iesu i nia i te raˈi ei varua. (Ohipa 3:15) I reira, ua tia ia Iesu “ia faaora roa i te feia e faafatata nei i te Atua na roto ia ˈna, no te mea te ora noa ra oia no te taparuparu i te Atua no ratou.”—Hebera 7:25.
No te aha mea faufaa ia taparuparu Iesu no tatou?
E taata tia ore pauroa tatou. (Roma 3:23) E faaatea ê te hapa ia tatou i te Atua e e pohe te faahopearaa. (Roma 6:23) Te tavini ra râ Iesu ei “paruru” no te taata e faatupu ra i te faaroo i roto i te hoo. (Ioane 1, 2:1, nota) E tia ˈtu Iesu no ratou, a ani ai i te Atua ia faaroo i ta ratou pure e ia faaore i te hapa niuhia i nia i te tusia a Iesu. (Mataio 1:21; Roma 8:34) E pahono te Atua i ta ratou mau pure no te mea te haapao ra ratou i to ˈna hinaaro. Ua tono te Atua ia Iesu i nia i te fenua “ia ora to te ao nei na roto ia ˈna.”—Ioane 3:17.
E navai noa anei ia ite o vai Iesu no te ora?
Eita e navai noa ia ite o vai Iesu no te ora, e titau-atoa-hia râ hau atu â. (Ohipa 16:30, 31) Te na ô ra te Bibilia: “Mai te tino nei hoi aita e aho mea pohe, oia atoa ïa te faaroo aita e ohipa, mea pohe.” (Iakobo 2:26) No te ora mai, e titauhia ia tatou:
Ia haapii no nia ia Iesu e o Iehova, to ˈna Metua.—Ioane 17:3.
Ia faatupu i te faaroo ia raua.—Ioane 12:44; 14:1.
Ia faaite to tatou faaroo ma te pee i ta raua mau faaueraa. (Luka 6:46; Ioane 1, 2:17) Ua haapii Iesu e, e ere o te feia atoa e parau mai: “E te Fatu”, e faaorahia. “O te taata anaˈe râ o te rave i te hinaaro” o to ˈna Metua i te raˈi.—Mataio 7:21.
Ia tamau i te faaite i to tatou faaroo noa ˈtu te fifi. Ua haapapu maitai Iesu, a parau ai oia: “Te taata râ tei faaoromai tamau e tae noa ˈtu i te hopea, e ora ïa.”—Mataio 24:13.